1 Yūcuán na te ni ndacoto Pablo nuū tée ni candutútú junta un, te ni cahān de:

Tátā jijnáhan ní, nɨ́ɨ́ ndé vijna vāha íyó ni anuá na jéē tú na cuēchi ná, jíto jínúū Yaā Dios, áchí de.

2 Yūcuán na te Ananías, sutū cujéhnu ga, ni cahān jiín tée cáhīin yajni nuū de jeē na cátu maá yuhu de. 3 Te ni cahān Pablo jiín sútū cujéhnu ga ún:

Yaā Dios stóho ya nihín chi tēe stáhú‑ni cúu ní, chi néne ní jéē sándaā ni núu ni stɨ́vɨ ná ley yā, ¿te naun stɨ́vɨ máá ní ley jeē ndácu ní jniñu jeē cáni de sāñá? áchí de.

4 Te ni cacahān tēe cáhīin nuū de ún:

¿Naun cáhán rō súcuan jíín sútū cujéhnu ga? Chi nuū Yaā Dios jejníñu de, áchí jíín de.

5 Te ni cahān Pablo:

Tátā jijnáhan ní, tu ní jíní na jéē sutú cujéhnu ga cúu de, chi núu ní jíní na te ma cahán na súcuan núú, chi yósó núū tútu iī jeē ni cáhān yā jeē ma cahán neé yó coto yó táca tée cácujéhnu nuū yō, áchí Pablo.

6 Te nuū ní jini Pablo jeē sava de cácuu grupo saduceo te sava ga de cácuu grupo fariseo, te ni cahān jee de:

Tátā jijnáhan ní, máá ná cúu ɨɨn jnáhan grupo fariseo, te suni súcuan ni īyo tátá na. Chi suni máá ná ñúhun ni na jéē nastécu yā ndɨ̄yɨ, te sɨquɨ̄ yúcuan cúu jeē cácahān ni cuéchi sɨquɨ̄ ná, áchí de.

7 Te jeē súcuan ni cahān de te ni cacusɨ́ɨn ni tēe junta jeē cácuu grupo fariseo jiín grupo saduceo, te ni cacahān nīhin. 8 Chi cácahān tēe grupo saduceo jeē ma nátecu ndɨ̄yɨ, ni tu cáhīyo ndajéhé yā ni ánuá, te tēe grupo fariseo cájejnúhún de ndɨnúní jnúhun yáha. 9 Te yōhyo ni cuvaā. Te sava tēe cástéén jnūhun cáhán tutu ley yā jeē cácuu jnáhan grupo fariseo, ni candocuɨñɨ̄ de, te ni cacahān de:

Tú ni ɨɨn cuēchi cánihīn na sɨ́quɨ̄ tée yáha. Sanaa te ni cahān ndije ɨɨn ánuá jiín de chí ɨɨn ndajéhé yā. Ma sánīhni ni yō nuū Yaā Dios nuu súcuan, áchí.

10 Te yōhyo ni catejnáhan, te yúhú general jeē quende i chiyō Pablo, te ni ndacu de jniñu jeē na quɨ́vɨ soldado te quenehen de Pablo sava mēhñú i, te na ndɨ́vɨ de ini cuartel.

11 Te jecuáā un ní quee‑ni máá Jítoho yō nuū de, te ni cahān yā jiín de:

Pablo, cuandeyɨ́ ni rō, chi nájnūhun ni nacani ró jnúhun ri ini ñuu Jerusalén yāhá, suni súcuan nacani nahín ró jnūhun ri ini ñuu Roma, achí yá.

12 Te nuū ní cundijin te ni cacutútú sava ñayuu hebreo, te ni casquíjnáhan jnūhun, te ni cacahān teyɨ́ i jeē ma cáji cuɨtɨ i ni ɨɨn ni ma cóho cuɨtɨ i nde núu tu cahni i Pablo. 13 Te víhyá gā uū xico tēe hebreo ni cacahān teyɨ́ jnúhun yáha. 14 Te ni jengoo nuū sutú cácujéhnu jíín núū tée jéhnu cándīso jníñu nuū ñáyuu hebreo, te ni cacahān jiín tée ún:

Ni cacahān teyɨ́ ná jeē ma cáji cuɨtɨ ná ni ɨɨn níní nde ná tu cahni na Pablo. 15 Núu súcuan te máá ní jijnáhan ní jíín táca gá tēe cásáha junta cujéhnu ga, cuácáhān ni jíín general jeē quenehen de Pablo na jéé de nuū junta sajnē, chi cachi ni jéē cácuni ni stíchí vāha ga ní de. Te máá ná jijnáhan ná cotūhva ná cahni ná de nde ná tu quee de nuū cáhīin tútú ní, achí.

