នាវកោរាញឞ្រាសងើយនាវតឹមរាង្លាប់មហែ រោម 7

នាវនតឹតមានាវតឹមនអាប់អូរឆាយ

1 អើអ៝សនោតានាវញឆីង! គ៝ប់អុចងើយមាខាន់អៃមៃអីគឹតឞ្លាវតានាវវៃមោឆេ ។ ខាន់អៃមៃលែៈគឹតជេសនាវវៃអីនៃគែសនាវទើយមាឞូនុយ្សនោកហោមរេសទើម។ 2 កើតមាឞូអូរអីលែៈគែសឆាយ តឹងមានាវវៃនអាប់អូរឆាយ ពាង់ជេងអូរដាសឆាយអីនៃនឹងនោកឆាយពាង់ហោមរេស យើនមាលាសឆាយពាង់លែៈខឹត ពាង់លែៈក្លាយ្សជេសឞើសនាវវៃនអាប់អូរឆាយ។* 3 លាសឆាយពាង់ហោមអែរេស ជេសរីពាង់ឆ៝ៈតៃឆាយអេងជឹតឞូកើបពាង់ជេងឞូអូរល៝ម់ឆាយ។ យើនមាលាសឆាយពាង់លែៈខឹតជេស ឞ៝លលាសពាង់ឆ៝ៈតៃឆាយអេងជឹត ឞូមោហោមអោសកើបពាង់ជេងឞូអូរល៝ម់ឆាយជឹត យ៝រលាសពាង់លែៈក្លាយ្សជេសឞើសនាវវៃអីនៃ។ 4 អើអ៝សនោតានាវញឆីង! តាផូងខាន់អៃមៃតឹមឞានមាឞូអូរអីលែៈខឹតឆាយ។ ខាន់អៃមៃលែៈខឹតជេសនទ្រែលឞ្រាសក្រីស លាសនទ្រីខាន់អៃមៃមោហោមខាច់ដ៝ង់ជាន់តឹងនាវវៃមោឆេ អាបៃអ្យាខាន់អៃមៃគុតឹមរាង្លាប់នទ្រែលឞ្រាសក្រីស អីកោរាញឞ្រាសលែៈអ៝ន់ទ៝ក់រេសឞើសផូងខឹត គៃមាអ៝ន់ឞ៝ន់ជាននទើអ្វែសមាកោរាញឞ្រាស។* 5 នតើមឞើសនទុលមែនាវកើញនូយ្សនហ៝ម់ឞូនុយ្សឞ៝ន់អុចជានតីស តាៈឞើសគឹតនាវវៃមោឆេ ឞ៝ន់ជានតីសងាន់ លែវត៝ត់តានាវខឹតគុតានទ្រូងអុញនហ៝រ៝។* 6 យើនមាអាបៃអ្យាឞ៝ន់លែៈក្លាយ្សជេសឞើសនាវវៃមោឆេ យ៝រលាសឞ៝ន់លែៈខឹតនទ្រែលឞ្រាសក្រីស មោហោមអោសគុក្រុងតាន៝ម់នាវវៃអីនៃ។ ឞ៝ន់លែៈក្លាយ្សគៃមាឆើមកើលជានការមាកោរាញឞ្រាសតឹងនតីលនាវគុរេសមហែអីតាៈឞើសឞ្រាសហ្វេងអ្វែស មោហោមអោសជានតឹងនតីលនាវគុរេសអើមអីតាៈឞើសនាវវៃដាៈ។*

