1 Hatonda njʼowatulanga olwʼehisa hihye gaatuŋa obuŋeeresa buno. Olwʼehyo, sihuŋanga huŋwamo maani ohuhola omulimo guno. 2 Hwasalaŋo ohutahola ebiitu ebyʼesoni ebi baatu bahola mu ngiso, era sihutambisa bubi ehibono hya Hatonda olwʼohweyendulira ebyefe. Wabula hulomera abaatu amazima mu moni ja Hatonda era hiisi muutu amanyire hiina ehi huli. 3 Ne ni hiba ti Amaŋuliro Amalaŋi aga hubuulira sigategereheha, sigategereheha eyiri abo abatiina mu husihiiriha. 4 Sigategereheha eyi bali olwohuba Sitaani gabasiriŋasa, gabawiha emoni ohutabona enjase eyʼAmaŋuliro Amalaŋi agaŋamba hu eŋono lya Kurisito owaleha ehi Hatonda ali. 5 Hiri hiityo olwohuba sihubuulira ebituŋambaho aye hubuulira ebiŋamba hu nje Yesu Kurisito nga Musengwa nʼohweromaho huuti huli baŋeeresa benywe hu lulwe. 6 Hino huhihola olwohuba Hatonda owaloma ati, “Leha ŋabeŋo enjase yaaduhe mu hiirema,”* 4:6 Tand 1:3 galagira enjase ohwaduha mu myoyo jeefe husobole ohutegeera huuti eŋono lirye libonehera mu Kurisito.

7 Aye ehyʼobuŋinda ehyo hiri mu ndiife ohuli hyʼembya ejʼeroba. Ehyo hiri hiityo olwʼohwenda ohulaga ti Hatonda njʼomwene buŋangi sosi efe. 8 Hwosa ehiseera, ebigosi byatunyigirisa eyi ni neeyi, aye sibituhenamo maani. Era wayire ebiitu bituheehera, sihuŋwamo suubi. 9 Batuhiyaania aye Hatonda satulehurira, batunyigirisa aye sibatusihiirisa. 10 Hiisi aŋa huja, hugenda olumbe olweta Yesu ni lutulengereeye, obulamu wuwe bubonehere mu mibiri jeefe. 11 Hiri hiityo olwohuba wayire huli balamu hiisi ludaalo hubita mu meeno ga nasaŋa hulwa Yesu obulamu wuwe bubonehere mu mibiri jeefe ejifa. 12 Olwʼehyo, efe ohufa hutulengereeye, ko enywe musobole ohusuna obulamu obutaŋwaŋo.

13 Baloma mu Byaŋandiihiwa baati, “Nafugiirira, olwʼehyo naloma.”* 4:13 Zab 116:10 Hwesi mu engeri njʼenyene ohufugiirira hwefe njʼohugima hwaloma, 14 olwohuba humanyire huuti Hatonda owalamusa Yesu Musengwa, hwesi aja hutulamusa ngʼolu gamulamusa era alitwanjulayo efe ni nenywe mu moni ja Hatonda. 15 Ale ni muhimanye muuti ndinywe omugima ni hubonaabona, ko ehisa hya Hatonda hyeyongere ohusasaana mu baatu, boosi beyongere ohumwebasa nʼohumuŋa eŋono.

16 Olwʼehyo, wayire emibiri jeefe jitiina ni jiseseŋa, sihuŋwamo maani, olwohuba habuhyabuhya obulamu weefe owʼomwoyo Hatonda abugobosa bunyaaha. 17 Sihuŋwamo maani olwohuba ebiguudyo ebi huli hubitamo bidiidiri era byʼehiseera buseera, sibyolana nʼeŋono eritaŋwaŋo erihulisuna olwʼohubigumira. 18 Olwʼehyo ebiŋeego byefe hubitenga hu biitu ebitaboneha sosi ebiboneha. Hiri hiityo olwohuba ebiitu ebi hubonaho nʼemoni jeefe byʼehiseera buseera, aye ebyo ebitaboneha byahubaŋo emirembe nʼemirembe.