10
Nianiaꞌ Naninge Baꞌaang Bataꞌkoong Niaꞌaako Jiisuuꞌke Makuꞌuruꞌnaꞌ
(Mat 19:1-12; Luk 16:18)
1 Jiisuuꞌke temono sipura Judiaꞌnameng-koo beuꞌ Jooꞌdani-nari pakoꞌuitaaꞌ. Eeꞌnoko nantoong karikaꞌ napoꞌ tee-anko naroꞌaririoꞌ kara nauvuruꞌ teroita nauvurikoꞌnaꞌ. 2 Eeꞌnoko niiꞌning Boto Keperuuꞌnavitu nariꞌ pororaiꞌnange aavavaama aaꞌpauꞌ, “Naumeriai. Niikaang boto-koo ee naninge baꞌaang bataꞌkoo tauraꞌpui otong?” 3 Eeꞌnoko aaꞌpuruꞌ, “Teka aremuriiꞌ boto Moosesie aruruꞌ?” 4 Eeꞌnoko bariꞌaama aaꞌpauꞌ, “Moosesie tauraꞌ avuꞌnisi naninge baꞌaang siꞌkoo piavora deekoꞌ karavoto˜ daarivuaing nampeesi totoꞌpuing tasiꞌanta-koo, eeꞌnoko baꞌaang bataꞌuai.” 5 Eeꞌnoko Jiisuuꞌke aaꞌpuruꞌ, “Moosesie aung boto daarivuuꞌnung diiꞌ diiꞌka domang ivekaꞌdariko. 6 Teka Kumponinge ookara kapooꞌ pupuꞌuuꞌnang-eta minkuvuma aaꞌpui otong Daari Meekung-koo,
‘Kumponinge donkaani eeꞌnoko manikuma nariꞌ nkovuretuꞌ.’
7 Eeꞌnoko
‘Teeꞌkoo donkaanie baumararing sipureta baꞌaang ninka pinkaꞌareaing, eeꞌnoko tenaanka narung mono deempareaing.’ (Pupuꞌ 1:24; 2:24)
8 Teeꞌpuuꞌnooꞌkoo tenaanka kenaanka deeaꞌ. 9 Teeꞌkoo kapooꞌ Kumponinge beꞌnuꞌantavuuꞌnung naroꞌka naninge tankaampuaukaꞌ nung.”
10 Eeꞌnoko teketa pava-koo toroarira bakaning barevare-nupoonge tampaꞌ tasiꞌkoo tanaꞌauꞌ. 11 Eeꞌnoko Jiisuuꞌke aaꞌpuruꞌ, “Tenang naninge baꞌaang bataꞌuma oovunani nampupeuꞌ eeꞌnoko nampeesi baꞌaang ninka teka orarivuing. 12 Eeꞌnoko baꞌaange bataꞌuma baꞌung oovunara nampupeuꞌ eeꞌnoko nampeesi tee teka orarivuing.”
Jiisuuꞌke Toireꞌ Biraankevuruꞌnaꞌ
(Mat 19:13-15; Luk 18:15-17)
13 Eeꞌnoko nantoonge toireꞌ okiꞌnarekaꞌ Jiisuuꞌanko poꞌantavaarikoꞌ teie kompurira biraankevuriiꞌnaang. Eeꞌnoko teinge bakaning barevare-nupoonge poteaaruꞌ tee-anko tavoꞌaariko. 14 Eeꞌnoko Jiisuuꞌke oovurira iiraevuruꞌ bakaning barevare-nupoong aaꞌpurima, “Tauraꞌperereriai toireꞌ ning-anko poꞌkoo, potevereriaꞌ. Kumponinge nantoong toireꞌpinaꞌ bereꞌarimaing bakaang muuꞌkooning. 15 Masikaꞌ naurampimang ninge diiꞌ, baa tee naning Kumponing bakaang muuꞌ tootoꞌke bautaꞌ nkavui arooꞌaramanaꞌ kompuarura tee bakei tumparavaukaꞌnung teꞌ Kumponing bakaang muuꞌkoo.” 16 Eeꞌnoko minku bakevura toireꞌ narunaꞌ bokoꞌurima tankaꞌ panteꞌuruꞌ Kumponinge biraanke-koo.
