1 Rehn oau dirin jounrik daksis apel armaj jekenken kan indoa pwa irai en rong Jesus. 2 Pharisee‑ok apel jounpadahk in Kojonneddok sapda lipahned, pwa, “Woal mene kin kajamwo ihr ma jekenken kan apel kin pwili mwinge iparai.” 3 Jesus pwehng irai karajraj pase:

4  “Ma mine emen kamwai ma nah jihpw epwiki, a emen joaloangla — da ih pirin wia? Ih joah pirin kihdi min duweijek dohmenno nehn mohj, apel inla raprapahkihjili jihppwo ma joaloanglahu oaroh ih kapangda? 5  A nehn ah ne kapangda, ih perenda kihdahng pohn aproa 6  wahlahng in umwahu apel kapokonpene ah piriennok apel mihn ipoahk, pwehng irai, ‘Kamwai pwili ngoahi malauda pwa ngoahi ne kapangda noai jihppwo ma joaloangla. Kisai kamdipw!’ 7  Ngoahi pwehng kamwai, pwa me pirin doahroar perenno ma mine nehnloannge ma armaj dipan mennoar koaluhla jang armaj 99 (duweijek dohmen) ma pwung apel joah anahne koaluhla.”

8  “Imdoahr ma mine lihmen ma nah mwani silper eijek, a oau joaloangla, da ih pirin wia? Ih akanda lahm oau, pohkda nehn umwahu apel rapahki mwehu wija ohroj, oaroh ih kapangda mwaniho. 9  A nehn ah ne kapangda, ih pirin panginpene ah piriennok apel mihn ipoahk, pwehng irai, ‘Kamwai pwili ngoahi malauda, pwa ngoahi ne kapangda noai mwani wa ma joaloangla!’ 10  Ngoahi pwehng kamwai ioar doahroar nihn Koahs sohnloang kan, irai kin malaukihda armaj dipan men ma koluhla.”

11 Jesus pel pwa, “Mine woal men ma nah jermwein roahmen. 12  Jermwein siksikko pwehng jamahu, ‘Pahpa, kihdoahng ngoahi oai pwaij ma uhdahn oai jang in johjo.’ Jamahu ken nehkpijoang johjo oang nah jermwein roahmenno. 13  A mwerin rehn pwi, jermwein siksikko noaskihla ah pwaij jang in ah johjo, wahda mwanihok, jeiloaklahng japw doh oau wija ih kerpwihla mwahl nah mwanihok in mour juwed apel siahk nauna. 14  Nehn ah koarjoahla ah me ohroj, a lehk koalik oau lel jappwo, jermweinno sapda mwakohkohla. 15  Ih inla ipen pwildak in jappwo men pwa en doadoahk ipoa, ih ken kadarla jermweinno en apwali nah pijjok. 16  Jermweinno kin nimen pwili kang kenen pijjok, joh armaj kioang ih en kang. 17  Nehn ah poahmda ah japwung, ih pwa, ‘Ia woahr dirin mwinge ipen nihn joamoaiho sohndoadoahk, a ngoahi ken pirin mehkihdi oai mwakohko! 18  Ngoahi pirin uhda, pwurla ipen joamoaiho pwehng ih, “Pahpa, ngoahi ne dipda ipen Koahs apel ipoamw. 19  Ngoahi ne johla koanoahng koawoa en nainki; wiahkihla ngoahi emen nihmw sohndoadoahk.” ’ 20  Ih uhdahr ken pwurla ipen jamahu.

“Ih kahjikkoar koaroannoang ummwo, a jamahu ne kapangda ih. Nehn kapehdin mwoakidkihda koalikin ah ipwilkihda nah jermweinno. Ih kijoulahr jupwurpene misik. 21  A, jermweinno pwa, ‘Pahpa ngoahi ne dipda ipen Koahs apel ipoamw; ngoahi ne johla koanoahng en adanki nihmw jermwein.’ 22  A jamahu pangin nah liduhwok, pwehng irai, ‘Kamwai pispis wahdo likkoauwa ma keiou mwehu kalikkoauwihkihda ih. Kamwai kioang rihng in jandin poah apel ju in ehn. 23  Kamwai wahdo kahu pwulopwul moad kojukdi, pwa kisai en kamdipwki! 24  Pwa noai jermweinne ne mehdi, ah ne pel mourda, ih ne joaloangla, a ne pel diarekda.’ Irai sapda kamdipw.

25  “Anjoauwohr jermwein koalikko minmine nehn japw. Anjoauwo ih koaroandohng ummwo, ih rongda ahr koajkoajoang apel kahkahlek. 26  Ih pangindo emen liduhwok, idoak ipoa, ‘Dahkij wihwiawi?’ 27  A liduhwo japoang pwa, ‘Rioammwo ne pwurdo, joamoammwo kojukdi kahu pwulopwul moaddo, pwa ih pwurdohng ih, mour apel sihkei.’ 28  Jermwein koalikko inenin lioas johpwa nimen dilda nehn ummwo. Jamahu dilla likin, poaki ipoa en dilda. 29  Ih japoangki jamahu, pwa, ‘Johnpar dihrdir ngoahi ne doadoahk oang koawoa doahroar lidu men apel johpwa koauwehla oamw kojonned oau. A dahkij koawoa kioang ngoahi? Pel johpwa kuhs men ma ngoahi en kamdipwihki oai piriennok! 30  A, nihmw jermweinno ma ne koarjoahkihla ah johjo oang li juweddok, a koawoa ken kojuk oang kahu pwulopwul moaddo nehn ah pwurdo!’ 31  Jamahu japoang, ‘Noai jeri, koawoa kin minminehr ipoai anjoau ohroj, apel oai koapwoa ohroj oamw. 32  Mwehu koawoa en pwili kamai perenda wia kamdipw oauwe, pwa rioammwo ne mehdi, a ne pel mourda; ah ih ne joaloangla, ih ne pel diarekda.’ ”