1 “धात्‍थेंयागु दाखमा जि हे खः, अले दाखमायात स्‍वइम्‍ह जिमि बाः खः। 2 जिके च्‍वंगु दाख मसःगु कचायात बाःनं धेना छ्वइ। अले सयाच्‍वंगु कचायात अझ यक्‍व सयेमा धकाः न्‍हायादी। 3 जिगु वचनं यानाः छिपिं न्‍हापा हे शुद्ध जुइ धुंकल। 4 छिपिं जिके च्‍वना च्‍वँ, जि नं छिमिके च्‍वने। गथे कचां दाखमाय्‌ मच्‍वंकं दाख सय्‌के फइ मखु, अथे हे छिपिं नं जिके च्‍वना मच्‍वंसा फल सय्‌के फइ मखु।

5 “जि दाखमा खः, अले छिपिं दाखमाय्‌ च्‍वंगु कचा खः। सु जिके च्‍वनाच्‍वनि, अले जि वयाके च्‍वने, वं हे जक यक्‍व दाख सय्‌की। जिलिसे तापानाः छिमिसं छुं नं याये फइ मखु। 6 जिके मच्‍वनिम्‍ह मनूयात त्वधूगु कचायात थें वांछ्‌वइ, अले व गना वनी। वयात मुंकाः मिइ तयाः च्‍याका छ्वइ। 7 छिपिं जिके च्‍वनाच्‍वन धाःसा व जिगु वचनयात नुगलय्‌ तया तल धाःसा छिमिसं न्‍ह्यागु फ्‍वंसां छिमित बी। 8 छिमिसं यक्‍व फल सय्‌कल धाःसा उकिं हे जिमि बाः तःधनी। अले छिपिं जिमि चेलात जुइ।

9 “जितः जिमि बाःनं माया यानादी थें तुं जिं नं छिमित माया यानागु दु, उकिं छिमिसं नं जिं थें माया यायेगु त्‍वःते मते। 10 जिगु आज्ञा मानय्‌ याःसा छिपिं जिगु मायाय्‌ च्‍वनाच्‍वंनी, गथे जिं नं बाःयागु आज्ञा मानय्‌ यानाः वय्‌कःयागु मायाय्‌ च्‍वनाच्‍वना। 11 जिगु आनन्‍द छिमिके दयेमा, अले थ्‍व आनन्‍द यक्‍व दयावनेमा धकाः हे जिं थ्‍व खँ छिमित धयागु खः।

12 “गथे जिं छिमित माया याना, अथे हे छिमिसं नं थः थवय्‌ माया याना च्‍वँ। थ्‍व हे जिगु आज्ञा खः।* १५:१२ यूह १३:३४; १५:१७; १ यूह ३:२३; २ यूह ५ 13 पासायागु निंतिं सीगु ति तःधंगु माया मेगु मदु। 14 जिगु आज्ञा मानय्‌ याःसा छिपिं धात्‍थें हे जिमि पासापिं खत। 15 आवंनिसें जिं छिमित दास धकाः धाये मखुत, छाय्‌धाःसा मालिकं याःगु ज्‍याखँ दासं सी मखु। जिं छिमित जिमि पासापिं धकाः धयागुलिं बाःनं जितः धयादिक्‍व खँ जिं छिमित धयागु दु। 16 छिमिसं जितः ल्‍यःगु मखु, बरु जिं छिमित ल्‍ययागु खः, उकिं थाय्‌ थासय्‌ वनाः छिमिसं फल सय्‌कि। छिमिगु फल सदां सयाच्‍वनेमा धकाः जिं छिमित ल्‍ययाः छ्वयागु खः। अले छिमिसं जिगु नामं बाःयाके न्‍ह्यागु फ्‍वंसां छिमित बियादी। 17 छिमिसं थःथवय्‌ माया याना च्‍वँ -- थ्‍व हे जिगु आज्ञा खः।”

18 “संसारं छिमित हेला याइ, छिमित स्‍वयाः न्‍हापालाक जितः हेला याःगु खः धकाः सीकि। 19 छिपिं संसारयापिं मनूत जूगु जूसा संसारं छिमित थःपिं धकाः माया याइगु, तर जिं छिमित संसारं ल्‍यये धुनागुलिं छिपिं संसारयापिं मखुत, उकिं इमिसं छिमित यय्‌की मखु। 20 ‘मालिक स्‍वयाः दास तःधं जुइ मखु’ धकाः जिं नकतिनि धयागु खँ लुमंकि। जितः हेलायानाः इमिसं दुःख बिल धाःसा छिमित नं दुःख बी। जिगु खँ इमिसं न्‍यन धाःसा छिमिगु खँ नं इमिसं न्‍यनी।* १५:२० मत्ती १०:२४; लूक ६:४०; यूह १३:१६ 21 थुकथं जिगु नामं इमिसं छिमित सास्‍ति याइ। जितः छ्वया हःम्‍हय्‌सित म्‍हमस्‍यूगुलिं इमिसं थथे याना जूगु खः। 22 जि वयाः जिं इमित फुक्‍कं मकंगु जूसा इमित पाप लाइ मखुगु। तर आः धाःसा इमिगु पाप त्‍वपुइगु लँ हे मन्‍त। 23 सुनां जितः हेला याइ वं जिमि बाःयात नं हेला याइ। 24 सुनानं मयाःगु ज्‍या जिं इमिगु न्‍ह्यःने यानाः मक्‍यंगु जूसा इमित पाप लाइ मखुगु। तर इमिसं थ्‍व अजूचायापुगु ज्‍या स्‍वयाः नं जितः व जिमि बाःयात नं हेला यात। 25 व्‍यवस्‍थाय्‌ थथे च्‍वयातःगु खँ पूवंकेत हे थथे जूगु खः -- ‘छुं म्‍वाय्‌क हे इमिसं जितः हेला यात।’ * १५:२५ भज ३५:१९; ६९:४

26 “जिं छिमिथाय्‌ बाःया पाखें ग्‍वाहालि याइम्‍ह सत्‍य आत्‍मायात छ्वया हये। वय्‌कलं हे छिमित जिगु साक्षी बी। 27 छिपिं न्‍हापांनिसें हे जि लिसे दुगुलिं छिमिसं नं जिगु साक्षी बी।”