Narung Nemaka Barevarenku Mmauꞌ Otoꞌevukoꞌnung
(Mat 19:16-30; Luk 18:18-30)
17 Tenang Jiisuuꞌ niiꞌnameng-aape nanuꞌ tutumparako naning narung kuaꞌpari pora miinge keemparuꞌ uroꞌkanooꞌ eeꞌnoko aaꞌpuuꞌ, “Nau-anta tampara, ninge aming kapooꞌ nkoamira domaang oparavaukaꞌnung kompampaing?” 18 Eeꞌnoko Jiisuuꞌke makuꞌuma aaꞌpuuꞌ tee, “Arekeeꞌkoo dake ning tampara tammemang? Niiꞌnara naning tampara otoaꞌ, Kumponing narung tampara. 19 Dake Moosesi bakaang boto eeꞌ oroꞌ noruꞌei otong:
‘Naning dupisiꞌeaukaꞌ.
Nampeesi orarieaukaꞌ.
bakiaaꞌ nkoveaukaꞌ.
Daang-koo tuutunampeaukaꞌ.
Kapooꞌ kokonoveaukaꞌ.
Daumararing deto noruꞌeresi pakuereaing.’ ” (Toro 20:12-17)
20 Eeꞌnoko teie aaꞌpuuꞌ, “Nau-anta, ninge okiꞌnaꞌnooꞌketa aing ookara boto tanatavantuꞌning.” 21 Eeꞌnoko Jiisuuꞌke oovui piaavura aaꞌpuuꞌ tee, “Daꞌ narung kapooꞌkoo makosiaꞌ. Bera ookara kapooꞌnanka dakaning baavevera mooniꞌ nkavera ataꞌoiꞌnuka averiai. Teeꞌ nkovera paning-koong kavonanka otoꞌderuaing. Eeꞌnoko teketa ning siomei poai.” 22 Eeꞌnoko aung kara taaravura aaꞌnaꞌ muriꞌouꞌ, eeꞌnoko domang mankiꞌoitaaꞌ tenkenuuꞌ, aiꞌ aung naning tee maneenara.
23 Eeꞌnoko Jiisuuꞌke ooꞌoovurima bakaning barevare-nupoong aaꞌpuruꞌ, “Bakei poreꞌ masikung manee-nupoong Kumponing bakaang muuꞌkoo tung-koo.” 24 Eeꞌnoko bakaning barevare-nupoong aaꞌnaꞌ taꞌninauꞌ teeꞌpuioꞌ. Eeꞌnoko Jiisuuꞌke napoꞌ kara bariꞌevurima aaꞌpuruꞌ, “Ee toireꞌ, bakei poreꞌ masikung Kumponing bakaang muuꞌke tung-koo teing maneeariri otoromanooꞌkoo noruꞌ sipaamaing. 25 Kaameliꞌnavoroꞌ bamaruꞌkoong busi-koo kuunge tung-koo makotuaꞌ, eeꞌnoko naning maneenara-koo bakei aaꞌnaꞌ koontoꞌ makotuaꞌ Kumponing bakaang muuꞌkoo tung-koo.” 26 Eeꞌnoko teing aaꞌnaꞌ taꞌninaara biiꞌka kareaama aaꞌpauꞌ, “Nka enang baa domaang mooꞌaravaing?” 27 Eeꞌnoko Jiisuuꞌke teing oovurira aaꞌpuruꞌ, “Nantoong biiꞌka domaang mooꞌkoo makosi deeaing, Kumponinge deekoꞌ makosi, aiꞌ teie ookara kapooꞌ nko-koo makosie.”
