Ebbaluŋa ya
Yakobbo
Enyanjula
Ebbaluŋa yino, Yakobbo njʼowayiŋandiiha. Abahugu mu byʼEbbayibbuli bateberesa baati Yakobbo oyo gaali muganda wa Yesu. Era gaaliho mutangirisi wʼehibbubbu hyʼabafugiirira Kurisito mu Yerusaalemu. Yakobbo omwene oyo gaali mulala hu hahiiho mu Yerusaalemu (Bik 15:13). Pawulo galoma ati Yakobbo gaali “hyʼesiiro” mu bibbubbu byʼabafugiirira Kurisito (Bag 2:9). Abahugu baloma baati ebbaluŋa yino bayiŋandiiha mu mwaha ogwʼataanu oluvanyuma lwʼohusaaliwa hwa Kurisito. Hiboneha oti Yakobbo gaŋandiiha ebbaluŋa yino, nʼali mu Yerusaalemu.
Yakobbo gaŋandiihira “abaatu ba Hatonda abasimuha mu biha ehumi nabibiri abasalanihira mu mawanga” (1:1). Wayire ebi Yakobbo gaŋandiihaho biŋamba hu bafugiirira Kurisito bosibosi, aye ohuloma hu “biha ehumi nabibiri,” hiraga hiiti abo aba gaŋandiihira baali Bayudaaya. Ebbaluŋa yino yaali ya bibbubbu byʼabafugiirira Kurisito bingi, era yiroma hu biitu bingi. Yakobbo aloma ati ohufugiirira ohutuufu, hubonehera mu bikolwa byʼomuutu (2:17). Era alabula abaatu hu biŋamba hu hwehubbira ŋagati wʼabaŋinda nʼabagadi (2:1-4). Ngʼahena alabula abaatu ohwegenderesanga ebi baloma (3:1-12).
Ebiri mu bbaluŋa yino mu buupi
1. Yakobbo aheesa abafugiirira Kurisito (1:1)
2. Abafugiirira Kurisito bali nʼohugumira ebigosi (1:2-27)
3. Ohufugiirira huli nʼohubonehera mu bikolwa (2:1-26)
4. Ebibono biri nʼamaani (3:1-12)
5. Amagesi ga Hatonda ganjabulo hu gʼabaatu (3:13–4:10)
6. Ohwehudumbasa (4:11–5:6)
7. Ohulaabbira (5:7-20)
1
1 Kojeeyo, aboluganda. Ndiise Yakobbo omuŋeeresa wa Hatonda era owa Musengwa Yesu Kurisito. Mbaŋandiira enywe abaatu abasimuha mu biha ehumi nabibiri ebyʼabaatu ba Hatonda abasalanihira mu hyalo hyosihyosi, bafuuha babuli ŋano ni ŋala.
Amagesi nʼobunywani mu hufugiirira
2 Aboluganda, hiisi olu ebiŋeeriŋeri nʼohuhemewa ohwa hiisi ngeri binabagwirenga, muhibalenga ngʼehiitu ehireeta amasaŋalyo, 3 ni mumanyire muuti ohuhemewa hyʼohwo hubatengesya ne hwabongera obugumu. 4 Era mweyongere ohuba abagumu ohwolera erala olu mulifuuha abaatu abolereeye abaŋuma ehiŋanga ohubahubbiraŋo. 5 Hanye ŋaliŋo mu nywe aŋuma amagesi nʼohutegeera engeri eyʼohuba omugumu mu hufugiirira, alombe Hatonda agabira abaatu bosibosi nʼatabalilira amuŋe amagesi ago. 6 Aye nʼaba nʼamusunga, alombe nʼaŋumamo ehi gemoota mu mwoyo gugwe. Olwohuba omuutu abaamo ahʼohwemoota, aba hyʼehiyungi hu maaji ehi embeŋo ehubba yaaŋira eno ni neera. Yeesi awaakawaaka mu mwoyo gugwe ndagumira hu hiitu hirala. 7 Omuutu hyʼoyo ataŋeeganga ati aŋanga ohusuna ehi asungire ohuŋwa eyiri Musengwa, 8 olwohuba omuutu owʼemyoyo ebiri, saagumira hu hiitu hirala.
