1 Eeꞌnoko Jiisuuꞌke nauvuruꞌnung kara dikitoꞌ baito-koo dateꞌpariri doong kante kunsiarimatooꞌnaang kontevoroaꞌ. 2 Aaꞌpuuꞌnung, “Niiꞌnamono-koo naning narung kara-simpeꞌ otokoꞌnung, aaꞌnung Kumponing-koo avoroarukoꞌ, nantoong noruꞌuriarukoꞌ. 3 Eeꞌnoko temono-koo nani manikuma naaro otokoꞌ, tee-anko doong kante poma aaꞌpukoꞌnani, ‘Donkomei pakumeai ning naninge turamumaatoinani.’ 4 Tutunaꞌnamuꞌpi-koo taaravuarukoꞌnung, teka damaꞌke baka karoma aaꞌpuuꞌ, 5 ‘Ai, ning aaꞌ Kumponing-koo amoromparukooꞌ eeꞌnoko nantoong noruꞌaramparukooꞌ, nka makosi anie naaroi ereanamumaung-koo donkompampaing poreꞌantamumaatoꞌneenga teeꞌ nariꞌ poi otoma.’ ”

6 Teketa Ovoringe aaꞌpuuꞌ, “Tasiꞌperi noruꞌeriai tee aung naning kara-simpeꞌ orara nkoaruꞌnaꞌ. 7 Eeꞌnoko Kumponinge ee aarumo koontoꞌ kansiꞌkoo donkompevuriarooꞌnaang bakaning miruꞌniiꞌnanka tee-koo bokiaamaing doong eeꞌnoko muung nantoonge orakaꞌ nkoaarimaung-koo? Aiꞌ pankaroong tamung taaravuri otopeuꞌ? 8 Ninge eeꞌ naurampimang, teie tee namuꞌke aarumo koontoꞌ donkompevuriaing. Teka bane teeꞌkoo, ning Tee Naning-naumpoꞌ Paning-etaing napoꞌ kansiꞌkoo mora arekeeꞌ, nantoong mmeꞌ baitoariri otoroko ooarampaing e?”

9 Napoꞌ niiꞌnung narung kara dikitoꞌ Jiisuuꞌke nauvuruꞌnung aunge tooꞌpuri teing nantoong biiꞌka koontoꞌnuka tamparimaing ookara oovuning doonko ooaarima, 10 “Kenaanka naninka nanuretuꞌnung dootuuꞌnava pankava-koo kunsiareeꞌnaang, narung Boto Keperuuꞌnavitu-koong eeꞌnoko niiꞌnung taakisi nkanuka-koong. 11 Tee Boto Keperuuꞌnavitu-koong donkonui kunsiarama aaꞌpuuꞌ, ‘Kumponing, ninge tampara tantamang daꞌkoo, aiꞌ ning tee niiꞌning nantoong-pinaꞌ deeaꞌ aaꞌning okoꞌokonuka, tosi ninka bakiaaꞌ nkonuka, nampeesi orarinuka, napoꞌ bakei aung-pinaꞌ taakisi nkanuka-koong-pinaꞌ deeaꞌ. 12 Ning tee kemuꞌkai unkumomaramaung uiki kante tampaꞌ kunsimaraaꞌnaang. Kapooꞌkoo kompamaing-koo Kumponing bakaning avonkooꞌ.’

13 “Teka tee niiꞌnung isipoꞌ donkonura, domang putuꞌarama, deto ankamparavaꞌ paning-aape aaꞌpuuꞌ, ‘Kumponing ee, piaamera tontaꞌmeai ning naning oreng nkoamaung.’ 14 Tee aung naning naurampimang Kumponing bakaang duta-koo koontoꞌ deempari duparuꞌnung, tee niiꞌnung deeaꞌ. Aiꞌ ookara nantoong biiꞌka detoarimaing Kumponinge doonko batarivuriaing, eeꞌnoko baa tee naning baka depetoaramaung Kumponinge deto sipuaing.”

15 Enang teing nantoonge toireꞌ nerakauꞌnanka ninka Jiisuuꞌanko poꞌantavaarikoꞌ teie kompurira biraankevuriiꞌnaang. Eeꞌnoko tenang teinge bakaning barevare-nupoonge ooaarira poteaaruꞌ teing. 16 Teka Jiisuuꞌke toireꞌ bokuvurima bakaning barevare-nupoong aaꞌpuruꞌnung, “Toireꞌ tauraꞌperereriko poroai ning-anko, paraꞌereriaꞌ, aiꞌ Kumponing bakaang muuꞌ nantoong amuriiꞌ okovuriaing. 17 Masikaꞌ naurampimang ninge diiꞌ, baa tee naning Kumponing bakaang muuꞌ tootoꞌke bautaꞌ nkavui arooꞌaramanaꞌ kompuarura tee bakei tumparavaukaꞌnung teꞌ Kumponing bakaang muuꞌkoo.”

18 Teketa tee naning pankainge niaꞌuuꞌnung Jiisuuꞌ, aaꞌpuma, “Daꞌ nau-anta tampara, ninge aming nkoamira domaang oparavaung okomupeuꞌ?” 19 Eeꞌnoko Jiisuuꞌke makuꞌuma aaꞌpuuꞌ tee, “Arekeeꞌkoo dake ning tampara tammemang? Niiꞌnara naning tampara otoaꞌ. Kumponing narung tampara. 20 Dake Moosesi bakaang boto noruꞌei otong, eeꞌ minkuvumaung,

21 Eeꞌnoko teie aaꞌpuuꞌ, “Aing ookara ninge tanatavantuꞌning ning okiꞌnaꞌnooꞌketa.” 22 Eeꞌnoko tenang Jiisuuꞌke taaravura aaꞌpuuꞌ tee, “Daꞌ narung kapooꞌkoo makosiaꞌ. Baaveveaing ookara kapooꞌnanka dakaning, eeꞌnoko mooniꞌ nkavera tankaampeai teing-koo ataꞌoiꞌnuka-koo. Teeꞌ nkovera paning-koong kavonanka otoꞌderuaing. Eeꞌnoko ning siomei poai.”

