1 Dxuxrén lazra' Lue', Xrana' Dios.

Quebe gu'u lataj xedué'eda'.

Lu da xrlátaje chiu' bselá neda'.

2 Bze̱ naga chi'a, ne bselá neda'.

Bze̱ chuchu neda', ne bucú'uj neda' chee̱ la'.

3 Nacu' Benne' dxuzé̱ chuchu' neda', ne dxucú'uju' neda'.

lawe' da nacu' li lazre' gulé'enu' neda' neza,

4 Bebéaj neda' lu xralaj da ba zaj nucueze̱', chee̱ xele̱l-le̱' neda'.

Lue' nacu' Benne' dxuxúe̱' neda'.

5 Lu na'u dxuzúa' bénne'du xu'a, Xran.

Lue' bexá'awenu' neda', Dios li lazre'.

6 Dxecuídeda' benne' ca' dxelebeza lazre̱' dios ca'

Neda' dxebeza lazra' Xrana' Dios.

7 Béle̱'e̱da', ne sua' lu da ba neza lawe' da dxexache lazru' neda'.

Caní dxunu' lawe' da dxelé'equeznu' ca da dxezaca zi'a.

Nézenu' ca dxedéa' lu da ba xa'.

8 Quebe bdeu' neda' lu na' benne' ca' dxeledábague̱' neda'.

Bze̱ chuchu' neda' tu lataj chawe'.

9 Bexache lazre' neda', Xrana' Dios, lawe' da zua' lu da ba xa'.

Ba bebizre nisa xuzru xiaj lawa' lawe' da dxewí'ine lazra'

dute̱ bénne'du xu'a, ne dute̱ be̱la' dxen chia'

10 lawe' da dxedé xel-la' nabán chia' lu da ba xa',

ne dxedéa' iza chia' ca' dxebezre lazra'.

Dxedú lazra' lawe' da nabaga' zria, na' dxelelá zrita xu'a.

11 Xúgute̱ benne' ca' dxeledábague̱' neda' dxelecuídene̱' neda',

na' benne' walízr chia' dxuluzúe̱' neda' chelá'ala,

na' benne' zaj núnbe'e̱ neda' dxelecuase̱' neda'.

Benne' ca' dxelelé'ene̱' neda' la neza dxuluzrúnnuje̱' naga zua'.

12 Benne' caní ba gulal-la lazre̱' neda' ca dxelal-la lazre̱'

Naca' neda' ca tu xé'ena xu da nalá'a.

13 Dxenda' dizra' schanni' da dxelenná benne' zante̱ chia',

na' gátete̱ze zua da dxuchebe na neda'.

Dxácate̱ na' dxelune̱' tuze dizra' bi xelune̱' chia',

14 Neda' dxuxrén lazra' Lue', Xran.

Dxennía' nacu' Lue' Dios chia'.

15 Lu na'u Lue' zaj xu'u zra chia' ca'.

Bselá neda' lu na' benne' ca' dxeledábague̱' neda',

ne lu na' benne' ca' zaj nau zi' xuzre̱' neda'.

16 Lu xel-la' szren chiu' bxue neda', we̱n zrin chiu'.

Lu xel-la' dxexache lazre' chiu' bselá neda'.

17 Quebe gu'u lataj xedué'eda', Xran, lawe' da dxuláwizra' Lue'.

Be̱n xelexedué'e benne' ca' dxelebéaj xíchaje̱' Lue'.

Be̱n xelezúa zrie̱' lu lataj ba xa'.

18 Be̱n quebe gaca xelenné̱ benne' ca' dxelezí xe̱'e̱,

benne' ca' dxelenné̱' da cale̱la chee̱ benne' xrlátaje ca',

da dxelenné̱' lu xel-la' dxulucá'ana szren cuina,

ne lu xel-la' dxulucá'ana ditaj benne' caní.

19 Da zrente̱ naca xel-la' zri'i lazre' chiu' da napu'

chee̱ bi gunu' chee̱ benne' ca' dxelape̱' Lue' ba lá'ana,

da na' dxunu' lau xúgute̱ bénneache

ne̱ chee̱ benne' ca' dxelebeza lazre̱' Lue'.

20 Lu da bagácheze naga zu' Lue' dxucachu' benne' ca'

chee̱ quebe bi xelún bénneache chee̱'.

Dxuzú' benne' ca' tu lu xu'u nagache

chee̱ quebe bi gun chee̱' xel-la' wetil-la dizra' chee̱ bénneache.

21 ¡Gaca ba Xránadxu Dios!

Lu xel-la' dxexache lazre' chee̱' be̱ne̱' da zrente̱

chee̱ gúcale̱ne̱' neda' tu lu xe̱zre naga guca wedil-la.

22 Gate na' guzúa da dxuchebe neda' gunnía':

Zua' naga québedxa le'e Xrana' neda'.

Lue' bennu' chi'a da guta' xueda' Lue' gate na' bláwizra' Lue'.

23 ¡Le zri'i Xránadxu, xúgute̱le le'e nácale benne' chee̱ Lé̱queze̱'!

Xránadxu dxuxúe̱' benne' ca' quebe dxulusane̱' Le̱',

na' dxuxunézrujle̱'e̱ chee̱ benne' ca' dxulucá'ana szrene̱' Le̱'.

24 Le gutipa lázrele, xúgute̱le le'e dxebeza lázrele Xránadxu Dios,

na' Le̱' guzé̱ chúchue̱' le'e.