मत्ती रचीत यीशु मसीह का सुसमाचार
मत्ती लिखेल यीशु मसीन हाजाली खुबेर
ओलखात
मत्तीन लिखेल हाजाली खुबेर तो पुस्तेक ज्यो हे जो चार पुस्तेक माय रेन एक हे जो यीशु मसीन जीवणान बारामाय देखाड़ेह। पुस्तेकाम रेन हाजाली खुबेर केवायेल हे, जान मतलब हे यीशुह हेरगाम जाणेन पासाण मत्ती, मरकुस, लुका, एने योहान ज्यु आख्यु पुस्तेक्यु लेखायेल हेत्यु मत्तीन हाजाली खुबेर ज्यो पुस्तेक केदीह लेखायेल ज्यान मालमात जाणकार माणहाह नाह मालुम सोती तीबी आपु इही केय सेकतेह काय यीशुन जेल्मान 60 सालान पासाण ज्यो पुस्तेक लेखानो एय इहकेरीन तो लेखायेल ज्यान मालमात आपुह मालुम नाह सोती तीबी दिहरा माणहान मान्नो हे ज्यो पुस्तेक पलिस्तीन निहते यरूशलेम हेयराम लेखानो एय।
ज्यी पुस्तेकीह लेखणार मत्ती हे जो यीशुन चेलो बोणनेन पेल फालो उकालनार ईतो एने तो लेवी नावा माय ओलखाय जातालो मत्ती बारा प्रेरिता माय रेन एक ईतो एने तो यहुदि वाचणारान केरता ज्यी पुस्तेक लिखेल हे तानकेरता आपु देखतेह काय ज्या पुस्तेकाम 60 रेन वोदार वातु जुनाला नेमान हेते जान बाराम जाणाव ईयेल हे तो सोड़ोवणार मसी यीशुस हे ज्यो तो देखाड़ने हुदेह मत्ती बोगवानान राज ने बाराम जुलूम काय लिखेल हे, यहुदिन आसा एती काय मसी राज कारणान राज ने राजा बोणी मत्ती ज्या विचाराह चेतावणी आपीन बोगवानान आत्मिक राज देखाड़ेह।
मत्ती लिखेल हाजाली खुबेर ज्यो एक हाजालो पुस्तेक हे ज्यास माय रेन नोवाला नेमान सुरवात ईथे ज्यो पुस्तेक जुनाला नेमान उगे जाहार ताहार आपणो द्यान ली जाथे ज्यो पुस्तेक नोवालो एने जुनालो दुयाह जोड़ दिथे जाणकार ओहलो देखाड़तेह काय ज्या पुस्तेकाम मुसो लिखेल पंचग्रथ जुनाला नेमान पेल्ला पाच पुस्तेक ज्यान रूप देखाड़ेह यीशु जो बोयड़ा पोर हिकवोण आपेल 5:7 जान तुलना जो नेमान पुस्तेक बोगवान मुसाह आपेल ता हेऱ्या केर सेकतेह। व्यवस्था 19:3–23:25
रूपरेखा
1. यीशुन जेल्मो एने तान सेवान सुरवात मत्ती तान हाजाली खोबरीन सुरवात किरेह। 1–4
2. तान पासाण मत्ती यीशुन सेवान बाराम एने ज्यु आख्यु वातुन तो हिकाड़ेल तान बाराम देखाड़ेह। 5–25
3. मत्तीन लिखेल हाजाली खुबेर जो आखरी बाग हे तो यीशुन सेवकायीह उचाला बोयड़ान टेकड़ो मतलब तान मोरने एने जीव उठणेन बाराम लिखेल हे। 26–28
1
यीशुन वोस
(लुका 3:23-38)
1 यीशु मसीन बाप दादान नावे लेखायेल सुचीन पुस्तेक ज्यु हेत्यु, तो दाऊद राजान वोसीन ईतो, दाऊद राजान वोस अब्राहामा पोर रेन सुरू एनो।
2 अब्राहामाह रेन इसहाक, इसहाकाह रेन याकुब, एने याकुबाह रेन यहुदा एने तान बाहख पायदा एना, 3 यहुदा एने तामार ने फिरीस एने जोरह पायदा एना, फिरिसान हिसरोन पायदा ईनो, एने हिसरोन ने एराम पायदा एनो, 4 एरामाह रेन अम्मीनादाब पायदा ईनो, अम्मीनादाबाह रेन नहशोन एने नहशोनाह रेन सलमोन पायदा ईनो, 5 सलमोनाह एने राहाबान बोआज पायदा ईनो, बोआज एने रूथ ने ओबेद पायदा ईनो, एने ओबेद ने यीशे पायदा ईनो,