16 Te sēhe yɨɨ́ cuáha Pablo ni nihīn i jnūhun jeē súcuan ni cacahān, te ni jehēn i cuartel, te ni castūhún i nuū Pablo. 17 Te ni cana Pablo xinī ɨɨn jnáhan capitán, te ni cahān de:

Condeca ní súchi yáha quíhīn ni jíín i nuū general, chi íyó ɨɨn jnūhun castūhún i nuū de, áchí de.

18 Te capitán un ní jeca de i cuahān i jíín de nuū general, te ni cahān de:

Pablo, tēe íne vecāa, ni cana de sāñá, te ni cahān de jíín ná jeē quíndeca ná súchi yáha núū ní, chi íyó ɨɨn jnūhun cahān i jíín ní, áchí de.

19 Te ni jnɨɨ general ndaha i cuahān de jíín i ɨɨn lado, te yuhu‑ni ni cajnūhún de i:

Na jnūhun cúní rō cahān rō jiín rí, áchí de.

20 Te ni cahān i:

Tēe hebreo ni casquíjnáhan jnūhun de jeē cahān ndahú de jíín ní quenehen ní Pablo sajnē quihīn de nuū tāca tée cásáha junta cujéhnu ga, chi cahān‑ni de jíín ní jeē cácuni de jeē stichí vāha ga de Pablo. 21 Te ma cuáha ni jnúhun, chi víhyá gā uū xico de cándētu sāhí de ichi, te ni cacahān teyɨ́ de jeē ma cáji cuɨtɨ de ni ɨɨn ni ma cóho cuɨtɨ de nde núu tú cahni de Pablo, te vijna je cándētu tūhva de jeē cuáha ni jnúhun quihīn Pablo nuū junta, áchí i.

22 Te ni cahān general jiín i jeē ma cáchi i nuū ní ɨɨn ñayuu jeē ni cáhān i jnūhun yáha jíín de, te ni tají de i cuanuhun i.

23 Yūcuán na te ni cana general uū capitán de, te ni ndacu de jniñu jeē sátūhva de uū ciento soldado cájica jéhé jíín únī xico uxī jeē cáyōsó caballo jiín úū ciento jeē cándāha lanza, chi cahɨɨ̄n jecuáā ún quendacoo de jíín Pablo quingoo de nde ñuu Cesarea. 24 Te suni ni ndacu de jniñu jeē coo tūhva caballo jeē cóso Pablo, te condito vāha soldado un Pablo quingoo de nde nuū Félix, tēe cúu gobernador. 25 Te ni tee de ɨɨn carta jeē cahán jnūhun yáha:

26 Máá ná cúu Claudio Lisias, te tée ná carta yáha cuájeē nuū ní, señor Félix, gobernador cujéhnu. Ndese tahū cúu ní. 27 Ñayuu hebreo ni cajnɨɨ i tēe yáha, te je yajni cahni i de núú, te ni jnama ná de jíín soldado, chi ni jini na jéē séhe nación Roma cúu de. 28 Te ni jendeca ná de nuū junta maá i jíjnáhan i jeē sándaā i núu na cuēchi ni sáha de. 29 Te ni jini na jéē sɨquɨ́ ley maá i cúu cuēchi cácahān i sɨquɨ̄ de, te tu níhín na ni ɨɨn cuēchi sɨquɨ̄ de jeē cúū de ni jeē cóne de vecāa. 30 Te ni nihīn na jnúhun jeē sava tēe hebreo ni casquíjnáhan jnūhun de jeē cahni de tēe yáha, te jeē yúcuan cúu jeē yachī ni tají ná de cuajeē de nuū ní. Te suni je ni cahān na jíín ñáyuu cájicān cuēchi sɨquɨ̄ de jecoo i nuū ní, te jiñā cahān i jíín ní na cuēchi ni sáha de. Je ni cahān yō, achí carta.

31 Te ni cajeca ñuú‑ni soldado Pablo cuangoo jíín de nde ñuu Antípatris, nájnūhun ni tahū jniñu nuū de. 32 Te ɨnga quɨvɨ̄ ni canandió cóo‑ni soldado cájica jéhé cuánungoo nde cuartel, te soldado cáyōsó caballo cuangoo de jíín Pablo. 33 Te ni jinūcoo ñuu Cesarea, te ni cachihi carta ndaha gobernador, te suni ni cajeni Pablo nuū de. 34 Te ni cahu gobernador carta un. Te ni cajnūhún de ndé ñuu cúu Pablo, te ni jini de jeē tée ndañúū Cilicia cúu Pablo. 35 Te ni cahān de:

Nde na quécoo tēe cájequin cuēchi sɨquɨ̄ rō te cuni nahín rí jnūhun cahān rō, áchí de.

Te ni cahān de jeē na quíndihyū Pablo ini palacio ndɨ̄yɨ Herodes.