1 Aau akiu Kristiano aumi, lau kapa puo oi alomi fekapula pifoge deoꞌi foloau afagainiꞌi laoma auga alaifania. Lau anina laani ufainagai iꞌa ufuꞌa apaꞌa Israel papiauꞌi Moses muninai kepea auꞌi faagaꞌiai kapaꞌina emia auga fouga fologo laoma. Isa maꞌoai Isiptoai kepealai aisama, Deo apuapuai emai maꞌoai laaꞌiai epea eꞌimaiꞌi. Ke kelao Aꞌu Pitogai aisama, aꞌu efolapea, maꞌoai afu fugagai kepea pagai. 2 Ke isa maꞌoai eꞌi pakoꞌa Deo eegai keogeisa. Ega kainai apuapu ala elao auga, kainai mo kepakaisa kelao aꞌuai kepea pagai. Ega koa emia auga, Deo isa baptismo koa iꞌopoga epeniiꞌi, Moses ega papiau kemia. 3 Ke isa ago maininai kepea aisama, Deo mirakulo akaikiꞌa ekapaisa, palafa ufai eake maꞌoai keaniia. 4 Ke fei laaꞌi aisoꞌi ekupu aisama, Deo mirakulo ekapaisa, kepo alogai fei epealai maꞌoai keinu. Ke kepo egaꞌina auga Deo eegai emai isa fou kelao kemai koa iꞌopoga. Ke egaꞌina kepo auga Iesu Kristo. Ke kepo egaꞌina auga Iesu pau agu pagai maunina feina epipeni koa iꞌopoga emia, ago maininai fei kepo egaꞌina alogai epealai Israel papiauꞌi keinu. 5 Kai Deo ega koa ekapaisa epalagai feloꞌi mo ganinagai, papiau maꞌo Isa akepakoꞌania. Ega aisama Deo isa eeꞌiai alo aegama kainai, maꞌo egae epamaeiꞌi, ago maininai imaauꞌi keka aage mo kefai kelaoaina.

6 Egaꞌina kapaꞌi kemia auga, pau kapa agaꞌo koa epakinaiꞌa, ainaꞌa epalogo, ega koa iꞌa isa ufainagai kapa apalaꞌi kemaaniꞌi kekapaiꞌi auꞌi falakapaꞌi eoma. 7 Ke oi egaꞌina papiauꞌi isaꞌi deo pifogeꞌi keau afagainiꞌi koa folokapa, deo pifogeꞌi foloau afagainiꞌi. Isa fouꞌi Deo ega iifa pukagai iina kepapua oma ekae: “Isa kemiamia deo pifoge agogai foꞌama keaniia, ke keinuinu, ke keꞌue Deo ega papiau laaꞌi koa iꞌopoꞌi kekagakaga.”✡ Exodus 32:6 8 Ke Deo ega iifa pukagai ega eifa oma koa iꞌopoga, isa epoꞌiai papiau isaꞌi aufalao agaꞌo fou akeamage auga fou kefeu aage mo aisama, Deo isa eeꞌiai gua ekupu, kina agaꞌomo alogai auꞌi maꞌoai 23,000 kemae. Ega puo iꞌa isa koa falamia, aufalao agaꞌo fou alaamage auga fou falafeu. 9 Ke isa epoꞌiai papiau isaꞌi Deo keꞌopoisa aisama, Deo gua ekupu, kaapa epaula keagaiꞌi kemae. Ega puo iꞌa isa koa falamia Deo falaꞌopo. 10 Ke isa epoꞌiai papiau isaꞌi Deo eegai keifa mugumugu aisama, Deo gua ekupu, ega agelo eulaiꞌi keaupuguiꞌi. Ega puo iꞌa isa koa falamia, Deo eegai falaifa mugumugu.