6 एने यीशेन दाऊद राजा पायदा ईनो, एने दाऊदान सुलेमान ती बायकुन जी पेल उरीयान बायकु एती✡ 1:6 2 शमुएल 12:24, 7 सुलेमानाह रेन रेहबाम पायदा ईनो, एन रेहबामाह रेन अबिया पायदा ईनो, एने अबियान आसाफ पायदा ईनो,✡ 1:7 2 शमुएल 12:24 8 आसाफ यहोशापात पायदा ईनो, यहोशापातान योराम पायदा ईनो, एने योरामान उजिया पायदा ईनो, 9 उजियान योताम पायदा ईनो, योतामान आहाज पायदा ईनो, एने आहाजान हिजकिया पायदा ईनो, 10 हिजकियान मनशी पायदा ईनो, मनशीन आमोन पायदा ईनो, एने आमोनान योशिया पायदा ईनो, 11 एने बाबिलोन देसान राजा इस्राएली माणहाह गुलामी माय ली जाणेन टेम माय, योशियान यकुन्या एने तान बाहख पायदा एना।✡ 1:11 2 राजा 24:14-15; 2 इतिहास 36:10; यिर्मया 27:20
12 एने ता बाबिलोन माय गुलामी माय एता, तेवी यकुन्यान शालतीएल पायदा ईनो, एने शालतीएलान जरूबाबेल पायदा ईनो, 13 एने जरूबाबेल ने अबीहुद पायदा ईनो, अबीहुदान ईलयाकीम पायदा ईनो, एने ईलयाकीमान आजोर पायदा ईनो, 14 आजोरान सदोक पायदा ईनो, एने सदोकान अखीम पायदा ईनो, एने अखीम ने इलीहुद पायदा ईनो, 15 इलीहुद ने एलियाजर पायदा ईनो, एलियाजरान मत्तान पायदा ईनो, एने मत्तानान याकुब पायदा ईनो, 16 याकुबान युसूफ पायदा ईनो, जो मरीयम ने एदमी ईतो, एने मरीयमान यीशु जो मसी केवाथे तो पायदा ईनो,
17 इहकेरीन अब्राहाम रेन दाऊद वोर चोवदा पिढ्यु एन्यु, एने दाऊदाह रेन बाबिलोन माय बोंदी बाणावीन पोचाड़णे वोर चोवदा पिढ्यु एन्यु, तान बाद बाबिलोन माय गुलामीम ली जाणे वोर यीशु मसीन पायदा एणे वोर चोवदा पिढ्यु एन्यु।
यीशुन जेल्मो
(लुका 1:26-38–2:1-7)
18 ✡ 1:18 लुका 1:27यीशु मसीन जेल्मो इहकेरीन एनो, जेवी तान आहख मरीयम ने मांगणी युसूफ नावान माणहा हेरी ईयेल एती, तेवी ता दुयाह एकठा एणेन पेल मरयमीह चोखाला जीवा उगे रेन दिह रेना। 19 तीन एदमी युसूफ जो देरमी ईतो, एने तीह बदनाम केरने नाह होदतालो, केरीन युसूफ तीह मोनेस सोड़ देणेन विचार किऱ्यो। 20 पुण जेवी युसूफ ज्यी वातुन बाराम मोना माय विचार केरने बाजरियेल ईतो, तेवी बोगवानान हेरोगदुत ताह होपना माय देखानो एने केयो, “एय युसूफ दाऊदान सोरा, तु तारी बायकुह तार गेर लावणेन बिहे मा, काहाकाय जो तीन पेटाम हे तो चोखाला जीवान उगे रेन हे, 21 ✡ 1:21 लुका 1:31ती एक सोराह जेल्मो देय, एने तु तान नाव यीशु मिलजे, काहाकाय तो आपणा माणहान तान पापाम रेन वोचाड़ी।”
22 ज्य सोब ज्यानकेरता एनो काय जो वचन जाणकार बोगवाना उगे रेन कियेल ईतो, तो पुरो एय। 23 “दिखो, एक कुवारली सोरीह दिह रेती, एने ती एक सोराह जेणी एने तान नाव इम्मानवेल मेलाय जाय,” तान मतलब हे, “बोगवान आमरी हिऱ्यो हे।”✡ 1:23 यशाया 7:14
24 तेवी युसूफ निंद माय रेन जागीन बोगवानान हेरोगदुतान उकुम मानेन तिहेस केरीन, युसूफ मरीयम हिऱ्यो वाराड़ केरीन तान गेर लेन आवो; 25 ✡ 1:25 लुका 2:21एने जाह वोर ती सोराह जेल्मो नाह देनी ताह वोर युसूफ ती हिऱ्यो नाह गीयो, एने युसूफ ता सोरान नाव यीशु मिल्यो।