2
Ohunoŋoha hiitu hihulu
1 Huli nʼohugumira erala hu hituufu ehi hwaŋulira, ko hutaŋaba huhiŋwaho. 2 Ohulaga ti amagambi ga Hatonda aga bamalayika balomera abaatu gaali matuufu, hiisi atagagonderanga, Hatonda gamuboneresanga. 3 Olwo ŋaahani efe huliŋona huutye singa hutala obunoŋosi obubbala obwaga aŋo? Musengwa omwene njʼoweherera ohuŋa obuhwenda obuŋamba hu ngeri eyi baatu banoŋohamo era abo ababuŋulira batuhahasa ngʼolu buli butuufu. 4 Ni Hatonda omwene gahahasa ati obuhwenda obwo butuufu ni gaahola ebyʼeŋunyisa nʼebyamaliholiho era nʼagaba nʼebirabo byʼOmwoyo Omutukuvu ngʼolu omwene genda.
Yesu gafuuha muutu ko atunoŋole
5 Abamalayika si mbaba Hatonda gaaŋa obuŋangi ohuŋuga ehyalo ehinyaaha, ehiriija ehihulomaho. 6 Aye ŋaliŋo mu Byaŋandiihiwa aŋa bihahahisa erala biiti,
“Hatonda, omuutu njʼani ohuba ti omuŋeegaho,
era omwana wʼomuutu njʼani ohuba ti omulumirwa?
7 Wahola omuutu ŋabuliraho ŋadiidiri ohuba hyʼabamalayika.
Era wamwambasa engule eyʼeŋono,
8 era ngʼomuŋa nʼobuŋangi ohuŋuga hiisi hiitu.”* 2:8 Zab 8:4-6
Hatonda ni gaata ebiitu byosibyosi ŋaasi wʼobuŋangi bwʼomuutu, ŋaŋuma hiitu kadi hirala ehi atamuŋa huŋuga. Aye ŋaahani huhiiri hubona byosibyosi nʼabiŋuga. 9 Aye hubona Yesu oyu beesa ŋaasi gaŋumiraho ŋadiidiri ohuba hyʼabamalayika ŋaahani ni bamuŋaye engule eyʼeŋono olwʼohubonaabona ohugabonaabona. Era olwʼehisasabirisi hya Hatonda gaafiiririra abaatu bosibosi.
10 Hatonda owatonda ebiitu byosibyosi era agira byabaŋo, gasiima ohunoŋola abaana babe bangi gaabambasa eŋono. Olwʼehyo, gabona ati Yesu njʼosaniira ohuba omutangirisi owolereeye nʼabita mu humugudya ko abanoŋole. 11 Yesu ko ni naabo aba agwalaasa, bali ni saawe mulala. Cʼehigira esoni ni jitamuŋamba ohubalanga ati balebe babe. 12 Yesu aloma Hatonda ati,
“Nahamanyise abalebe bange obuhulu wʼesiina liryo,
nahembe ni kujumirya mu humbaaniro.”* 2:12 Zab 22:22
13 Era nindi aloma ati,
“Nja hwesiganga Hatonda.”
Era geyongera ohuloma ati,
“Ndi ŋano nʼabaatu aba Hatonda gaapa.”* 2:13 Yis 8:17,18
14 Olwohuba abaatu bali nʼomubiri nʼamafugi, cʼehyagira Yesu gafuuha hya nibo ko aŋange ohufa asihiirise Sitaani owaali nʼobuŋangi hu hufa, 15 ko abo abaali hyʼabasibe mu bulamu waawe ni batya ohufa, abaŋe edembe. 16 Mu butuufu oweene, Yesu sigaaja huyeeda abamalayika aye gaaja huyeeda bejuhulu ba Yibbulayimu. 17 Cʼehyagira gafaana hya balebe babe mu hiisi ngeri, ko aŋeerese Hatonda ngʼOmuhulu wʼabasengi ali nʼehisa era omwesigwa, ko aleetere Hatonda ohusoniŋa abaatu ebibi. 18 Era ŋaahani aŋanga ohuyeeda abo abahemewa, olwohuba yeesi bamuhema era gabonaabona.