23
1 Eeꞌnoko Paulaꞌke dutai naapu narung oovurira teing koompaaraꞌnavitu aaꞌpuruꞌ, “Ee mmarang Juꞌnupoong, Kumponing-koo dutakanooꞌke aaꞌdampimang, ninge bakaang boto maroita totoꞌpansi oꞌnoaung eꞌmung-koo basinooꞌ.” 2 Eeꞌnoko teie piristiꞌnanka-koo pankainge Ananaiasie karang-koo tankoꞌpaavaꞌnaang botovuruꞌ teing tee-koo dueꞌ donkonai otorokoꞌning. 3 Eeꞌnoko Paulaꞌke aaꞌpuuꞌ tee, “Nnaꞌ daꞌ Kumponinge tankoꞌduainge, kuung-takaaꞌ. Dake apeꞌ ning boto ninka paarameeꞌnaang teꞌ baꞌnantaring eeꞌnoko tee boto sipei ning tankoꞌkoo botoraramang ee?” 4 Eeꞌnoko teinge teke dueꞌke donkonai otorokoꞌninge aaꞌpauꞌ, “Dake ee tee orakaꞌ minku-koo makosi Kumponing bakaang piristiꞌ pankaing?” 5 Eeꞌnoko Paulaꞌke aaꞌpuuꞌ, “Ee mmarang, ninge noruꞌampaꞌ tee Kumponing bakaang piristiꞌ pankaing deekoꞌ. Masikaꞌ Daari Meekunge eeꞌ minkuvui otong,
‘Diiꞌke orakaꞌ minkueriaukaꞌ tee nantoong diikaning tare-nupoong-koong narung.’ ” (Toro 22:28)
6 Teka tenang Paulaꞌke tasiꞌpurira teing-koo niiꞌnavitu Noruꞌ Pitunavitu eeꞌnoko niiꞌnavitu Boto Keperuuꞌnavitu˜ tee koompaaraꞌnavitu-koo bokuma aaꞌpuuꞌ, “Ee mmarang, ning tee Boto Keperuuꞌnavitu-koong eeꞌnoko mmaꞌ Boto Keperuuꞌnavitu-koonge. Ning tee tuutunang-koo˜ oꞌnomang damaꞌke booꞌketa domamariaing masikaꞌantavamaung-koo.” 7 Eeꞌnoko tenang teie teeꞌ minkuvuko teke siivenkeꞌeuꞌ teing Boto Keperuuꞌnavitu˜ eeꞌnoko Noruꞌ Pitunavitu˜ eeꞌnoko tee oosinauraꞌ teke tankaamparuꞌ. 8 Noruꞌ Pitunavitue aaꞌning penkempaamanooꞌkoo teeꞌ: booꞌketa daaꞌ, koosinunanka, tanuaang; teka Boto Keperuuꞌnavitue aing ookeng masikeng tampaakooꞌ.
9 Teketa karakarare pankaing nkoaruꞌ eeꞌnoko niiꞌning Boto Keperuuꞌnavitu-kooning boto naunuka donkonaara deravariruꞌ aaꞌpaama, “Niiꞌke kapooꞌ orara ooampiaꞌ aung-koo. Aiꞌ pa tanuaange niiꞌnooꞌ koosinunge nauvumaung deekoꞌ turampampiꞌneenga.” 10 Eeꞌnoko tenang tee turanturang tavuꞌ aapearako tee piatooronuka-koong boreꞌ avorouꞌ tee Paulaꞌ bitutuaaꞌneeng-koo teinge, eeꞌnoko piatooronuka-koo botoaruꞌ doonko siarira tee Paulaꞌ pariꞌaarira mmariꞌantavaara biikanava-koo beꞌantavaavaꞌnaang. 11 Teꞌmung eeꞌnaꞌmung muunga Ovoring tee-anko dueꞌ donkonura aaꞌpuuꞌ, “Noruꞌ purintaravai, aiꞌ dake tee ning siraꞌmemanaꞌ anke Jerusalemaꞌke teeꞌ nariꞌ tampaꞌ siraꞌmeeꞌnaang teke Roomaꞌke.”
Niiꞌninge Juꞌnupoonge Kara Pinkaꞌauꞌnaꞌ Paulaꞌ Dupisiꞌaavaꞌnaang
12 Teketa taneꞌpuko niiꞌning Juꞌnupoong mumunsiarira pinkapinkaꞌeuꞌ sinearima taamanaavarooꞌnaang bera Paulaꞌ dupisiꞌaavainooꞌke basi. 13 Donkaang karekaiꞌpi divuꞌke tee aung mumunsinang nkoauꞌ. 14 Eeꞌnoko teketa teing aaꞌning-anko berouꞌ: piristiꞌnanka-koo ovontung eeꞌnoko Juꞌnupoong-kooning pankenanka-anko. Berora aaꞌpauꞌ, “Niiꞌ teing koontoꞌ niiꞌka pinkapinkaꞌmeerira sinemaririning taamanampiarooꞌnaang bera Paulaꞌ dupisiꞌampiainooꞌke basi. 15 Diiꞌke koompaaraꞌnavitu ninka nau-antaveriaing tee piatooronuka-koong boreꞌ tee Paulaꞌ diiꞌanko depeto sing-antavuainaꞌ tuumpiaamanooꞌkoo tampaꞌ tasiꞌperiiꞌnaang tamperima. Eeꞌnoko niiꞌ teing maamumariri oꞌnoriaing tavuꞌkoo tee taapoꞌka diiꞌanko dueꞌaravaruko.”