Obugadi nʼobuŋinda
9 Afugiirira Kurisito oyu bahye babisyamo emoni olwohuba mugadi, gesiimenga mu mwoyo olwʼehyo. Olwohuba wayire abahye bamutala, aye ali nʼeŋono mu moni ja Hatonda era anahamudunde gamuta aŋalaŋi. 10 Olwo nʼomuŋinda yeesi geesiime olwohuba ti niye Hatonda alimwisa edaala? Omuŋinda niye ali hyʼehimuli ehiŋotoha hyakukumuha esaawa yosiyosi. 11 Olwohuba eryuba ni liŋanga obubalire bwohya ehirime, ehimuli ehibaho nga hiŋotoha higwa nʼobuŋoono waahyo nga bugota. Mu ngeri njʼenyene abaŋinda boosi baatyo pobatiina. Ohufa huboolaho ni batahyetegeheeye, ni befumbire hu gwʼohwendula buŋinda owohu hyalo huno.
Ebigezo nʼohuhemewa
12 Omuutu agumiikiriza ohwola olu alibita mu huhemewa gesiimire, olwohuba nʼalihena ohugumikiriza, alisuna ehirabo ehyʼobulamu obutaŋwaŋo, obu Hatonda gasuubisa abamwenda. 13 Omuutu nʼagwiranga ebiŋeeriŋeri, atalomanga ati Hatonda njʼamuŋindihiiye ebiŋeeriŋeri olwʼohwenda ohumuhema. Olwohuba Hatonda saaŋanga huhema omuutu yesiyesi era ŋabula aŋanga ohumudulinga oba gamuhema gaahola ehibi. 14 Ohutusaho ti hiisi muutu hu buwe omwene nʼohwegomba huhwe njʼohumuhema hwahena hwamusindigirisa, gaahola ebitoola. 15 Amayiru nʼohwegomba ebi muutu aba ni nabyo bitiina ni bisaala ni byala nga biŋwamo ehibi era ehibi ehyo ni hiŋangala, nga himuleetera ohufa.
16 Olwʼehyo balebe bange abahoda, batabadulinganga. 17 Hiisi hirabo ehiraŋi, era ehibulaho mbalo, hiŋwa mwigulu. Hiiha ni hiŋwa ewa Hatonda omwene hutonda ebi hubona ni byaduhira mwigulu, oyo atacuuhacuuha hyʼehisisigo. 18 Omwene gasalaŋo hu lulwe, atusaale mu bulamu obunyaaha nʼabita mu buhwenda owʼehibono hihye ehituufu, ko hibe ti huŋira ehifo ehidaayi mu bitonde bibye.
Ohuŋulira nʼohuhola ebi Hibono hiroma
19 Olwʼehyo balebe bange abahoda, hiisi muutu abenga mwangu ohuŋulira, aye atabugutananga huloma, era atanguŋirisanga husunguŋala. 20 Olwohuba omuutu anaba nʼasunguŋaaye, saaŋanga huhola ebi Hatonda genda. 21 Olwʼehyo, muleheŋo esambo josijosi ejʼohwehenamo, nʼomwoyo ogwʼegomba ohuhola ebibi ogubitiriiye mu baatu hatyane. Muganye mufugiirire ehibono hya Hatonda ehi baababuulira olwohuba hiri nʼamaani agʼohunoŋola obulamu wenywe.
22 Ehibono ehyo mutahomanga hu huhiŋuliirisa buŋuliirise mwagama aŋo olwohuba aŋo muba mwedulinga wedulinge. Aye muholenga ebi hibono hibaloma ohuhola. 23 Olwohuba omuutu anahoma hu huŋulira buŋulire, aba ali hyʼomuutu agebona mu ndabirwamu. 24 Omuutu oyo aheja mu ndabirwamu gebona olu afaana aye aŋo ni naaŋo nʼaŋwaŋo nga gebirira ngʼolu afaana. 25 Aye omuutu owetegeeresa amagambi ga Hatonda agatufuula ohuba abʼedembe, ndaahoma hu huŋulira buŋulire gebirira ebi aŋuliiye, aye gegumya ohuhola ebi gamuloma, Hatonda anamuŋenga ekabi mubi ahola.
26 Hiisi muutu oweranga ohuba omunadiini, cooka nʼataŋanga huŋuga lulimi lulwe, oyo aba gedulinga hwedulinga, obunadiini buwe buba ŋabula ehi bumugasa. 27 Obunadiini obutuufu era obuŋumaho hamogo mu moni ja Hatonda Seefe, njʼohuba nʼomwoyo ogwʼohubbiita abafuubbi nʼohuyeeda abanamwandu mu bugadi waawe, nʼohwehumanga ndigeyonoona nʼebibi ebi abaatu abandi bahola.