នាវកោរាញឞ្រាសងើយនាវតឹមរាង្លាប់មហែ ២ តីមោថេ 1

ឆ៝ម់បុតពោលញជ្វាល់អ៝ន់មា

តីមោថេ រើស ២

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៦៥ ក្លាប់លាស ៣២ នាម់ជេសឞ្រាសយេឆូ ទ៝ក់រេស ពាង់ញចីសឆ៝ម់បុតអ្យាតាប៝នរោម នោកពាង់គុនទ្រូង(២តម ១:១៦-១៧) នោកនៃតីមោថេ គុតាប៝នអេផេឆោ ។ នោកពោល ញចីសឆ៝ម់បុតអ្យាពាង់នើមមឹនលាសមោហោមជ៝ៈជឹតឞូមរាងខឹតពាង់ យ៝រមាមឞើសងក៝ចនាវមហែមហានអ្វែស(២តម ៤:៦)។ ឆ៝ម់បុតអ្យាជេងឆ៝ម់បុតពោល ញចីសងគ្លែៈទុតអីឞ៝ន់ហោមគែសតានាវតឹមរាង្លាប់មហែ។

គៃមាគឹតនាវខ្លៃតាតីមោថេ ទាន់អ្វាញ់តានាវឞោកអ៝ន់ឞូគឹតល៝រតាឆ៝ម់បុតតីមោថេរើស ១។

មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។

នាវអុចនត្រ៝ង់តាឆ៝ម់បុតអ្យា

តាឆ៝ម់បុតអ្យាពោល ដាៈតីមោថេ អ៝ន់គុន៝ប់តានាវតឹមរាទ៝ង់ដាសនើមនតីងក្លាៈ អ៝ន់ញឆ្រោយ្សកើលឆើមជានការមាផូងញឆីង នទ្រែលមាអ៝ន់គុន៝ប់តានាវញឆីង ឞ៝លលាសឞូជានជេរយ៝រមានាវញឆីងអីនៃ(២តម ១:៧-៨)។ ពាង់ដាៈតីមោថេ លើយអោសតឹមរាលាច់មាឞូលាសមោគែសនាវខ្លៃ(២តម ២:១៦) យើនមាពាង់ដាៈតីមោថេ អ៝ន់ជានកើតនអា៖ «ញឆ្រោយ្សជានការអ្វែសគៃមាកោរាញឞ្រាសរានេ។ អ៝ន់មៃមឞើសងក៝ចនាវកោរាញឞ្រាសមានាវងើយងាន់ មានាវទី ជេងឞូនុយ្សជានការមាឞូមោអោសគែសនាវដីតព្រេង យ៝រលាសលែៈគឹតពាង់នើមជានអ្វែស»(២តម ២:១៥)។ ជេសរីពាង់ដាៈតីមោថេ ហាន់ជោៈខ៝ល់ពាង់តាត្រោមនទ្រូងតាប៝នរោម ។ ទូត្រ៝ងអីគែសនាវខ្លៃហោងាន់តាឆ៝ម់បុតអ្យា ២តម ៣:១៦ «ទឹងលែៈនាវកោរាញឞ្រាសងើយ ជេងតាៈឞើសកោរាញឞ្រាសអ៝ន់ឞ្រាសហ្វេងអ្វែសអ៝ន់ឞូញចីស គែសនាវខ្លៃមានតុមនតី មាងកាសអ៝ន់កាសគឹតឆាក់ នតុមនតីហាន់ទីត្រ៝ង នតុមនតីនាវគុរេសអ៝ន់ឆ៝ង់»។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-២)

- នាវនតិញអ៝ន់គុរាប់ជាប់តាឞ្រាសក្រីសយេឆូ (១:៣-២:១៣)

- នាវតឹមរាលាច់មានើមនតីងក្លាៈ (២:១៤-៣:៩)

- នាវដាៈពោលមាតីមោថេ (៣:១០-៤:៨)

- នាវនតិញងគ្លែៈទុត (៤:៩-២១)