28 Eeꞌnoko Piitai karoma aaꞌpuuꞌ, “Aung ee, teka niiꞌ teing ookara kapooꞌ sipampira siontampimaing.” 29 Eeꞌnoko Jiisuuꞌke aaꞌpuuꞌ, “Masikung naurampimang, naninge aing sipuuꞌnung: pava, baumaraang, baurukaaꞌ, bakaang kansiꞌ sipura ning-koo eeꞌnoko nkaang kara tampara bereng-anta-koo, eꞌmung-eta dau basinooꞌ makuꞌ nkavuaing daakuꞌpinaꞌ anke kansiꞌkoo otoitaaꞌ; 30 Aaꞌnoko: pava, baumaraang, baurukaaꞌ, kansiꞌ. Eeꞌnoko nantoonge turampaavai eeꞌnoko damaꞌnaroong-koo napoꞌ domaang oparavaung okovuaing. 31 Teka mmauꞌ nantoong ureai otoromaing damaꞌke damaꞌduariaing, eeꞌnoko damaꞌduariri otoromaing ureaavai.”
Beemuꞌpinaꞌ Jiisuuꞌke Booaing-koo Minkunaa Nauvuruꞌnaꞌ
(Mat 20:17-19; Luk 18:31-34)
32 Eeꞌnoko Jiisuuꞌ uroitaaꞌ Jerusalemaꞌaape daanto taunge nanauꞌ, eeꞌnoko taꞌnimpariruꞌ teing siompaakoꞌning avoreaama. Eeꞌnoko bakaning nanaiꞌketa kenaanka naroꞌurira minkunaavuruꞌ damaꞌke nkoaravainaꞌ 33 Aaꞌpuruꞌ, “Ee aing, niiꞌ teing Jerusalemaꞌnavuntuꞌkoo deto merimang. Eeꞌnoko teka eeꞌnooꞌka naninge tooka kompui ning Tee Naning-naumpoꞌ Paning-etaing tauraꞌmuuꞌnaang aaꞌning-koo Piristiꞌnuka-koo ovontung eeꞌnoko boto naunuka; eeꞌnoko teinge tee tuutunamaara ning booꞌkoo makosi tampaaraiꞌnange sing-antamaavaing teing-koo Juꞌdeeaing-koo. 34 Eeꞌnoko teinge Juꞌdeeainge siisimaavai tutupaaꞌmaama, eeꞌnoko muraꞌmaara dupisiꞌmaavaing. Teketa beenang doong tankinuko napoꞌ daaꞌmaravaing.”
Entaeenta Jeemisi Namainta Jooni Beekaang
(Mat 20:20-28)
35 Jeemisi namainta Jooni, Siebedi baurinketa, Jiisuuꞌanko poretuꞌ aaꞌpurema, “Nau-anta, kapooꞌ nkomemureeꞌnaang piamoremang.” 36 Eeꞌnoko Jiisuuꞌke aaꞌpuretuꞌ, “Aming nkorerompeeꞌnaang piaroremang?” 37 Eeꞌnoko temaintai makuꞌurema aaꞌpuretuꞌ, “Tauraꞌmereaing neeꞌ daꞌ ninka baꞌnang-koo, tenang dakaang meenasie kororuioꞌ ovorintari baꞌnantaravainang, narung tampavine-aape eeꞌnoko narung mareꞌaanavine-aape.” 38 Eeꞌnoko Jiisuuꞌke temainta aaꞌpuretuꞌ, “Deeꞌke tee kapooꞌ eentameresing noruꞌereaꞌ. Deeꞌke ee teruꞌ ntonaruꞌ orakaꞌ deeꞌnaruꞌ ning naikampainaruꞌ naikirepeuꞌ? Eeꞌnoko napoꞌ sisikeera ninka meekaꞌantamaravainaꞌ ee meekaꞌantararepeuꞌ?” 39 Eeꞌnoko temaintai makuꞌurema aaꞌpuretuꞌ, “Eeꞌ, neeꞌ makosira.” Eeꞌnoko Jiisuuꞌke aaꞌpuretuꞌ, “Eeꞌ, masikaꞌ, kaapu-koo ninge naikampaing-koo naikireainge, eeꞌnoko meekaꞌantamaravainaꞌ meekaꞌantarareainge. 40 Eeꞌnoko ning tauraꞌ oꞌnoaꞌ miruꞌkoo naning ning-koo tampavine-koo eeꞌnoko mareꞌaanavine-aape baꞌnang-anta-koo. Aung tee kapooꞌ Kumponing bakaang. Teie bampuuꞌnaꞌ baꞌnampareaing.”
