Sam Kratrtqki-esz'-nzpnu-pwx-nrade-esz'mz (146)
Na-abrtxtrpwzku Drtwrgu Mz Yawe
1 Naglqlzku Yawe!
Na-angiox nide mz nabznge.
2 Naglqlzx Gct rnge mzli ka tqlube-ngrne,
X na-angrlvzx nide.
3 Bzkq abrtrpzku drtwrgu mz kxnzrmailzng,
Murde leplz trnzkrlzlru nzarlapx-krdr nigu.
4 Nabzng x nzyrtzmqng mz drtc',
X mzli lcpwz drtwr kcng tzyrlqlr botxpx-kzpz.
5 A' nangi da kxmrlz nzabrtr-krbzku drtwrgu mz Yawe.
Murde takitrde mz nzmnc-xgle-krgu Gct r Jekop.
6 X Yawe nide Kxrpalz,
Kc tqwz-ngrde bongavz, nrlc, x prla, x dalrdrng amrlx.
X atutr-zvzle natqdeng amrlx.
7 Nzatubqti-krbz Yawe da mz kxnzkxpung tubq.
X rka-zvzbz dakxnzng mz kxnzbrtaleng.
X aopxbzle drtq kxnzmnclzbzng mz mq enqmi rdrng.
8-9 X nide kz kx aopxbzle mzku.
X atulzmle kxnzobqszong.
Yawe aclvele lr mrkzbleng kx mnckung badr.
X okatrle kxnzbzszng x kxnzabzong.
Mrlztile kxnztubq nedeng,
A' odatile drtwr kcng tzyrlq kxdrka'-ngrng.
10 Yawe ni-alode King!
Nzaclvekr Gct rgu, nigu lr Jerusalem, tqvzpe tqvzpe.
Naglqlzku Yawe!