1 “छं इस्राएलीतय्‌ दथुं छिमि दाजु हारुन व वया काय्‌पिं नादाब, अबीहू, एलाजार व ईतामारयात जिगु निंतिं पुजाहारीया ज्‍या यायेत थःथाय्‌ हजि। * 28:1-14 प्रस ३९:१-७ 2 छं छिमि दाजु हारुनया निंतिं पवित्रगु वसः दय्‌कि। उकिं वयात इज्‍जत बी अले बांलाकी। 3 जिं बुद्धि बियातयापिं थज्‍याःगु ज्‍या याये फुपिं फुक्‍कसित सःती। इमित हारुनया निंतिं वसः सुइत उजं ब्‍यु। अले हारुनं पुजाहारी अभिषेक जुयाः जिगु सेवा याइ। 4 इमिसं सुइमाःगु वसः थथे दु - छातिपाता, एपोद, पुजाहारीया लं, जामालं, बेतालि व जँनी। इमिसं छिमि दाजु हारुन व वया काय्‌पिन्‍सं पुजाहारीया ज्‍या यायेगु निंतिं थुकथं पवित्र वसःत दय्‌केमाः। 5 इमिसं वँचुगु, प्‍याजीगु, ह्याउँगु रंगयागु व लुँयागु का, अले भिंगु सुति कापः छ्यलेमाः।

6 “इमिसं एपोद वँचुगु, प्‍याजीगु व ह्याउँगु रंगयागु का, लुँयागु का व भिंगु सुति कापःयागु स्‍यल्‍लाक सुइमाः। 7 अले थ्‍वयात कत्ताकातयेत निखेंया ब्‍वहलय्‌ निगू ब्‍वहःकुचा स्‍वानातःगु जुइमाः। 8 एपोदया द्यःने वँचुगु, प्‍याजीगु व ह्‍याउँगु कां व लुँयागु कां हे बांलाक थानातःगु भिंगु सुति कापःयागु जँनी दयेमाः।

9 “छं निकू आनिक्‍स कयाः उकी इस्राएलया काय्‌पिनिगु नां क्‍यु। 10 जन्‍मदिं कथं इपिं मध्‍ये खुम्‍हय्‌सिगु नां छगः ल्‍वहंचाय्‌ व मेपिं खुम्‍हय्‌सिगु नां मेगु ल्‍वहंचाय्‌ क्‍यु। 11 ल्‍वहंकःमिं ल्‍वहँतय्‌ कतां कियेगु ज्‍या याइगु थें हे निकू ल्‍वहँतय्‌ नं इस्राएलया काय्‌पिनिगु नां क्‍यु। अले उकियात लुँयागु फाकुनय्‌ थुनाः ब्‍यु। 12 इस्राएलया झिंनिगू कुलया लुमन्‍ति कथं हारुनं थ्‍व निकुतिं ल्‍वहंयात ब्‍वहलय्‌ तयाब्‍यु। थुकथं वं पवित्र पालय्‌ वनीबलय्‌ इमिगु नां घानावनी। उकिं जि परमप्रभुं थः मनूतय्‌त न्‍ह्‍याबलें लुमंकी। 13 छं लुँयागु फाकुं दय्‌कि। 14 अले लुँयागु निलातःगु निपु सिखः दय्‌कि। थ्‍व सिखःयात फाकुनय्‌ स्‍वानाब्‍यु।

15 “न्‍याय यायेत दकलय्‌ तःधंम्‍ह पुजाहारीया निंतिं स्‍यल्‍लाःगु छातिपाता दय्‌कि। थ्‍व छातिपाता एपोद थें हे लुँयागु, वँचुगु, प्‍याजीगु व ह्याउँगु भिंगु सुति कापःयागु जुइमाः।* 28:15-30 प्रस ३९:८-२१ 16 थ्‍व प्‍यकुंलाःगु व निबः यानाः लथ्‍यानातःगु जुइमाः। अले थुकिया हाकः व ब्‍या क्‍वलाछि क्‍वलाछि दयेमाः। 17 थुकि प्‍यझ्‍वः यानाः थी थी मणि थुनाब्‍यु। न्‍हापांगु झ्‍वलय्‌ मानिक, पुस्‍पराज व फिरोजा, 18 निगूगु झ्‍वलय्‌ प्‍याजी रंगयागु मणि, नीलम व पन्‍ना, 19 स्‍वंगूगु झ्‍वलय्‌ कार्नेलेन, अकिक व प्‍याजी रंगयागु मणि। 20 प्‍यंगूगु झ्‍वलय्‌ गोमेद, कार्नेलेन व जास्‍पर दयेमाः। थ्‍व फुक्‍कयात लुँयागु फाकुनय्‌ थुनेमाः। 21 इस्राएलया झिंनिम्‍ह काय्‌पिनिगु नां कथं झिंनिगः मणिया थी दयेमाः। झिंनिगलय्‌ हे झिंनिगू कुलयागु नां कियातयेमाः।

