45
God Use Cyrus
1 Dis na wetin God tell Cyrus wey E choose,
wey go use en rite hand distroy nashons,
remove kings from pawa
kon open gates so dat dem
nor go klose am again:
2 “I go-go for yor front kon make hills and mountins smooth.
I go break bronze gates kon skata dia iron protetor.
3 I go give yu betta tins
wey dem hide for dark and sekret place.
Den yu go know sey, na mi bi God!
Israel pipol God, wey koll yor name.
4 I koll yu bikos of Jakob shidren-shidren
wey bi my savant
and Israel pipol wey I don choose.
I don give una great honor,
even doh una nor know mi well.
5 Na mi bi God, no oda god dey wey bi like mi.
I give una pawa, even doh una nor know mi well.
6 I do dis tins make evribody for di world,
from one end go rish di oda,
know sey na mi bi God
and e nor get anoda god wey bi like mi.
7 Na mi kreate both lite and darkness;
di Pesin wey dey bring blessing
and wahala and na mi wey bi God,
dey do all dis tins.
8 I go send viktory kom from di sky like rain,
so make di eart open and receive am;
so dat salvashon and korrect judgement,
go grow.
Mi, wey bi God,
go make dis tins happen.”
Warnin
9 E nor go betta for di pesin wey dey argue with di Pesin wey kreate am!
Pesin wey bi like ordinary pot
for where oda pots dey for groun.
Klay fit tell who dey use am sey,
“Wetin yu dey do?”
Abi di pot wey yu dey make fit sey,
“Yu nor know work at-all?”
10 E nor go betta for pikin
wey ask en papa and mama sey,
“Wetin una tink sey una born so?”
11 Di Oga wey bi Israel pipol God wey dey holy;
di Pesin wey dey make awa future betta, don sey,
“Yu nor get rite to kweshon mi about my shidren
or tell mi wetin I go do!
12 Na mi bi di Pesin wey kreate di eart
and na mi kreate di pipol wey dey stay inside.
Na my pawa I take stresh di heavens out
kon kontrol di sun, moon and di stars.
13 I go make Cyrus take akshon,
I go make all en road strait.
E go ribuild my town kon free my pipol
wey dem karry go anoda land
and nobody go pay or bribe am.”
Dis na wetin God tok.
14 God tell Israel pipol sey,
“Egypt, Sudan and doz tall pipol for Seba
with evritin wey dem get,
go bi una own.
Dem go waka follow una with shains for dia leg;
bow for una kon beg dey sey,
‘True-true, God dey with una
and e nor get anybody wey bi like am.
Yes! E nor get any oda god.’ ”
15 True-true, na Yu bi Israel God and Savior
and Yu bi God wey nor dey show yorsef.
16 Pipol wey dey make juju,
go shame and disgrace go follow dem.
All of dem go waka go with disgrace.
17 But God go save Israel
and dia viktory go bi forever.
Nobody go ever disgrace God pipol again.
18 God wey kreate di heavens and di eart sey,
na-im still bi God!
Na mi kreate di eart well and I nor kreate am to dey empty,
but na for pipol to stay.
E sey, “Na mi bi God
and e nor get anoda one.
19 I nor dey tok for sekret
or for di dark place for di eart.
I neva ever sey,
‘Jakob shidren just dey follow mi for nor-tin.’
Mi wey bi God dey tok di trut.
Yes! I dey tok wetin dey rite.”
20 God sey,
“Una wey survive for di nashons,
make una gada kom!
Pipol wey dey waka for evriwhere
with di wood juju wey dem dey serve
kon dey pray give oda gods wey nor fit save dem,
nor know anytin at-all!
21 So make una kom tok una kase;
make una judge for unasef!
Who don fit tok sometin and e happen?
Nor bi mi bi God wey dey save pipol?
No oda god dey apart from mi wey bi God
and wey dey save una.
22 Make evribody for di world turn
kom meet mi naw and una go dey save,
bikos na mi bi di only God wey dey.
23 Wetin I promise una,
na true and nobody go fit shange am.
Evribody go kom knee down for my front
den promise sey dem go respet and obey mi.
24 Dem go sey, ‘Yes! Na only God get pawa to save pipol
and anybody wey hate am,
na disgrace go follow dem.’
25 Dem go bless and praiz Israel pipol,
bikos of di Oga awa God.”