18
Babilon Ago Akaikiꞌa Eꞌualai Auga Fouga
1 Egaꞌina afegai lau agelo iꞌoina agaꞌo ufai eake emai laisa. Isa isapu akaikiꞌa eafiia, ke egaꞌina isapugai ega eaea akaikiꞌa ipauma aagoa fofouga epaeaea. 2 Ke isa aina akaikiꞌagai eagaga einaka:
“Babilon,
ago akaikiꞌa auga eꞌualai efua, eꞌualai efua!
Isa auga tiapolo eꞌi pagua,
ke spiritu apalaꞌi maꞌoai
eꞌi aguagu afuga emia.
Ke inei ofuꞌi, ke Deo maagai apalaꞌi ipaumaꞌi auꞌi afuꞌi emia.
3 Gome ago maꞌoai papiauꞌi
isa fou amage koa laoꞌi maiꞌi apalaꞌi
fekekapaꞌi auga fino keinu.
Ke aagoa kiniꞌi isa fou amage koa laoꞌi maiꞌi kekapaiꞌi.
Ke isa kapa feloꞌi ipaumaꞌi maꞌoai eegai fekeka isapuga eafia auga faagagai,
aagoai afaꞌafa auꞌi kepaꞌamuꞌamu,” eoma.
4 Egae kai lau aufalao iꞌoina agaꞌo aina ufai emai iina eifa oma aina lalogonia:
“Eꞌu papiau, isa eegai amopealai,
ega koa oi isa fou laomai apalaꞌi folokapaꞌi.
Ke isa kapa apalaꞌi feafiꞌi auga
oi fou kaimialao foloafiꞌi.
5 Gome isa ega laomai apalaꞌi auꞌi kegoaiꞌi eꞌagaukae elao ufa.
Ke Deo isa ega laomai apalaꞌi eopolaniꞌi.
6 Isa kapaꞌina epipeni auga amopenimue.
Ke kapaꞌina isa oi eemiai ekapaiꞌi auga,
afa ipeninai ekapaisa auga agaꞌomo laagai foogeaua fopenimue.
Ke isa ega kaputi alogai kapaꞌina eoge lapuinia auga,
laagai gua mopamia mooge lapuinia.
7 Ke isa ifo epaꞌamuꞌamu alogaina, ke ifo au akaikiꞌa epamia koa iꞌopoga,
oi isa ega mopakiekie oma,
ke alo isafa ega mopamafu oma.
Gome isa gua alogai ifo eifa einaka,
‘Lau kuini koa laague, ke lau alaafuafu, ke lau afalaapeapepe,’ eoma.
8 Ega puo kapa apalaꞌi, mae, apepe ke magea isa feafiꞌi auꞌi maꞌoai,
kina agaꞌomo alogai akemai ageafiꞌi.
Ke isa loai ageaga, gome Lopia Deo kapula gome auga,
isa ega laomai apala auga afa agepenia.
9 “Ke aagoa kiniꞌi isa fou amage koa laoꞌi maiꞌi kekapaꞌi auꞌi, ke isa kapa feloꞌi ipaumaꞌi eegai epaꞌamuꞌamu alogaina auga kapaꞌi fou kaiꞌialao keafiꞌi auꞌi, isa loai eaga auga akuga akeisa. Ega aisama isa puogai akepinapina, akeapepe alogaina. 10 Ke kin egaꞌina auꞌi isa ega kiekie akaikiꞌa ipauma akeisa akemaniꞌi puogai, aakai mo akeapa kai, akeapepe akeinaka:
“O Babilon ago akaikiꞌa aumu,
Deo eegai afa apala ipauma loafia! Deo eegai afa apala ipauma loafia!
O isapu akaikiꞌa ago aumu,
Kina maaga agaꞌomo alogai oi emu laomai apala afa Deo epenio auga loafia efua!” keoma.
11 Ke aagoai afaꞌafa auꞌi isa puogai akepinapina, ke akeapepe alogaina, gome kai agaꞌo isa eꞌi amu afaeꞌafaꞌi pugu. 12 Amu egaꞌina auꞌi auga gold, silifa, ke kepo kimageꞌi feloꞌi afaꞌi akaikiꞌaꞌi iꞌoiꞌi iꞌoiꞌi auꞌi, ke pearl, ke linen tiapuga felo ipauma, ke tiapu umuga eaea, ke tiapu silikaga, ke tiapu pitoga koa iꞌopoga auga, ke au feloꞌi ipaumaꞌi iꞌoiꞌi iꞌoiꞌi auꞌi. Ke aꞌo akaikiꞌaꞌi paꞌoꞌiai kapa iꞌoiꞌi iꞌoiꞌi kekapaꞌi auꞌi, au afaꞌi akaikiꞌaꞌi auꞌi. Ke kopa, auli, ke kepo kimagega auga. 13 Ke au aka cinnamon faaga, ke aupu gagauꞌi keꞌisapu auꞌi. Ke mulamula fogaꞌi feloꞌi iꞌoiꞌi iꞌoiꞌi auꞌi. Ke oili papiau faagaꞌi kepakuma auꞌi. Ke fino, au aka olive oilina. Ke palafa kepaikumuꞌa auga, ke palafa anina akepaikumuꞌa auga. Ke polomakau, sipi, oti, ke pulieta, ke papiau imaauꞌi, ke papiau lalauꞌi.