22 “छातिपातायात एपोदय्‌ घायेत भिंगु लुँयागु निलातःगु सिखः दय्‌कि। 23 अले लुँयागु निचाः चाः दय्‌काः उकियात छातिपाताया निखेंया कुनय्‌ सुयाब्‍यु। 24 लुँयागु निपुं सिखःयात छातिपाताय्‌ च्‍वंगु निचालं लुँचालय्‌ चिनाब्‍यु। 25 लुँयागु सिखःया मेगु च्‍वःयात एपोदया ब्‍वहलय्‌ न्‍ह्‍यःने च्‍वंगु लुँयागु फाकुनय्‌ चिनाब्‍यु। 26 लुँयागु मेगु निचाः चाः दय्‌काः छातिपाताया ल्‍यूनेया च्‍वःपाखे एपोदया जँनी नापसं उकियात सुयाब्‍यु। 27 हानं मेगु निचाः लुँयागु चाः दय्‌काः जँनी चिनातःगु गथिया च्‍वसं सुयाब्‍यु। 28 छातिपाताया चाः व एपोदया चाःयात वँचुगु पुतुं चिनाः जनीनापं स्‍वानाब्‍यु। थुकिं यानाः छातिपाता एपोदय्‌ थुखे उखे सनी मखु।

29 “हारुन पवित्र पालय् दुहां वनीबलय्‌ परमेश्वरं सदां लुमंकेमा धकाः वं इस्राएलया काय्‌पिनिगु नां कियातःगु न्‍यायया छातिपाता नुगःया च्‍वय्‌ घानाः वनेमा। 30 न्‍यायया छातिपाताय्‌ ‘ऊरीम’ व ‘तुम्‍मीम’ ति। थुकिं हारुन परमप्रभुया न्‍ह्यःने वनीबलय्‌ उपिं न्‍ह्याबलें वयाके दयाच्‍वनेमा। थुकथं परमप्रभुया न्‍ह्यःने वनीबलय्‌ हारुनं थःगु नुगःया च्‍वय्‌ न्‍ह्याबलें इस्राएलीतय्‌गु न्‍याय यायेगु ज्‍याभः घानावनी।* 28:30 गन्‍ती २७:२१; व्‍य ३३:८; एज्र २:६३; नहे ७:६५

31 “एपोदया दुने फीगु पुजाहारीया लं ब्‍याक्‍क वँचुगु कापःयागु सु।* 28:31-43 प्रस ३९:२२-३१ 32 दथुइलाक छ्यं दुछ्वयेत प्‍वाः दयेमाः अले मगुइमा धकाः गःतांया छचाःखेरं कापः सुयातयेमा। 33 पुजाहारीया लं सिथय्‌ छचाखेरं वँचुगु, प्‍याजी व ह्याउँगु कां धालेग्‍वः सुयाः घायेमाः, उकियागु दथुइ दथुइ लुँयागु गं नं घायेमाः। 34 लुँयागु गं व धालेग्‍वःयात छगः छगः याना पुजाहारीया लं सिथय्‌ छचाखेरं अतः गाय्‌काः घायेमाः। 35 हारुनं पवित्र पालय्‌ परमप्रभुया सेवा यावनीबलय्‌ थ्‍व लं फिमाः। अले दुहां पिहां जुइबलय्‌ थुकी घानातःगु गंया सः ताये दये मा। थुकिं हारुन मसीनि धकाः सीदइ।

36 “छं भिंगु लुँयागु बाला छगू दय्‌काः उकी ‘परमप्रभुया निंतिं पवित्र’ धकाः क्‍यु। 37 थुकियात वँचुगु कां बेतालिइ च्‍यु। थ्‍व बेतालिया न्‍ह्यःने लायेमाः। 38 थ्‍व हारुनया कपालय्‌ दयेमाः। अले इस्राएलीतय्‌सं छाःगु फुक्‍क देछा परमप्रभुं फयाः कयादी। छुं जुयाः थुमिके दोष दत धाःसा फुक्‍क दोष हारुनं फयेमा। इपिं परमप्रभुया न्‍ह्यःने नाले बहःगु जुइमा धकाः व न्‍ह्याबलें वया कपालय्‌ दयाच्‍वनी।

39 “जामालं भिंगु सुति कापःयागु सु। अले बेतालि नं भिंगु सुति कापःयागु हे सु। जँनी नं बुत्ता थानातःगु भिंगु सुति कापःयागु दय्‌कि।

40 “छं हारुनया काय्‌पिनिगु निंतिं जामालं, बेतालि व जँनी दय्‌कि। उकिं इमित इज्‍जत बी अले बांलाकी। 41 छं थ्‍व वसः थः दाजु हारुन व वया काय्‌पिन्‍त फिकाः इमित अभिषेक या। इमित पवित्र या। थथे इमित पलिस्‍था याये धुंकाः इमिसं पुजाहारी जुयाः जिगु सेवा याये फइ।

42 “छं इमिगु म्‍ह त्‍वपुयेत सुति कापःयागु दुने न्‍ह्यायेगु बागः सुर्वाः सु। थ्‍व जँनिसें खम्‍पातक वयेमाः। 43 हारुन व वया काय्‌पिन्‍सं नापलायेगु पालय्‌ दुहां वनेबलय्‌ व वेदीया न्‍ह्यःने सेवा यायेत वनेबलय्‌ थ्‍व वसः फिनावनेमा। थुकथं इपिं दोषी ठहरे मजुइमा अले मसीमा।”

“थ्‍व हारुन व वया सन्‍तानयात नं न्‍ह्याबलेंया निंतिं नियम जुल।”