Këyítfii fukanakfii Pool bín Ɓu-teeraa
Tesaloníkɗa
Woꞌeencii lëgís Këyítfiiɗa
Këyítfii fii fërí en fukanakfii Pool bín kerceencaa ga teeraa Tesaloníkɗa. Ya woꞌisɓa ga loo kitúkíꞌkaa ëldúna daa ka ƴah kimanɗa, kihayiskaa Kiristaanii na daa ɓuwaa gëm gari ƴah kimëeñjohɗa.
Ɓiyewin ga ɓu-teeraa woꞌee an Kiristaanii hayin kumëeñíꞌ (2: 2); ɓíinoo woꞌee an iñaama laakkii duum, wayee besaa ka laakohanɗa deeyin. Ɓuwaama woꞌee an besaa deeyinɗa sagussa kilëgëy: ɓa woꞌee an calooɓa kilëgëy. Fodaama ɓa tëekíni lookcaagaɓa ga ɓuwaa tookin kilëgëyɗa (3: 6-12). Iñaama tah Pool bínndaɓa kiwoꞌɓa an ɓaa en ɓéeɓ jomin kiꞌanaŋ, ya ñëmíꞌ hafci. Ya woꞌꞌaɓa an saycaa ɓa hídoh na coonu tóoh, ɓa abat ngëmaagaɓa bi yëgís ee ɓa dëkat rek ga kitum yijófí’.
Këyítfii fukanakfii Pool bín ɓu-Tesaloníkɗa tíidoh anee:
1 - Këñɗoh (1: 1-2)
2 - Pool gërëmmba Kooh ga ɓu-Tesaloník (1: 3-12)
3 - Iñcii ɗëwírukan kihayiskaa Haꞌmudiiɗa (2: 1-12)
4 - Pool ɓëytoh kiyëgís ga ngëm (2: 13-17)
5 - Pool nakoh kikíim Kooh na kitook kilëgëy (3: 1-15)
6 - Taŋkoh (3: 16-18)
1
Këñɗoh
1 Mi Pool, mi yërí bínndúu këyítfii fii, mi na Sílaas* 1: 1 Teekaa Sílaas ga kiLateŋ woꞌsi Sílwanus ee wërí erohu dii. na Tímotée. Ɗí ɓii këñíꞌtúu, ɗú ɓu-jaangii ga teerii Tesaloník ee bok kiꞌen wíinoo ga Kooh Paamudiigaruu na ɓan ga Yéesu Kiristaa, Haꞌmudii. 2 Kooh Paamudii na Yéesu Kiristaa, Haꞌmudii barkeelattúu, ɓa onndúu jam.
Pool gërëmmba Kooh ga ɓu-Tesaloník
3 Mbokcii, ɗí mínan Kooh kigërëm garúu besaa en ɓéeɓ, ee júwin ɗí tum iñaama, ndaga ngëmiigarúu wii wëñ kiyëgís ee kiwaarohkii ɓaa en ɓéeɓ garúu laak ga mooroomciɗa kii wëñ kiɓaatuk garúu ɓéeɓpúu. 4 Ee ɓan, ɗí safarin kiwoꞌ loorúu ga jaangucii Kooh ndaga ɗú ɓii guuꞌguuluk ee ɗú yëgísin ga ngëmiigarúu, hídaa ga dii ɗú hatalu ga kipes na mesiklaatcii ɗú en na kidaƴ tóohɗa. 5 Iñaama teewohin an attiꞌaa Kooh júwin ee wërí teewohan ɓan an Nguurii Kooh tahhúu kisonɗa, joommbiirúu. 6 En kiꞌenaa, júwin ga Kooh ya ík ɓuwii sodallúu watiɗa coonucii ɓa tíkkúuɗa, 7 ee ɗú ɓii ɗú daƴcaɗa, ya onndúu kiꞌíikaruk, ɗú naríi. Iñaama hay kilaak bëríinaa Yéesu, Haꞌmudii hotukan ga asamaan, taam na malaakacaagari ɓilëekíꞌ-dooliɓaa, 8 ga ɗuuƴ kiwii kiyëeñíꞌ, kiꞌatti ɓuwii ínohsoo Kooh ee sagu kitaabuk Hewhewii winéwíꞌwii woꞌ ga loo Yéesu, Haꞌmudiigaruuɗa. 9 Ɓuwaama, fayaagaɓa ƴah kisaŋkuꞌɓa bi taaꞌ, ɓa gúrohu na Haꞌmudii, ɓa gúrohu na doolaagari onɓa kibok ga ndamaa ya laakɗa. 10 Iñaama hay kilaak ga besaama ya ƴah kihayisɗa. Bëríinaa, ɓuwii enu ɓuuciɗa hayyi kiꞌeru ndam, ee ɓéeɓ ɓuwii gëm gariɗa hay gari kiwaaruꞌ. Ɗú ɓan, ɗú bok ga ɓuwaama ndaga ɗú gëmin woꞌeeniigari ɗí yéegalohɗa.
11 Kërí tah, ɗí dëk kikíimiꞌtúu Kooh, doonaa Koohyiigaruu tummbúu ɓuwaa ɓëytohiigari naɓa joommbiiɓa, ee ya amɗohhúu ga doolaagari doonaa ɗú mëtíꞌ ɓéeɓ iñcii cijófíꞌcii ɗú waari kitumɗa na cii ɗú en na kitum meyoh ga ngëmiigarúuɗa.
12 Ɗí ɓii kíim iñaama doonaa ɓéeɓ ɓuwii eꞌ teekii Yéesu, Haꞌmudiigaruu ndam, kooroh garúu, ee Kooh eꞌtúu ndam kooroh gari. Iñaama hay kilaak ndaga Koohyiigaruu na Yéesu Kiristaa, Haꞌmudii barkeelinndúu.
*1:1 1: 1 Teekaa Sílaas ga kiLateŋ woꞌsi Sílwanus ee wërí erohu dii.