14 “Ke afaꞌafa auꞌi Babilon ago akepaina akeinaka, ‘Oi au anina loisa lomaaga auga oi epuaꞌafunio elao. Ke oi emu paꞌamuꞌamu amuꞌi, ke emu eaea akaikiꞌa auga fou eemuai laaꞌi kemia. Ke egaꞌina kapaꞌi auga papiau afakeisaꞌi pugu,’ keoma. 15 Ke afaꞌafa auꞌi egaꞌina amuꞌi keꞌafaꞌafalainiꞌi, ke isa faagagai kepaꞌamuꞌamu auꞌi aakai akeapa, isa ekiekie alogaina auga akeisa akemaniꞌi alogaina. Ke akepinapina, ke akeapepe. 16 Ke akeifa akeinaka:
“O ago akaikiꞌa,
linen tiapuga felo ipauma pitoga,
ke pitoga koa iꞌopoga loiꞌiuka,
ke gold, silifa, ke kepo afaꞌi akaikiꞌaꞌi iꞌoiꞌi iꞌoiꞌiai
lokaikai aumu!
Deo oi afa apala epeniio efua!
Deo oi afa apala epeniio efua!
17 Gome emu paꞌamuꞌamu akaikiꞌa egaꞌina auga,
kina maaga agaꞌomo alogai keauoka afeꞌainiꞌi!” keoma.
Ke ufai aufalao agaꞌo aina lalogo auga eifa pugu einaka, “Lonti keꞌimaꞌi lopiaꞌi maꞌoai, ke lontiai kelao kemai auꞌi maꞌoai, ke lontiai kepinauga auꞌi, ke papiau iꞌoiꞌi isaꞌi aꞌuai eꞌi foꞌama keafia keania auꞌi maꞌoai aakai akeapa. 18 Ke maaꞌi agelao taoni akaikiꞌa egaꞌina eaga akuga akeisa aisama akeifa akeinaka, ‘Taoni agaꞌo ega akaikiꞌa iꞌina taonina koa iꞌopoga laaꞌi,’ akeoma. 19 Ke isa aloꞌi agemafu alogaina, aeapu akeafia kaniaꞌiai akeoge, ke akepinapina akeapepe akeinaka:
“O taoni akaikiꞌa,
papiau maꞌoai eꞌi lonti aꞌuai ekae auꞌi,
isa eegai paꞌamuꞌamu akaikiꞌa ekae auga
eegai keafiia kepaꞌamuꞌamu!
Deo isa afa apala epeniia efua!
Deo isa afa apala epeniia efua!
Gome paꞌamuꞌamu akaikiꞌa egaꞌina auga,
kina maaga agaꞌomo alogai keauoka afeꞌainiꞌi!
20 Kai ufa, Deo ega papiau aumi, apostolo,
ke profeta aumi isa amoalogamalaina.
Gome isa oi faagamiai kapaꞌina ekapaiꞌi koa iꞌopoga mo, Deo isa ega laomai apala afa epeniia,” akeoma.
21 Ke agelo agaꞌo ekapula alogaina auga, kepo agaꞌo foꞌama kepaikumuꞌa kepo akaikiꞌa koa iꞌopoga auga eafiakae aꞌuai epiulaisa, ke eifa einaka:
“Ega koa iꞌopoga mo,
Babilon taonina akaikiꞌa auga fiakoa mo
akeafia akepiulaisa, ke afakeisa pugu.
22 Ke harp kepaꞌopunia aꞌo,
iifi kepagama auꞌi aꞌoꞌi, ineine keipina aꞌoꞌi,
ke fiꞌi keipina auꞌi aꞌoꞌi
oi alomuai afakelogoniꞌi pugu.
Ke oi alomuai papiau imaꞌiai
pinauga iꞌoiꞌi iꞌoiꞌi kekapaꞌi auꞌi,
agaꞌomo ganinagai, afakeisaꞌi pugu.
Ke papiau kepo akaikiꞌagai foꞌama kepaikumuꞌa auga
aꞌo afakelogo pugu.
23 Ke lanepa eaea auga oi alomuai afaeeaea pugu.
Ke amage mamaga auga, ke ifiao ageakafania auga fou eꞌi miamia kekapa auꞌi,
ainaꞌi oi alomuai afakelogoniꞌi pugu.
Ke oi emu afaꞌafa auꞌi, agofaꞌai au akaikiꞌaꞌi.
Kai oi emu ugauga isapugai ago maꞌoai lofogeiꞌi.
24 Ke profeta, ke Deo ega papiau, ke aagoai papiau iꞌoiꞌi maꞌoai
oi loaupuguꞌi auꞌi ifaꞌi oi alomuai kekapulaisa,” eoma.