118
1 ¡Le güe lá'ana Xránadxu Dios lawe' da naque̱' xrlátaje,
ne lawe' da chadía chacanna dxexache lazre̱' dxi'u!
2 Dxal-la' xelenná benne' Israel ca':
¡Chadía chacanna dxexache lazre̱' dxi'u!
3 Dxal-la' xelenná zri'ine zre sua Aarón:
¡Chadía chacanna dxexache lazre̱' dxi'u!
4 Dxal-la' xelenná benne' ca' dxelezrebe̱' Xránadxu Dios:
¡Chadía chacanna dxexache lazre̱' dxi'u!
5 Gate na' guzúa' lu da ste̱be bláwizra' Xránadxu Dios,
na' beche̱be Xránadxu, ne bselé̱' neda' lu da na'
be̱xru na neda'.
6 Zuale̱ Xránadxu neda', na' québequeze zreba'
bi xelún bénneache chia' neda'.
7 Zúale̱ Xránadxu neda' ládujla benne' ca' dxelácale̱ne̱' neda'.
Chee̱ le̱ na' le'eda' cheajlechaze benne' ca' dxelecuídene̱' neda'.
8 Cháwe'dxa naca guxrén lázredxu Xránadxu Dios
quézcala guxrén lázredxu bénneache.
9 Cháwe'dxa naca guxrén lázredxu Xránadxu Dios
quézcala guxrén lázredxu benne' dxelenná be'e̱.
10 Gulechaj benne' xúgute̱ cue' xe̱zr la xu neda',
na' lu La Xránadxu Dios guzría xi'a benne' ca'.
11 Guléchaje̱' neda', ne buluchídie̱' neda',
na' lu La Xránadxu Dios guzría xi'a benne' ca'.
12 Guléchaje̱' neda' ca dxelún be̱scutuche',
na' guca xel-la' dxelezrá'a chee̱' ca tu xi' da dxuzezxe na
xixre' xeche' bizre,
na' lu La Xránadxu Dios guzría xi'a benne' ca'.
13 Buluzrigue̱' neda' chee̱ cheajcházia'
na' gúcale̱ Xránadxu Dios neda'.
14 Naca Xránadxu Dios ca tu xu'u naga zua chawa',
na' tu gúl-lazqueza' chee̱' lawe' da Lé̱queze̱' dxuselé̱' neda'.
15 Xel-la' dxelebé dxelul-la benne' xrlátaje ca'
lawe' da dxuselá Xránadxu le̱'.
Dute̱ xel-la' waca chee̱' dxun Xránadxu Dios da zrente̱ ca'.
16 Szrente̱ nagá'ana xel-la' waca zren chee̱ Xránadxu Dios.
Da zrente̱ ca' dxun xel-la' waca zren chee̱ Xránadxu.
17 Québequeze gatia', san gaca bana',
na' guzenda' bénneache ca zaj naca da nun Xránadxu.
18 Bde Xránadxu neda' lu da ba xa',
san quebe bdee̱' neda' lu na' xel-la' gute.
19 Gusalaj dxa xu'u chee̱ chu'a naga guchi'u chia', Xran,
na' chu'a na', ne güe lá'ana' Lue', Xrana' Dios.
20 Dxa xu'u nigá naca na chee̱ Xránadxu Dios.
Dxa xu'u nigá dxelú'u benne' xrlátaje ca'.
21 Güe lá'ana' Lue', Xran, lawe' da bennu' chia',
ne bseláu' neda' lu da guca chia'.
22 Xiaj na' da buluzúa benne' we̱n xu'u ca' chalá'ala,
le̱ na' naca na xiaj blau.
23 Da nigá be̱n Xránadxu,
na' naca na tu da dxexebánedxu.
24 Zra nigá naca na zra da be̱n Xránadxu.
Béle̱'e̱dxu, ne súadxu lu da ba neza lu zra nigá.
25 Xrana' Dios, dxata' xueda' Lue' guseláu' netu' na'a.
Dxata' xueda' Lue', Xrana', gunu' chepe ban na'a da dxuntu'.
26 Ba neza zrente̱ naca na chee̱ bénnea' ze̱'e̱ waláz chee̱
Xránadxu Dios.
Lu xu'u lizre Xránadxu Dios nigá dxenábantu'
gaca chawe' chiu'.
27 Xránadxu naque̱' Dios, ne ba be̱nne̱' dxi'u tu da dxusaní na.
Le guchéaj béadu ca' gútele lawe̱' lu luzu cugu chee̱'.
28 Nacu' Lue' Dios chia', na' güe lá'ana' Lue'.
Dios chia', gucá'ana szrena' Lue'.
29 ¡Le güe lá'ana Xránadxu Dios lawe' da naque̱' xrlátaje,
ne lawe' da chadía chacanna dxexache lazre̱' dxi'u!