11 Iꞌina kapaꞌi isa faagaꞌiai kemia auga iꞌa kapa agaꞌo koa kepakinaiꞌa. Ke Deo ega iifa pukagai kepapua ekae auga, iꞌa ainaꞌa kepalogo, ega koa isa kekapa koa falakapa keoma. Gome ufainagai kapa maꞌoai keifaniꞌi auꞌi, pau iꞌina kina iꞌa Iesu apakoꞌania auꞌa aague alogai, Iesu faugai koꞌaꞌi mo akemia. 12 Ega puo oi kaisau oopolaga, oapa inoka emi pakoꞌa kapula ooma aumi, foisa felo foloꞌualai! 13 Gome iꞌopo maꞌoai auga, papiau aumauni maꞌoai iꞌopo keafiꞌi auꞌi mo oi eemi kefai. Ke Deo kapaꞌina eifania auga agekapa paisa. Ke oi ifomi kapulamiai iꞌopo agaꞌo laagai agopagai afaekaina auga iꞌopoga afaelogoaina eemi afaefai. Kai iꞌopo oi eemi akefai aisama, Isa keaga agaꞌo agepakinaimi, ega koa iꞌopo egaꞌina papagai agoagu mo ganinagai, agokapula laomai apala agaꞌo afolokapa.

14 Ega puo ekefaꞌau Kristiano papiaumi, papiau deo pifogeꞌi keau afagainiꞌi auꞌi laoꞌi maiꞌi eeꞌiai fopiaukoko. 15 Ke lau auga oi papiau felomi mo maamiai laniniꞌani. Ega puo kapaꞌina laifania auga felo o apala ma auga, oi ifomi amoisa amoifania. 16 Ke iꞌa fino kaputina aafiakae amainu aoma aisama, Iesu Deo tenkiu epeniia koa iꞌopoga, iꞌa isafa Deo tenkiu apenia afegai kai fino egaꞌina ainu. Ega koa akapa Iesu iꞌa aꞌa laomai apalaꞌi fauꞌiai emae, ifa efaka auga alaopolaga, ke iꞌa maꞌoai Iesu fou agaꞌomo alamia ma? Ke iꞌa palafa aafia amaania aoma aisama, Iesu Deo tenkiu epeniia koa iꞌopoga, iꞌa isafa Deo tenkiu apenia kai, palafa egaꞌina afaipoga aania. Ega koa akapa, Lopia iꞌa fauꞌaisai kolotiai emae auga alaopolaga ma? E, egaꞌina aopolaga puo akapa. 17 Ke Iesu ifogamo iꞌa fauꞌaisai ega koa ekapaisa koa iꞌopoga palafa isafa agaꞌomo mo. Ke iꞌa maꞌoai papiau iꞌoiꞌa iꞌoiꞌa mo ganinagai, palafa egaꞌina agaꞌomo auga fou kaiꞌalao aania puo, maꞌoai imaauꞌa agaꞌomo koa iꞌopoga emia.

18 Amoopolaga galao Israel papiauꞌi amaafiꞌopoꞌi. Isa aꞌo keumaiꞌi Deo kepalao penia aisama, aꞌo egaꞌina afa keafiia keaniia. Ega koa kekapaisa agaꞌomo kemia Deo keau afagaina. 19 Lau foꞌama deo pifoge ipaꞌa penia emia foꞌamaga auga, kapa agaꞌo ma puo ega laifa oma, o deo pifoge egaꞌina auga kapa agaꞌo ma puo ega laifa oma? 20 Laaꞌi! Lau egaꞌina alaifania kai, papiau Deo akelogonia auꞌi foꞌama, o kapa agaꞌo isa eꞌi deo pifoge kepaꞌa penia auga, Deo akepaꞌa penia kai, tiapolo kepaꞌa penia. Ega puo oi tiapolo fou fomia auga anina alaani. 21 Ke oi auga Lopia ifa oi faumiai efaka auga gouga kaputinai agoinu, ke agolao tiapolo eꞌi kaputiai agoinu afaekaina. Ke oi Lopia ega teipoloai agoaniani, ke agolao tiapolo eꞌi teipoloai agoaniani afaekaina. 22 Kai Lopia iꞌa eeꞌaisai gapiapu ma aoma puo, kapa auniꞌi akapafouꞌi? Laaꞌi! Ke iꞌa Lopia ega kapula akaꞌegaina ma puo, iina akapa oma?