នាវវៃញហើអ៝ន់គឹតនាល់នាវតីស

7 លាសនទ្រីមើមឞ៝ន់លាស? នាវវៃអីនៃជេងនាវតីសឞើស? មោទីអោស! យើនមាលាសមោគែសនាវវៃអីនៃ គ៝ប់មោគឹតដេៈរ៝ម៝សនទើអីតីស។ លាសនាវវៃមោគែសឞ្វៃលាស «លើយកើញនទើឞូ»† គ៝ប់ក៝ៈមោគឹតនាល់នទើអីនៃជេងតីសដ៝ង់។* 8 យើនមាតាៈឞើសនាវឞ្វៃអីនៃ ទឹងជានអ៝ន់គ៝ប់គែសនាវកើញជានតីសអ៝ក់នតីលងាន់។ លាសមោគែសអោសនាវវៃ គ៝ប់មោគែសអោសនាវអុចជានតីសដ៝ង់។* 9 ឞើសនតើមនើសគ៝ប់គុរេសមោអោសគឹតម៝សបាៈគែសដាៈតានាវវៃអីនៃ។ ត៝ត់មាគ៝ប់លែៈនតីនាវវៃឞ្វៃ «លើយកើញនទើឞូ» គ៝ប់នតើមកើញនទើឞូរ៝។* 10 ជេសរីទីមាកោរាញឞ្រាសតេៈទោយ្សមាគ៝ប់។ កើតនទ្រីនាវវៃអីគៃមាអ៝ន់នាវរេសនហ៝រ៝អីនៃ ងខើងមាអ៝ន់គ៝ប់គែសទោយ្សច្រាវ។ 11 តាៈឞើសគឹតនាវឞ្វៃអីនៃ នូយ្សនហ៝ម់គ៝ប់អីអុចជានតីសលែវជានតីសមានាវឞ្វៃអីនៃ អ៝ន់គ៝ប់មឹនគែសនាវអ្វែសមាគ៝ប់ បេងមាអ៝ន់គ៝ប់គែសទោយ្សគុនទ្រូងអុញនហ៝រ៝ច្រាវ។* 12 នទ្រីនាវវៃអីតាៈឞើសកោរាញឞ្រាសជេងក្ល៝សអ្វែស ជេសរីនាវឞ្វៃជេងក្ល៝សអ្វែស ជេងឆ៝ង់ ជេងអ្វែសដ៝ង់។* 13 លាសនទ្រីនទើអ្វែសអីនៃអ៝ន់លែវគ៝ប់គែសទោយ្សឞើស? មោទីអោស! នូយ្សនហ៝ម់គ៝ប់អីអុចជានតីសយាឆ៝ៈលើយនាវអ្វែសអ៝ន់គ៝ប់គែសទោយ្ស។ នទ្រីទឹងឞ៝ន់ឆៃនូយ្សនហ៝ម់ឞូនុយ្សអីអុចជានតីសពាង់អ្យើសទុតហោងាន់ យ៝រមាឆ៝ៈនាវឞ្វៃអីអ្វែសនៃលែវអ៝ន់គ៝ប់គែសទោយ្សទុតជ្រូ។*

ឞូនុយ្សតឹមរាទ៝ង់មានាវអុចជានតីស

14 នទ្រីឞ៝ន់លែៈគឹត នាវវៃជេងតាៈឞើសកោរាញឞ្រាស យើនមាឞើសនតើមនើសគ៝ប់ជេងឞូនុយ្សមោគឹតវ៝ត់មានទើកោរាញឞ្រាស។ គ៝ប់តឹមឞានមាទឹកមានាវតីស មោអោសឞ្លាវឞាសជានតីស។* 15 នទើអ្វែសអីគ៝ប់អុចជាន គ៝ប់មោអោសជាន តីសមានទើអីគ៝ប់មោអុចជាន គ៝ប់ជានច្រាវ គ៝ប់មោគឹតវ៝ត់អោសមើមទឹងគ៝ប់ជានកើតនៃ។ 16 លាសគ៝ប់ជាននទើអីគែសឞ្វៃតានាវវៃ ឞ៝លលាសគ៝ប់មឹននទើអីនៃមោអ្វែស លាសនទ្រីឆៃនហេល គ៝ប់កើបនាវឞ្វៃអីនៃលែៈអ្វែសងាន់។ 17 លាសនទ្រីមោទីគ៝ប់នើមអោសជាននទើអីនៃ ជេងនូយ្សនហ៝ម់គ៝ប់អីអុចជានតីសយាអ៝ន់គ៝ប់ជាន។ 18 គ៝ប់លែៈគឹតនូយ្សនហ៝ម់គ៝ប់អុចជានអ្យើសឞើសនទុលមែ មោអោសគែសនទើអ្វែសគុតានូយ្សនហ៝ម់គ៝ប់។ គ៝ប់លែៈគឹតជេសនទើអីអ្វែស តីសមាមោអោសទើយជាន។* 19 គ៝ប់លែៈគឹតនហេលនទើអីអ្វែស តីសមាមោអោសជាន ជានងខើងនទើអីគ៝ប់លែៈគឹតជេងអ្យើសច្រាវ។ 20 លាសគ៝ប់ជាននទើអីគ៝ប់មោអុចជាន មោទីអោសគ៝ប់នើមជាននទើអីនៃ នូយ្សនហ៝ម់គ៝ប់អីអុចជានអ្យើសយាជាន។*