នាវអោបអ្វែសលាង់

1 ឆ៝ម់បុតគ៝ប់ពោល ញចីស គ៝ប់កោរាញអ៝សម៝នឞ្រាសក្រីសយេឆូ តឹងកោរាញឞ្រាសអុច ជេងនើមមឞើសងក៝ចមានាវរេសអីកោរាញឞ្រាសលែៈត៝នមាអ៝ន់ឞូនុយ្សអីញឆីងមាឞ្រាសក្រីសយេឆូ ។* 2 គ៝ប់អុចញជ្វាល់អ៝ន់មាមៃតីមោថេ ជេងក៝នគ៝ប់អីគ៝ប់រ៝ង់ងាន់ងេន។ ទាន់កោរាញឞ្រាស នទ្រែលមាឞ្រាសក្រីសយេឆូ អ៝ន់នាវអ្វែស នាវយោៈ នាវដាប់មពាន់មាមៃ។ កោរាញឞ្រាសឞឹឞ៝ន់ ឞ្រាសក្រីសយេឆូ កោរាញឞ៝ន់។* 3 គ៝ប់លាសអ្វែសមាកោរាញឞ្រាសយ៝រមាមៃ គ៝ប់ជានការមាពាង់លែៈគឹតតានូយ្សនហ៝ម់ មោអោសជានមានទើអ្យើសនទើមោអ្វែស កើតផូងអូចែគ៝ប់លែៈជាននើស។ គ៝ប់កាសគឹតមាមៃនឹងនោកគ៝ប់មឞើសឆើមអាប់មាង់អាប់នារ មោច្វេលអោស។ 4 គ៝ប់កាសគឹតទាកមាត់មៃហ៝រនោកឞ៝ន់តឹមងខាសនើស ជេសរីគ៝ប់អុចងាន់ម៝ប់មៃ គៃមានូយ្សនហ៝ម់គ៝ប់រាម់មអាកហោងាន់។* 5 គ៝ប់កាសគឹតនាវញឆីងមៃរាប់ជាប់ងាន់ នាវញឆីងអីនៃគែសល៝រតាអូមៃរាញាលោអីស នទ្រែលមាតាមេៈមៃរាញាអឺនីស ដ៝ង់ ជេសរីគ៝ប់លែៈគឹតមៃគែសនាវញឆីងអីនៃដ៝ង់។

នាវនហាវនូយ្សតីមោថេ

6 កើតនទ្រីទឹងគ៝ប់ងកាសមៃ អ៝ន់មៃទ៝ង់លើមាហោនាវទើយអីតាៈឞើសឞ្រាសហ្វេងអ្វែសអីកោរាញឞ្រាសលែៈអ៝ន់ទើមទាមមាមៃនោកគ៝ប់មឞើសឆើមតេៈតីនើស‌* 7 យ៝រលាសកោរាញឞ្រាសមោអ៝ន់អោសនូយ្សនហ៝ម់អីអ៝ន់ឞ៝ន់ក្លាច យើនមាពាង់អ៝ន់ឞ៝ន់ឞ្រាសហ្វេងអ្វែសអីអ៝ន់ឞ៝ន់គែសនាវទើយ គែសនាវរ៝ង់មាឞូ នអ៝ប់មាឞ្លាវម៝ត់ញជ្រាង់ឆាក់។* 8 មៃលើយអោសដីតព្រេងមឞើសងក៝ចនាវខ្លៃកោរាញយេឆូ ឞ៝ន់នើម លើយអោសដីតព្រេងមាគ៝ប់អីគុតាត្រោមនទ្រូងអ្យាយ៝រមាមឞើសងក៝ចនាវពាង់។ យើនមាអ៝ន់មៃទើនហ៝ម់នាវជេរជ៝ត់នទ្រែលគ៝ប់តានាវមឞើសងក៝ចនាវមហែមហានអ្វែស។ កោរាញឞ្រាសអ៝ន់នាវទើយអ៝ត់នាវជេរជ៝ត់អីនៃ។* 9 ពាង់លែៈរាក្លាយ្សជេសឞ៝ន់ លែៈក្វាល់ជេសឞ៝ន់អ៝ន់ជេងផូងប៝នលានពាង់នើម*។ ពាង់ក្វាល់កើតនៃមោអោសយ៝រមានទើឞ៝ន់លែៈជេសជាន ជេងតាៈឞើសពាង់នើមលែៈអើមអុចអេល៝រមារាហាក់ញជេងនែសនតូ នទ្រែលមាតាៈឞើសនាវអ្វែសពាង់។ នាវអ្វែសអីនៃពាង់លែៈអ៝ន់ជេសមាឞ៝ន់តាឞ្រាសក្រីសយេឆូ ។* 10 អាបៃអ្យាកោរាញឞ្រាសលែៈញហើជេសអ៝ន់ឞ៝ន់ឆៃនាវអ្វែសពាង់នើម ឞ៝ន់ឆៃនាវអ្វែសពាង់យ៝រមាឞ្រាសក្រីសយេឆូ អីនើមរាក្លាយ្សឞ៝ន់លែៈវាច់តាអ្យា។ ឞ្រាសក្រីសយេឆូ លែៈលើសងគ្រ៝សលើយនាវខឹត ជេសរីញហើអ៝ន់ឞ៝ន់គឹតនាល់នាវរេស នាវមោហោមឞ្លាវខឹតតាៈឞើសនាវមហែមហានអ្វែស។*

