1 Mwerin rehn riau, koapwoapwoaud oau wiawi nehn koaujoan Cana, nehn Galilee; inen Jesus pel pwili mine wijahu. 2 Jesus apel nah sohnpadahkkok pel lukkoang in koapwoapwoauddo. 3 Nehn anjoauwo ma nimarai wainnok roj, inen Jesus‑o pwehng Ih, “Roj nimarai wain.”

4 Jesus japoang, “Joah pwehng Ngoahi da Ngoahi en wia. Oai anjoau kahjik leldo.”

5 Doari, inahu pwehng liduhwok, “Kamwai wiahda meohroj ma Ih pirin pwehng kamwai.”

6 Doari, ja sakai koalik wonou mine wijahu, mihn kamwkel, siahk in loapin lamlam in mihn Jew‑ok, ma kak audohdkihda nehn pwungen kalen rieijek ke jilihjek. 7 Jesus pwehng liduhwok, “Kamwai audohkihda pil dohn pillok.” Liduhwok ken audohda oaroh dir. 8 Ih pwehng irai, “Kamwai idipda wahla ipen koaun in kamdippwe.” Irai ken wahla. 9 Koaun in kamdippwo jong pillo ma wiahla wain, a Ih pwen jehjoa ia wija ma wainno injang. A liduhwok ma idipda pillo, irai ioar ma kidal. Koaun in kamdippwo ken pangindo woal kamwohddo, 10 pwehng, “Armaj ohroj kin kihda oh mijoa wain mwehu; a mwuhr, nehn sohn kamdippwo irai kin jakaula, irai kapwa kihda wain joah nohn mwehu. A koawoa neknekiddoar wain mwehuwo oaroh lel anjoau kije!”

11 Ioar me sapin kilel kan * Kilel kan: Jouninsing mene kin doadoahkki loapin sikesik pase “Kilel” ma woahwoahki manman kapwuriamwei ma Jesus wiahda pwa mwoakid pwiai kin wia kilelin pwa Ih nihn Koahs. ma Jesus wiahda nehn Cana nehn Galilee, a ioar doahroar Ah kajalehda Ah ling; doari, Nah sohnpadahkkok ken pwojonla.

12 Mwerin me, Jesus inlahng Capernaum, pwilihkihla inahu, riah woallok, apel Nah sohnpadahkkok, irai minmine wijahu oaroain rehn pwi.

13 Nehn anjoau in Joarwihn Passover ne koaroando, Jesus ken inlahng Jerusalem. 14 Ih kapangda in Umw Joarwiho woal pwi ma kin noaski kahu, jihpw apel mwurei, apel epwi sohnkawiliali mwani, minmine in arai sehpillok. 15 Ih ken wiahkihda mihn pokpok joal pwi, Ih ken kaujjang irai in Umw Joarwiho, pwilihki jihpw apel kahu ohroj. Ih ken ukuddi en sohnkawiliali mwanihok arai sehpillok apel wudekihdi nihrai mwanihok. 16 Ih pwehng irai ma kin noaskihla mwureiok, “Kamwai wahlahjang mehpwiai me, a joah wiahki umwen Joamoaihe umwen noas oau!” 17 Nah sohnpadahkkok ken lemehda da ma insingdi nehn Puk Joarwiho, “Maing Koahs, oai kajampwalki Umwoammwe kin okkokkok nehn mohngiongihoa doahroar oai.”

18 Koaun in mihn Jew‑ok idoak ipoa, “Kilel da ma Koawoa kak en wiahda ma pirin kajalehioang kamai ma Koawoa anki manman in wia mehpwiai?”

19 Jesus japoang, “Kamwai koauwehla Umwen Koahs oauwe, a mwerin rehn jiluh Ngoahi pel pirin pwuroahng kouda.”

20 Mihn Jew‑ok pel kalelpoak, “Koawoa pirin pwuroahng kouda rehn jiluhoar? Johnpar pahijek wonou ma Umw Joarwi oauwe kokoukihda!”

21 A ummwo ma Ih pwahpwahpwa, ioar pein palwoaroa. 22 Nehn Ah iejda jang mehdi, Nah sohnpadahkkok ken samanda da Ih pwahkihla mehpwiai; apel irai ken pwojonla lal in Puk Joarwi apel en Jesus padahk kan.

23 Doari, nehn ah minmine Jerusalem nehn anjoau in Joarwihn Passover, dir armaj pwojonla Ih nehn irai kapangda kilel kan ma Ih kin wiahda. 24 A Jesus johpwa likihoang irai pein Ih, pwa Ih kidal armaj ohroj. 25 Johpwa anahne emen en kadehdehng Jesus doahroar armaj kan, pwa pein Ih kidal joang dahpwi ma kin mine nehn mohngiongirai.