23 Teka teie teeꞌ taaravura orarunsiaruꞌ tee, aiꞌ tee aung tee kavo mmauꞌpoꞌnung. 24 Jiisuuꞌke tenkenuko oovuma aaꞌpuuꞌnung, “Bakei poreꞌ masikung teing-koo kavo mmauꞌpoꞌnupoong-koo muuꞌ Kumponing bakaang-koo tung-koo. 25 Kaameliꞌnavoroꞌ bamaruꞌkoong busie tumparavarupeuꞌnaꞌ bakei naning kavonanka-poꞌnung dau basinooꞌ makotuaꞌ Kumponing bakaang muuꞌkoo tung-koo.”

26 Teinge taaravauꞌninge aaꞌpauꞌ, “Arekeeꞌ? Kavo mmauꞌpoꞌnupoong domaang mooꞌariarupeuꞌning deekoꞌ enang baa domaang mooꞌaravaing?” 27 Teka teie aaꞌpuuꞌ, “Kapooꞌ nantoonge nko-koo makosiaavaung tee, teie Kumponinge nko-koo makosi.”

28 Eeꞌnoko Piitai aaꞌpuuꞌ, “Aung ee, teka niiꞌke siparampiruꞌnung niikaning osinanka-poꞌ daꞌ siontampima.” 29 Eeꞌnoko Jiisuuꞌke aaꞌpuruꞌ teing, “Masikaꞌ naurampimang ninge diiꞌ, baa tee naning aing aaꞌning sipuuꞌnung: pava, baꞌaang, baꞌmarang, niiꞌnooꞌ baurukaaꞌ Kumponing bakaang muuꞌ bereng-anta-koo, napoꞌ tee temuriiꞌ mmauꞌ otoꞌevuaing emuꞌnaroong-koo kansiꞌkoo otoitaaꞌ; 30 eeꞌnoko damaꞌnaroong-koo napoꞌ domaang oparavaung okovuainge.”

31-32 Eeꞌnoko bakaning pokaꞌurira nanaiꞌketa kenaanka aaꞌpuruꞌ teing, “Aing ee, Jerusalemaꞌaape deto meriiꞌnaang eeꞌnoko ookutunung kapooꞌnanka ning-koo, Tee Naning-naumpoꞌ Paning-etaing-koo, nakaro-nupoonge teroita minkumaama daariakoꞌning teke dupearaaꞌnaang, aaꞌnora: Juꞌkoong ovontunge siꞌmaavaing Juꞌdeeaing-anko, eeꞌnoko teka teinge akapeuꞌmaama maimaiaꞌnaꞌ nkomaavaing tutupeeꞌmaama. 33 Teinge ning muraꞌmaara dupisiꞌmaavaing, teketa beenang doong deemparako napoꞌ daaꞌmaravaing.” 34 Teka teinge tasiꞌpaavaꞌ teing aing kapooꞌnanka. Aung minkunaa tee teing-koo bakuꞌaruꞌnung, noruꞌke nkavaavaꞌ teing kapooꞌ minkuvuuꞌning.

35 Teketa Jiisuuꞌ Jerusalemaꞌaape nariꞌ bema Jerikooꞌnavuntuꞌkoo dueꞌaruꞌnung teke kaputuꞌ, eenta bauko, taung miiringe baꞌnampari otoko. 36 Eeꞌnoko teie kaputuꞌke nantoong karikaꞌ tee-koo miiringe tankinaako taaravuruꞌnung eeꞌnoko niaꞌkuma aaꞌpuuꞌ, “Aung naampa aming-koo?” 37 Teinge aaꞌpauꞌ, “Jiisuuꞌ, Nasaretiꞌnung tankinumaang.” 38 Teketa bokuma aaꞌpuuꞌ, “Jiisuuꞌ, Deevitaꞌ bakanaving-koong, piaameai ning!” 39 Eeꞌnoko teinge ureai nanaakoꞌninge orokoauꞌ tee aaꞌpaama, “Dooroontaravai!”

Teka tee baruꞌ aaꞌnaꞌ bokuuꞌ aaꞌpuma, “Ovoring Deevitaꞌ bakanaving-koong, piaameai ning!”

40 Eeꞌnoko Jiisuuꞌ nasinura poꞌanta-koo botoaruꞌ tee-anko. Eeꞌnoko tenang dueꞌ poioꞌ Jiisuuꞌke niaꞌuuꞌ tee, 41 “Arekeeꞌ nkoramaꞌnaang piaromaang daꞌ, ninge?” Eeꞌnoko teie aaꞌpuuꞌ, “Ovoring ee, duta ning bantang-antameaing.” 42 Eeꞌnoko Jiisuuꞌke aaꞌpuuꞌ tee, “Banteaing, dakaang baitoi tamparuꞌkiing.” 43 Eeꞌnoko namuꞌke bantora tee Jiisuuꞌ siompuuꞌ Kumponing daangampuma. Eeꞌnoko ookara nantoonge teie ooaara Kumponing daangampauꞌ.