16 Enang tee Paulaꞌ baampuruꞌnunge taaravura tee maamunooraꞌ bera piatooronuka biikanavaꞌke koinura nauvuuꞌ tee Paulaꞌ. 17 Eeꞌnoko Paulaꞌke narung piatooronuka daakuꞌ tanatanara bokuvura aaꞌpuuꞌ, “Aung nemaka piatooronuka-koong boreꞌanko beꞌantaveai. Kapooꞌ nauvuuꞌnaang aunge tee.” 18 Eeꞌnoko teie tee beꞌantavura piatooronuka biikaang boreꞌanko aaꞌpuuꞌ, “Teie Paulaꞌke kiimata-koo otoinge bokumura naumuing aung nemaka daꞌanko tavoꞌamaꞌnaang kapooꞌ daꞌ nauruaꞌnaang.”
19 Eeꞌnoko teie piatooronuka-koong boreꞌke bireng-koo kompura taapoꞌ beꞌantavura tanaꞌuuꞌ tee, aaꞌpuma, “Tee aming kapooꞌ dake naumeeꞌnaang ning?” 20 Eeꞌnoko teie aaꞌpuuꞌ, “Teinge Juꞌnupoong-koo pankenankai kara naroompaing daꞌ niaꞌdaako Paulaꞌ teing-anko doonko koompaaraꞌnavitu-anko beꞌantaveeꞌnaang taneꞌ aavavaama tee-koo keperuuꞌai tasiꞌpaavaꞌnaang tampaama. 21 Teka teing arooꞌeriaukaꞌ teeꞌ, aiꞌ donkaang karekaiꞌpi divuꞌ maamuariri otorooꞌnaang bakuꞌariri tee dupisiꞌkoo. Teing biiꞌka sinearirining taamanaavarooꞌnaang bera tee Paulaꞌ dupisiꞌaavainooꞌke basi. Eeꞌnoko enang teing teing maamuariri otorong tee tauraꞌ daꞌketa nempaitaaꞌ.” 22 Teketa teie piatooronuka-koong boreꞌke tee nemaka tenkeng-antavuuꞌ teketa orokovuma aaꞌpuuꞌ, “Naning naueaukaꞌ teeꞌ ning naumeinaꞌ.”
Piatooronukai Paulaꞌ Niiꞌnamono-koo Botoauꞌnaꞌ Piiliksie Simpeꞌuuꞌnaang
23 Tenang teie kenaanka piatooronuka daakuꞌnaꞌ tanatavaarekoꞌnaanka bokuvureta aaꞌpuretuꞌ, “Maamu-antaverereriaing kenaanka daakuꞌ piatooronuka eeꞌnoko naruaape-ita kenaiꞌka [70] oosie nanuꞌnuka eeꞌnoko kenaanka daakuꞌ daankoꞌpoꞌnupoong, eeꞌnoko tenang aasiꞌkoo duaꞌnang doinang muunga Sisariaꞌnavuntuꞌaape beriai. 24 Eeꞌnoko Paulaꞌ baꞌnanuaining oosining maamu-antaveriai, eeꞌnoko tampaꞌ basi-antaveriai tee-anko ovoꞌmaꞌanko Piiliks-anko.”
25 Eeꞌnoko karavoto eeꞌpinaꞌ daarivuuꞌ, 26 “Ninge Kalaudias Lisiasie daꞌ pankaing ovoꞌmaꞌ Piiliks onkeonkeꞌdamaang. 27 Aung naning tee Juꞌnupoonge mooꞌaara teinge tavaavaꞌnaang nkoaako ninge nkaning ninka piatooronuka ninka merira tenkeng-antavampira domampampirieeng, eeꞌ noruꞌampira aung tee naning Roomaꞌnung. 28 Eeꞌnoko tuumpiauꞌnooꞌkoo noruꞌkoo piamora ninge doonko koompaaraꞌnavitu-koo beꞌantavantuꞌ. 29 Eeꞌnoko biikaang boto-koo tuutunampaako ooantuꞌ, teka tuumpiauꞌning-koo kapooꞌ booꞌanta-aapenung eeꞌnoko kiimata-aapenung ooampaꞌ. 30 Eeꞌnoko ning tee Juꞌnupoonge tee naning dupsiꞌaavaꞌnaang mumunsiaako narunge makenge naumuing. Teeꞌkoo ninge namuꞌke daꞌanko botoansing. Eeꞌnoko napoꞌ teing tuumpiaamaing daꞌanko botoaransinge daꞌkoo uroꞌkanooꞌke siraꞌpaavaꞌnaang teing kapooꞌ tuumpiaamaing. Enang bakearing.”
31 Teketa tee teinge piatooronukai tee boto siompai Paulaꞌ bokuaara berouꞌ muunganang Antipatiris-aape. 32 Eeꞌnoko teing piatooronuka kauꞌke nanaakoꞌning teketaꞌ daunaꞌmung toroariruꞌ biikanava-aape, oosie nanuꞌnuka ninka nariꞌ nanaako tee Paulaꞌ. 33 Eeꞌnoko tenang teing Sisariaꞌ basiarira tee karavoto˜ avauꞌ tee ovoꞌmaꞌ. Eeꞌnoko Paulaꞌ tee-anko tavoꞌauꞌ. 34 Tenang teie tee karavoto deeruvura teie tanaꞌuuꞌ tee Paulaꞌ, aaꞌpuuꞌ, “Daꞌ aremeensiꞌkoong?” 35 Eeꞌnoko tenang Paulaꞌ Silisia-nung noruꞌura teie aaꞌpuuꞌ, “Daꞌ ninge tareamanooꞌkoong deentarako ninge taararerompaing dakaang kara makuꞌnaꞌ tenang teing tuumpiraamaing poroainang.” Eeꞌnoko botoaruꞌ tee Daurarong˜ Eerotiꞌ bakanava-koo otoko Paulaꞌ tanatavaavaꞌnaang.