11 កោរាញឞ្រាសលែៈកើយ្សគ៝ប់ជេងកោរាញអ៝សម៝នពាង់ កើយ្សគ៝ប់គៃមាមឞើសងក៝ចនតុមនតីនាវមហែមហានអ្វែសអ្យាមាឞូ†។* 12 នទ្រីទឹងគ៝ប់គែសនាវជេរជ៝ត់អ្យា យើនមាគ៝ប់មោអោសដីតព្រេង យ៝រលាសគ៝ប់គឹតជេសកោរាញឞ្រាសអីគ៝ប់ញឆីងអ្យា។ ពាង់គែសនាវទើយម៝ត់ញជ្រាង់ទឹងលែៈនទើអីពាង់លែៈជាវមាគ៝ប់‡នហ៝មាត៝ត់នារឞ្រាសក្រីសយេឆូ ព្លឹវាច់តៃ។* 13 អ៝ន់មៃញអោតន៝ប់នាវនតីទីអីមៃលែៈតាង់ជេសឞើសគ៝ប់នើស ជេសរីជានតឹងកើត។ អ៝ន់មៃគុអ្វែសតានាវញឆីង តានាវរ៝ង់មាឞូអីតាៈឞើសឞ្រាសក្រីសយេឆូ អ៝ន់។* 14 អ៝ន់មៃម៝ត់ទឹងលែៈនទើអ្វែសអីកោរាញឞ្រាសទែជាវជេសអ៝ន់មៃ ឞ្រាសហ្វេងអ្វែសអីក្ល៝សអ្វែសអីគុតាឞ៝ន់មរាកើលមាមៃតានាវអីនៃ។

15 មៃលែៈគឹតជេសអ៝ក់ងាន់ឞូនុយ្សតាឞ្រីអាឆី លែៈនត្លើយគ៝ប់ តាផូងអីនៃគែសផីកែលុស នទ្រែលមាហើមោកេន ដ៝ង់។* 16 គ៝ប់ទាន់កោរាញឞ្រាសអ៝ន់នាវយោៈមារានាក់វ៝ល់អោនេឆីផ៝រ យ៝រលាសអ៝ក់តឹងាន់ពាង់នហាវនូយ្សអ៝ន់គ៝ប់ ពាង់មោអោសដីតព្រេងម៝ប់គ៝ប់ ឞ៝លលាសគ៝ប់គុតាត្រោមនទ្រូង។* 17 នោកពាង់ត៝ត់តាប៝នក្វ៝ង់រោម ពាង់ញឆ្រោយ្សជ៝យគ៝ប់ត៝ត់ឆៃ។ 18 គ៝ប់ទាន់កោរាញឞ្រាសអ៝ន់នាវយោៈមាពាង់តានារកោរាញយេឆូ វាច់។ មៃលែៈគឹតជេសពាង់កើលគ៝ប់អ៝ក់ងាន់តាប៝នអេផេឆោ នើសដ៝ង់។

*1:1 ១:១៖ ១តម ២:៧; ការ ៩:១៥

*1:2 ១:២៖ ការ ១៦:១-៣

*1:4 ១:៤៖ ២តម ៤:៩

*1:6 ១:៦៖ ១តម ៤:១៤-១៥

*1:7 ១:៧៖ រម ៨:១៥; ១យហ ៤:១៨

*1:8 ១:៨៖ មថ ១០:៣២-៣៣; រម ១:១៦; ៣:១២; ១ពេ ៤:១៦

*1:9 ១:៩៖ មោលាស «អ៝ន់គុរេសក្ល៝សអ្វែស»។

*1:9 ១:៩៖ តត ៣:៥-៦; អេផ ១:៤-១១

*1:10 ១:១០៖ រម ៦:៩-១០; ហេឞ ២:១៤

†1:11 ១:១១៖ ឆ៝ម់បុតអើមអីញចីសមាតីអាបាៈគែសនត៝បតាអ្យា៖ «អ៝ន់មាផូងអីមោទីផូងអីឆ្រាអែល »។

*1:11 ១:១១៖ ការ ៩:១៥; អេផ ៣:៧

‡1:12 ១:១២៖ មោលាស «ទឹងលែៈនទើអីគ៝ប់ជាវមាពាង់»។

*1:12 ១:១២៖ ២តម ២:៩

*1:13 ១:១៣៖ ២តម ៣:១៤

*1:15 ១:១៥៖ ២តម ៤:១៦

*1:16 ១:១៦-១៨៖ ២តម ៤:១៩; មថ ២៥:៣៦