12
मिसा व अजिङ्गर
1 अनंलि स्वर्गय् तसकं तःधंगु छगू चिं खने दत। अन सूर्ययागु वसः पुना तःम्ह, तिमिलाया च्वय् तुति तया तःम्ह, झिंनिगः नगुयागु श्रीपेच पुया तःम्ह छम्ह मिसायात जिं खना। 2 व मिसा प्वाथय् दुम्ह जूगुलिं मचा बुइगु ब्यथा सह याये मफयाः तसकं हाला च्वंगु खः।
3 हानं मेगु छगू चिं स्वर्गय् खने दत। छम्ह तसकं ग्यानापुसे च्वंम्ह, ह्याउँसे च्वंम्ह, न्हय्गः छ्यं, झिपु नेकू व न्हय्गः छेनय् श्रीपेच दुम्ह अजिङ्गरयात खना।* १२:३ दान ७:७ 4 वयागु न्हिप्यनं आकाशय् स्वब्वय् छब्व नगुयात बँ पुइ थें पुयाः पृथ्वीइ कुर्का हल। व अजिङ्गर बुइत्यंम्ह मचायात नयेत प्वाथय् दुम्ह मिसाया न्ह्यःने पिवाः च्वनाच्वन।* १२:४ दान ८:१०
5 अले व मिसां जात जातियापिन्त नँयागु दण्डीं राज्य याइम्ह छम्ह मिजं मचायात बुइकल। व मिसां बुइकूम्ह मचा परमेश्वर च्वनादीथाय् वय्कःयागु सिंहासन दुथाय् बिसिके यंकल।* १२:५ यशै ६६:७; भज २:९ 6 अले व मिसा मरुभूमिइ परमेश्वरं दय्का तयादीगु थासय् बिस्युं वन। अन हे व मिसायात द्वःछि व निसः व खुइन्हु तक लहिना तयादिल।
7 अनं लिपा स्वर्गय् लडाइँ जुल। मिखाएल धाःम्ह स्वर्गदूत व वया दूतत, अजिङ्गर व वया दूतत नाप ल्वात।* १२:७ दान १०:१३,२१; १२:१; यहू ९ 8 अजिङ्गर व वया दूतत बूगुलिं इमित स्वर्गय् च्वनेगु थाये मन्त। 9 अले व तसकं ग्यानापुसे च्वंम्ह अजिङ्गरयात क्वय् क्वफाना हल। फुक्क संसारय् च्वंपिन्त थगय् याइम्ह पुलांम्ह सर्प व हे खः। वयात दुष्ट व शैतान धकाः नं धाः। वयात व वया दूततय्त पृथ्वीइ वांछ्वया हल।* १२:९ उत ३:१; लूक १०:१८
10 अले स्वर्ग पाखें थथे धया हःगु छगू तस्सःगु सः जिं ताया --
“आः परमेश्वरं झीत
उद्धार यानादी।
परमेश्वरं अधिकार क्यनाः
ख्रीष्टयात राज्य याकादिल।
चा न्हिं झी परमेश्वरया न्ह्यःने
झी दाजुकिजापिनिगु
विरोध यानाः
दोष बीत स्वइम्हय्सित
क्वफाना हये धुंकल।* १२:१० अयू १:९-११; जक ३:१
11 भ्याःचायागु हिं व इमिसं
न्यंकूगु वचनं यानाः
इमिसं वयात बुका बिल।
इपिं सीत तकं लिमच्यू।
12 उकिं स्वर्ग व स्वर्गय् च्वंपिं
फुक्कं लय्ताः।
अय्नं पृथ्वी व समुद्रयात
धिक्कार, छाय्धाःसा
तसकं तं पिकयाः
शैतान छिमिथाय् वःगु दु।
वयागु ई अप्वः मन्त धकाः
स्यूगुलिं वं थथे याःगु खः।”
13 थथे पृथ्वीइ वांछ्वया हःगुलिं अजिङ्गरं मचा बुइकूम्ह मिसायात लिना जुल। 14 उकिं मरुभूमिइ बिस्युं वनेत व मिसायात तसकं तःधिकम्ह इमायागु निपा पपू छुना बिल। अन हे व मिसायात स्वदँ व खुला लहिना तल।* १२:१४ दान ७:२५; १२:७
15 व मिसायात चुइके छ्वयेत व अजिङ्गरं थःगु म्हुतुं खुसि थें लः पिकाल। 16 पृथ्वीं व मिसायात बचय् यायेत थःगु म्हुतु चाय्काः अजिङ्गरं पिकाःगु लः फुक्क त्वनाछ्वत। 17 अले व मिसा खनाः झन तसकं तंम्वल। उकिं वया सन्तान, परमेश्वरयागु आज्ञा मानय् याना च्वंपिं व येशूयागु वचन सत्य खः धकाः धाइपिं नाप ल्वायेत अजिङ्गर वन।
18 अले व समुद्रयागु सिथय् दनाच्वन।