21 តានាវគុងាវ គ៝ប់អុចងាន់ជាននទើអ្វែស តីសមានាវមឹនអ្យើសហោមគុតានូយ្សនហ៝ម់គ៝ប់មរ៝ អ៝ន់គ៝ប់ជាននទើអ្យើសនឹង។* 22 គ៝ប់ហោមរាម់ងាន់មានាវវៃកោរាញឞ្រាស‌ 23 យើនមាគ៝ប់ឆៃនូយ្សនហ៝ម់អុចជានតីសតឹមរាទ៝ង់ដាសនាវវៃអីនៃ នហ៝មាជានអ៝ន់គ៝ប់ជេងទឹកមានាវតីស។ 24 រេសរាញាល់ងាន់មាគ៝ប់! ឞូម៝សហោមទើយរាក្លាយ្សគ៝ប់ឞើសនូយ្សនហ៝ម់អុចជានតីសអីញជុនគ៝ប់តានាវកោរាញឞ្រាសតេៈទោយ្សគុតានទ្រូងអុញនហ៝រ៝?* 25 គែសកោរាញឞ្រាសទើយរាក្លាយ្សគ៝ប់ គ៝ប់លាសអ្វែសមាពាង់ យ៝រមានទើឞ្រាសយេឆូក្រីស អីកោរាញឞ៝ន់លែៈជេសជាន។ គ៝ប់អុចងាន់ជានតឹងនាវវៃកោរាញឞ្រាស តីសមានូយ្សនហ៝ម់គ៝ប់អីអុចជានអ្យើសនឹង ជានអ៝ន់គ៝ប់ជេងទឹកមានាវតីសច្រាវ។

*7:2 ៧:២៖ ១កោ ៧:៣៩

*7:4 ៧:៤៖ កាល ២:១៩

*7:5 ៧:៥៖ ១កោ ១៥:៥៦

*7:6 ៧:៦៖ រម ៦:២; ៨:១-២; ២កោ ៣:៦

†7:7 ៧:៧៖ នង ២០:១៧; នវ ៥:២១

*7:7 ៧:៧៖ រម ៣:២០; កាល ៣:១៩

*7:8 ៧:៨៖ រម ៤:១៥

*7:9 ៧:៩-១០៖ រម ៥:១៣-១៤; កល ១៨:៥; កាល ៣:២១

*7:11 ៧:១១៖ កល ១៨:៥; កាល ៣:១០-១៣

*7:12 ៧:១២៖ ១តម ១:៨

*7:13 ៧:១៣៖ ១កោ ១៥:៥៦; កាល ៣:១៩, ២៣

*7:14 ៧:១៤៖ នម ៥១:៥

*7:18 ៧:១៨៖ រម ៨:៧-៨; ផល ២:១៣; នន ៦:៥

*7:20 ៧:២០៖ កាល ២:២០

*7:21 ៧:២១-២៣៖ កាល ៥:១៧

*7:24 ៧:២៤-២៥៖ រម ៦:១៧-១៨; ១កោ ១៥:៥៧