41 Eeꞌnoko teinge napoꞌ nanaiꞌke teeꞌ taaravaara Jeemisi namainta Jooni iikooꞌaaretuꞌ. 42 Eeꞌnoko Jiisuuꞌke ookara naroꞌ bokuvurira aaꞌpuruꞌ, “Diiꞌke ee noruꞌeri otong teing nantoong Juꞌdeeaing-kooninge biikaning ovontung miruꞌaarimaing iriꞌoromanaꞌ nantoong-koo. Eeꞌnoko biikaning pankenankai biikaang iriꞌke nantoong etuaarikooꞌ. 43 Teka diiꞌkoo teeꞌ deeaꞌ. Naning diiꞌkoong boreꞌ otoꞌkoo piavora diikaang pakupakunung otoai. 44 Eeꞌnoko naning diiꞌkoo dau basi deeng-koo piavora botovotonaaꞌ otoai ookara-koo. 45 Ning Tee Naning-naumpoꞌ Paning-etaing teeꞌke, kansiꞌkoo ovoring-pinaꞌ otoꞌkoo moaꞌ, teka pakupakunung deemaraaꞌnaang mouꞌnung, eeꞌnoko nkaang domaang duaꞌkoo teing-koo mmauꞌ booꞌketa simpiriꞌariiꞌnaang.”
Jiisuuꞌke Naning Duta Kaputuꞌ Miring Batimiasi Tamparuꞌantavuuꞌnaꞌ
(Mat 20:29-34; Luk 18:35-43)
46 Eeꞌnoko Jerikooꞌnamono-koo tavoꞌariruꞌ. Teꞌ otorokotaaꞌ napoꞌ tenkenauꞌ Jiisuuꞌ eeꞌnoko bakaning barevare-nupoong. Eeꞌnoko napoꞌ nantoong karikaꞌ nariꞌ. Eeꞌnoko naning duta kaputuꞌ taunge baꞌnampari otoi nantoong mooniꞌkoo eentavurikoꞌ. Aung naning miring Batimiasi, Timiasi bauring. 47 Eeꞌnoko teie taaravura Jiisuuꞌ Nasaretiꞌnung tankinuko boku tutumpuuꞌ aaꞌpuma, “Jiisuuꞌ, Deevitaꞌ bakanaving-koong, piaameai ning.” 48 Eeꞌnoko nantoong karikaꞌke poteaama dooroomparaaꞌnaang botoauꞌ. Eeꞌnoko teeꞌpaako bakei aaꞌnaꞌ bokuma aaꞌpuuꞌ, “Deevitaꞌ bakanaving-koong, piaameai ning.” 49 Eeꞌnoko Jiisuuꞌke nasinura aaꞌpuuꞌ, “Bokueriai.” Eeꞌnoko bokuauꞌ tee kaputuꞌ, aaꞌpaama, “Doturari daaꞌdaravai. Bokurumaang.” 50 Eeꞌnoko bakaang mononopaꞌ duaꞌura namuꞌke daaꞌarara Jiisuuꞌanko beuꞌ. 51 Jiisuuꞌke aaꞌpuuꞌ, “Daꞌ arekeeꞌ nkoramaꞌnaang piaroi?” Eeꞌnoko naning kaputuꞌke aaꞌpuuꞌ, “Nau-anta Pankaing ee, ning duta bantang-antameaing.” 52 Eeꞌnoko Jiisuuꞌke aaꞌpuuꞌ, “Naniaing. Dakaang baitoi tamparuꞌkiing.” Eeꞌnoko namuꞌke bantora tee Jiisuuꞌ siompuuꞌ taunge nanuko.