1 دٛولٜ کٛو مٛيٜ تٛکَّ لَامٛتٛوٻٜ، نغَمْ وَلَا غٛطُّمْ لَامُ لَامٛتٛوطُمْ سٜيْ تٛ اَللَّه جَٻِي؞ فُو اَرْدِيٻٜ ٻٜ نغٛودُطٜنْ، اَللَّه رٜسِٻٜ دٛوْ لَامُ طُمْ؞ 2 نغَمْ نٛنْ، کٛو مٛيٜ غَݧُطٛ لَامُ وَݧِي کٛ اَللَّه وَطِ؞ کٛو مٛيٜ غَطُطٛ نٛنْ فٛوطَنَيْ حٛورٜ مُوطُمْ کِيتَ اَللَّه؞ 3 لَامٛتٛوٻٜ لَمْنَا نَاع نغَمْ ٻٜ کُلْنَ غَطٛوٻٜ کٛ وٛوطِ، اَمَّا نغَمْ ٻٜ کُلْنَ غَطٛوٻٜ کٛ حَلِّ؞ اَ يِطِ اَلَا حُلُکِ نٜطّٛ لَامٛتٛوطٛ؟ تٛو، سٜيْ نغَطَا کٛ حَانِ، کَنْکٛ بٛو اٛ مَنْتٜتٜ، 4 نغَمْ کَنْکٛ اٛ مَشُّطٛ اَللَّه کُوٛووٛ نغَمْ ٻٜيْدَارِ مَاطَ؞ اَمَّا تَا وَطِي کٛ وٛوطَا، حُلُ، نغَمْ نَاع اٜ مٜىٰرٜ اٛ جٛغِي بَوْطٜ مَاکٛ؞ اٛ مَشُّطٛ اَللَّه نغَمْ اٛ تَپَنَ غَطٛوٻٜ کٛ وٛوطَا کِيتَ؞ 5 نغَمْ نٛنْ، دٛولٜ تٛکَّا لَامُ نَاع نغَمْ دَطُکِ مٛنّٜرٜ اَللَّه تَنْ، اَمَّا نغَمْ اَ اَنْدِ اٜ حَانِ تٛکَّاطُمْ؞

6 کَنْجُمْ وَطِ اٛنْ نجٛٻَ شٜىٰدٜ لٜيْدِ کَدِنْ، نغَمْ لَامٛتٛوٻٜ ٻٜ مَشُّٻٜ اَللَّه کٛکُّٻٜ شَرٜلْ مَٻّٜ فُو نغَمْ لَامَاکِ؞ 7 نجٛٻٜىٰ کٛو مٛيٜ ݧَمَاندٜ ندٜ تٛکَّتَعٛنْ، تٛکّٛوٻٜعٛنْ ݧَمَاندٜ شٜىٰدٜ لٜيْدِ، نجٛٻٜىٰٻٜ؞ کٛکّٜىٰ مَنْغُ حَانُٻٜ کٛکّٛنْ مَنْغُ؞

8 تٛ غٛطّٛ حٛکِّيعٛنْ ݧَمَاندٜ، نجٛٻٜىٰمٛ؞ ݧَمَاندٜ ندٜ اٛنْ مبَاوَتَا يٛٻُدُکِ ندٜ وَرْتَ يِطِندِرْکِ؞ نغَمْ کٛو مٛيٜ غِطّٛ بَنْدِرَاوٛ مُوطُمْ حٜبِّنِي کٛ اَتَّوْرَ وِعِ؞ 9 رَا غٛطِّ دٛوکَاجِ اَللَّه، ‏«‏تَاع وَطُ نجٜىٰنُ، تَاع وَطُ وَرْحٛورٜ، تَاع وُجُّ، تَاع يِطُ کٛ غٛطّٛ جٜيِ؞»‏ طِعِ دٛوکَاجِ اٜ فُو کٛرِيطِ طِ کَوْتَامَ دٛوْ وٛلْدٜ بِيندٜ، ‏«‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏ 10 تَا يِطِ بَنْدِرَاوٛ مَاطَ، اَ وَطَنْتَامٛ کٛ حَلِّ؞ نغَمْ مَاجُمْ، يِدّٜ وٛنِ کٛ حٜبِّنِ کٛ دٛوکَ اَللَّه يِطِ؞

11 نغَطٜىٰ طُعُمْ، نغَمْ اٛنْ اَنْدِ اِرِ جَامَنُ طُمْ نغٛنْطٜنْ ندٜرْ؞ شَرٜلْ وَطِي نغٜلْ اُمّٛتٛوطٛنْ دَغَ طٜيْنغٛلْ؞ نغَمْ ݧَلْندٜ ندٜ اَللَّه حِسْنَتَعٜنْ اٜ ٻٜيْدَ ٻَدّٛيَاکِ کٛو ندٜيٜ ݧَلْندٜ دَغَ ݧَلْندٜ ندٜ کٛولِيطٜنْ يٜىٰسُ؞ 12 جٛونِ طُمْ جٜمَّ، سُبَکَ ٻَدَکٜ؞ نغَمْ نٛنْ، اٜنْ اَلُ حُوُکِ کُوطٜ ݧِوْرٜ، اٜنْ نغَطُ جٛنْدٜ مٜىٰطٜنْ ندٜرْ جَيْنغٛلْ؞ 13 اٜنْ نغَطُ جٛنْدٜ مٜىٰطٜنْ نٛ حَانِ بٛ يِمْٻٜ جٛوطٛتٛوٻٜ ندٜرْ جَيْنغٛلْ؞ تٛع اٜنْ نجَرُ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، تٛع اٜنْ نغَطُ نجٜىٰنُ، تٛع اٜنْ نغَطُ حَلّٜىٰندٜ، تٛع اٜنْ کَٻْدُ اٜ يِمْٻٜ کٛو نَنٜنْ لَوْلِيرُ مَٻّٜ؞ 14 اَمَّا، نغِکُّ مٛوطٛنْ وَرْتَ اِرِ نغِکُّ يٜىٰسُ اَلْمَسِيحُ جٛومِرَاوٛ، ندٜنْ تٛع اٛنْ نغَطُ حَکِّيلٛ مٛوطٛنْ دٛوْ نٛ مبٜلْنَنْتٛنْ سُونٛوجِ ٻَلِّ مٛوطٛنْ؞