6
Poro ihir Korin ire gwemat tihan tihan ruumsup darishe ohe meng oh
1 Nuhur Got ohe tapnong ham atamreipti han nuhuro rim Got orhe damdapat orhor Imat yah matpor daham yah nahat orhor ma napapat bap gurnong orhe inahapat danong oh wa hapri. Damsi hat orhorwi ha patengwe rim nuhur mama kasip mengtei naporipti ohmur. 2 Got oh ritporhan ma brak matpa meng moh gur amratin.
Noh Kaput ihirnong imat panggeitiprawa ma dahatip dik oh hatporhan noh gure ma naporiya meng oh noh amram gurnong napanggeitipmur. Noh gurnong nambutipra ma dahatip dik oh hatporhan noh gurnong nambura napanggeitipmur.
ritporhan brak matpamur. Gur amratin. Gin Got orhe namram napanggeim napapin dikhe gin orhormur. Nambur napanggeitin dikhe gin orhormur. Inahah dik ohoh ihan gur wa hapri. Damsi hat orhor indinmur.
3 Damsi hat orhor indinmur ma naporipti han nuhurnong gurdapat Ihir yah hat na patema er hat saptimur. Ihan nuhurhe ire hat saptiru hat sapera daham tambapte tapaya hatin hatipririm nuhur potahat patim orhor meng oh pomat naporiptimur. 4 Nuhur yah hat patim orhor gurnong meng pomat ma naporipti oh hanip ihir nure boknong ruumsup nahayao ti da ti da ruumsup oh nure boknong ruumsup nahaho inahat napapatim orhor nuhur na gapa ham kasip hat orhor patin gur nuhurnong wanahama Maihir Got orhe atamreindin oh yah hat orhorwi atamreipti han baphe dahaptimur.
5 Nure ihat tihan tihan ruumsup ma nure boknong daripti oh kat ihirdapat nuhurnong garnaham kawsi niyao karapus nahayao irair tit dawi ham kasip ham nitpero daham inahayao nahaptimur. Nuhur kin ruumsan na timama ruumsan tamreiyao den pomat na dam pahohsi hat ayao hat orhorwi patimur. 6 Ihat patim da ongeng mat pisayao dakuu hat ayao kapkap it diteim potin danong na hayao hanip yah mat papindin ohe danong hayao Got ohe Yahsup ohe ma inahat napapat danong hayao ihirnong ina mutuhdapat bopor mat indin ohe danong hayao ihat pati han bap nuhurmur. 7 Nuhur arpin mengwi pot pisayao Got orhe kasip ohsi hat patim ihat tamrein sapti han bap nuhurmur. Nuhur Got orhe duung dasi er danong sut ma pisapti oh bes tan oh er danong sutin ohe duung da oh marin saptimur. Tan oh nure boknong nitipririm ohe damer oh marin saptimur. 8 Nuhur ihaptin kat han ihir nure winnong nadaptuhuriptimur. Kat han ihir nure winnong namkar naer deiptimur. Kat han ihir nuhurnong armisi nahaptimur. Kat han ihir dasei nahaptimur. Nuhur arpin han orhora; kat ihirdapat nuhurnong dasuh han hatin nahat napaptimur.
9 Han gonsi nure ihat tamreiptinong oh am hat pati orhor kat han ihirdapat nuhurnong Maihir be han bap ire meng na amratin inasi hat pati han baphe naporiptimur. Nuhurnong haputin ina hat pati orhor nuhur mama pati ohmur. Kat ihir nure danong dason naham inahapti orhor nuhur na hapur da patimur. 10 Ina ruum napripti sup oh nure basnong ruum nahapti orhor nuhur na saheih ham amam da tei orhorwi hat patimur. Nuhur borop han bap hatin hat pati orhor gurnong meng napot ma napisapti ohe pe oh Got ohe yah han erer ohsi kamah han hatin nahat napisapatmur. Nuhur bisei han hatin hat pati orhor Got orhe erernong oh gonsi nuhur marin patimur. Ihat pati han nuhurnong Ihir arpin Got ohe meng yah mat napot napisapti han ihir ma hapat ha dahatingwe rim nuhur mama naporipti ohmur.
11 Ama naporiya oh Korin aptei pati kuuhan guragure han nuhur gurnong da nat pati ohoh ihan nure ina ruum dar batbet hat sapti meng oh na naremama gonsi gurnong pitap teinong mar napora bopor nahat napapti ohe meng oh pitap teinong mar napriyamur. 12 Nuhur gurnong ma da nat pati da oh tit da tit na naremama amam dao oh gonsi pitap teinong mar gurnong napriptimur. Napripti orhor gurdapat nuhurnong ma da napripti da oh hatip mat pok napriptimur. 13 Ihan nure gurnong da nat pati da oh ti na naremama gonsi gurnong ma napriptiru mat orhor gure dahe nuhurnong imat orhor naprishenmur. Naprishenmur ma napor oh itapir ihir brer ihirnong sawa meng poriptiru mat napormur.
Dir Got ohe ap yawar hatin hat pati han diro rim be han ihirsi sahsah hathe patepri ritip ohe meng oh
14 We. Krais orhe danong hat sapti gurri Krais ohe danong na hat pati kuu han ihirsi tit inawi gosham sahsah hathe patepri. Got ohe duutin da ohsi; er hat sapti da ohsi tap matin hatinda. Na tap matin hatin ohoh ihan sahsah mathe paptepri. Mong dasi; kwitemsihe tap mat sahsah mat pison hatinda. Na imtin hatin ohoh ihan gur sahsah mathe paptepri. 15 Satan ohsi; Krais ohsi ihit tap da hat son hatinda. Basra. Ihit na ihtin hatin hat pati ohoh ihan gur ihirsi sahsah goshathe sasipri. Krais ohe danong hat pati han dire dasi; ohe danong na hat pati han ire dasi tap matin hatinda. Basra. Na imtin hatin ohoh ihan sahsah mathe paptepri. 16 Kakdah dasuh got ire ap yawar ohsi; Got orhe ap yawar ohsi tit apwi matin hatinda. Basra. Na imtin hatin ohoh ihan gur sahsah mathe paptepri. Got oh ritporhan ma brak matpa mengnong moh dahenmur. Ma brak matpa meng oh mamarumur.
Got oh Noh ire ina oh norhe ap yawar hatin mara ire ina mutuh oh noh patepramur. Ihat ma patepra oh ihirnong norhe nita mar paptepramura; ihirdapat norhornong Nure Gotmur napor napapteprimur.
ritporhan brak matpamur. Giritporhan ma brak matparu orhe nita ma nahat pat dir gonsi dipwi pat han Got orhe ap yawar ongeng mat apapten ohe ap yawar hatin hat patimur. Ihat pati han dir ohoh ihan gur Got ohe danong na hapti han ihirsihe sahsah goshathe patepri. 17 Ihirsihe sahsah hat patepri ritporhan ma brak matpa mengnong moh dahenmur. Ma brak matpa oh mamarumur.
Gur Got nohe danong na hapti han ire tapnong ham sahsah goshat pati da oh mandama gur gurarhe teinong hat patenmur. Gurarhe teinong hat patim gurnong er naham bisei nahapti han erer oh gurri maripri. Ihat ongeng tahat patin orhor norhor nambutipramur. 18 Nambura norhor gure ita hat patepramur. Gur norhe brer kuunango wanango ham diradir pateprimur. Hanipyah kasipnap han norhor ginaporpatmur.
potporhan ama meng oh brak matpamur.