Ⅰ *Zezii ꞌma-a -Lagɔꞌɔ wlu-u ꞌꞌnyɩꞌa nyɔ ꞌꞌkɔgwlɛtinɩɛzɛgɛ, ꞌɔ dɩ -a poꞌo amʋ ꞌꞌbɔgʋ -jeyi. -Da -Lagɔ ꞌka lɩ ꞌwee ti-ya -bɛnyɩ, ɔ -nɩꞌe-e ti see. -Aꞌba ꞌꞌbhiꞌa pɛyri ꞌsɔn ꞌye -ɔꞌo. -A ꞌye-e ꞌɔ -wluna ꞌle -a ꞌye ɔ liꞌtʋ -lrɛɛ. Ⅱ A -gblee, ɔ-bɔ Zezii ꞌꞌnyɩꞌa nyɔ tinɩɛzɛgɛ ꞌmnɛ, ɔ ꞌyi-e ꞌnɔɔ ꞌkmʋ ꞌmʋ, ꞌle -a ꞌye ɔ ꞌye. ꞌBho -aꞌba -tɩta -Lagɔꞌɔ ꞌꞌtroli ɔ -nɩꞌo ꞌle ɔ ꞌye ꞌbho ꞌwlʋ, ɔ ꞌye ꞌnɔɔ ꞌkmʋ ꞌmʋ yi. ꞌƐ kamʋ -a zaꞌa amʋ ꞌɔ dɩ -bodɩ ꞌmʋ ꞌle -a ꞌtmʋʋꞌo amʋ -lrɛɛ -ka ɔ-ɔ ꞌꞌnyɩꞌa nyɔ ꞌꞌkɔgwlɛtinɩɛzɛgɛ. Ⅲ A-a ꞌye-e liꞌa, ɔ-bɔ Zezii -a ꞌyeꞌa li, ꞌɔ wlu -a ꞌwɔnꞌɔ ꞌbɔ, -a ꞌpo-o amʋ ꞌya wlu -jeyi -lrɛɛ, ꞌle, -ka -a -ke -aꞌba -tɩta -Lagɔ -ke ꞌɔ ꞌꞌyu Zezii *Kliisɩ ꞌmnɔ ꞌꞌsisriꞌa ꞌꞌyi, -a -ke abʋ ꞌke ɛ ꞌmʋ-plɛ -lrɛɛ. Ⅳ Ɩ-bɩ dɩ -nɩɩ, -a ꞌpo-o amʋ ꞌya ꞌꞌbɔgʋ -jeyi, ꞌle, ꞌbʋbʋa-a ꞌlbhaꞌa -a -nɩ ꞌwee, ɛ ꞌke -amʋ ꞌmʋ ꞌꞌyi tenyɩ.

Ⅴ -Lagɔꞌɔ ꞌꞌdɩzɩgɩ *Zezii *Kliisɩ -zaꞌa -amʋ -bodɩ ꞌmʋ, -a ꞌwɔnꞌɔ ꞌbɔ, -ɛ -ke dɩ -a -nɩꞌa amʋ wlu -jeyi -ponamʋ, ꞌɩnnɛ ꞌka-a: Ɔ na: -Ka zɔ-ɔ ꞌyeꞌa ti wesaa, ꞌka-a -Lagɔ *ꞌsaaꞌa li, ꞌle ꞌꞌnyinynidɩꞌa -kuyre se ɔ ꞌmʋ -nɩ. Ⅵ A ꞌye li-ɔ, -bho -aꞌba nyɔ nʋ, ɔ -ke -Lagɔ ꞌꞌsisriꞌe-e ꞌꞌyi, ꞌle ɔ ꞌke ꞌꞌnyinynidɩꞌa nʋnʋa ꞌli ti-de a, ꞌɔ nyɔtu-u ꞌcɛ-ɛ sɩn ꞌle ꞌɔ wɔnmʋwlu ꞌmʋ -ke ꞌɔ nʋnʋkpli ꞌmʋ. Ⅶ Ɛ -nɩꞌa -kaa ꞌmʋ a, -ka -Lagɔ ꞌsaaꞌa li, -bho -aꞌba nʋnʋkpli *ꞌsaa -kaa li ꞌbho ꞌɔ ꞌꞌyigbeyi, ꞌꞌlemnɩɩ -ka -a -dieꞌa ꞌmʋ ꞌwee, -a kpʋkpʋnꞌo-o ti, ꞌle, ꞌɔ ꞌꞌyu Zezii ꞌmɛꞌɛ -aꞌba ꞌꞌnyinynidɩꞌa dɩ, -ɔ -ke nymɔ-ɔ ꞌwlaꞌa ti, ɔ-ɔ zetieꞌe -amʋ ꞌle ɩ-bɩ ꞌꞌnyinynidɩ ꞌmnɩ ꞌmʋ.

Ⅷ -Bho -aꞌba nyɔ nʋ, ɔ -se ꞌtɔ-ɔ ꞌꞌnyinynidɩꞌa nʋyi -ko a, ɔ-bɔ nyɔ ꞌmnɔ, -ziadɩ se ꞌle ꞌɔ -pɔlʋ ꞌzɔ -nɩ. Ɔ-ɔ ꞌꞌmaa-a ꞌɔ ꞌꞌbhuo. Ⅸ Ɛ -nɩꞌa -kaa ꞌmʋ a, -bho -a nʋ ꞌꞌnyinynidɩ, ꞌle -a ꞌke ɩ ꞌꞌyiyibo, -a ꞌke ɩ ꞌbho -Lagɔꞌɔ ꞌꞌyigbeyi tide a, ɔ-ɔ ꞌbhɔ-ɔ ꞌya dɩ ꞌle ɔ-ɔ zetieꞌe -amʋ ꞌle ɩ ꞌmʋ. -Ɛkedɩmaa, ɔ ꞌsrɛɛꞌɛ-ɛ ꞌꞌyi ꞌle ɔ -nmɔꞌɔ ꞌꞌyiti nyɔ ꞌke ɔ ꞌꞌgwlide. Ⅹ ꞌLe -aꞌba ꞌꞌklumʋ, -bho nyɔ nʋ ɔ -see ꞌꞌnyinynidɩ nʋ a, ɔ-bɔ nyɔ ꞌmnɔ-ɔ ꞌꞌluo-o -Lagɔ ꞌmʋ -ka sɩncɛyi, ꞌle -Lagɔꞌɔ wlu -lue ꞌtɩn se ɔ ꞌmʋ -nɩ.