23 Ke oi epomiai aufalao agaꞌo afeifa afeinaka, “Lau kapa maꞌoai alakapaꞌi agekaina,” afeoma. Kai lau oi lapainimi. Koꞌa kapa maꞌoai agokapaꞌi agekaina kai, egaꞌina kapaꞌi auꞌi isaꞌi mo pipalagai kapaꞌi kai, isaꞌi auꞌi feloꞌi laaꞌi. Ega puo lau alaifa, “Lau kapa maꞌoai alakapaꞌi agekaina,” alaoma kai, egaꞌina kapaꞌi isaꞌi auꞌi mo pipalagai kapaꞌi kai, isaꞌi auꞌi lau ke aau akiu Kristiano papiauꞌi isafa afakepalagai feloꞌi alaoma. 24 Ke oi ifomi mo emi agu felo foloopolaga kapa agaꞌo folokapa kai, aami akimi Kristiano papiauꞌi isafa eꞌi agu felo foopolaga kai, kapa agaꞌo fokapa.

25 Ke titi kapa afaꞌafa afugai keꞌafa auga foania mo kai, alomiai foloifa deo pifogeꞌi kepaꞌa peniꞌi kai oania folooma. 26 Gome Deo ega iifa pukagai iina kepapua oma: “Aagoa auga Lopia apuga, ke kapa maꞌoai aagoai kekae auꞌi isafa, Lopia apuga.”✡ Sam 24:1

27 Ega kainai Kristiano papiauga laaꞌi auga iifa afeulaisa ega eꞌai fou foaniani afeoma, ke oi anina afoani molao afooma koa aisama, foꞌama kapa agomuai akeoge auga foania mo. Ke aloaniani alogai ifomu alomuai foloifa, iꞌina foꞌamaꞌi deo pifogeꞌi kepaꞌa peniꞌi ma kai, laaniꞌi folooma. 28 Kai aufalao agepainio ageinaka, “Iꞌina foꞌamaga auga deo pifogeꞌi kepaꞌa peniꞌi,” ageoma aisama, egaꞌina auga oi epainio auga faugai, ke isa alo afeofu kainai, foꞌama egaꞌina foloania.* Papiau isaꞌi 28 fuagai iꞌina iifaga kepapua: “Gome aagoa Deo apuga, ke kapa maꞌoai aagoai kekae auꞌi isafa Deo apuga.’ 29 Egaꞌina laifania auga, oi alomu ageofu auga fouga alaifania kai, au egaꞌina alo ageofu auga fouga laifania. Kai lau kapa maꞌoai mo alakapaꞌi agekaina kai, kapa puo au egaꞌina alo ageofu mo puogai, lau epaapakipoisau kapa isaꞌi mo alakapaꞌi? 30 Ke lau Deo tenkiu lapenia kai foꞌama laania koa aisama, kapa puo papiau lau Deo tenkiu lapenia auga foꞌamaga laagai iifa kepalifua.

31 Ega puo oi agoaniani, o kapa agaꞌo agoinu, o kapa agaꞌo agokapa aisama, papiau Deo au akaikiꞌa fekepamia, ke fekeau afagaina auga laoga mainai fokapa. 32 Ke oi emi agu alogai kapa maꞌoai agokapaꞌi aisama, Grik papiauꞌi, o Iudea papiauꞌi, o Deo ega iifi eꞌa papiauꞌi oi kapaꞌina okapa akeisa auga, isa eꞌi pakoꞌai afolopaꞌulaiꞌi auꞌi mo laoꞌi maiꞌi fokapaꞌi fekeisaꞌi. 33 Ke egaꞌina agokapa alogai, lau lakapa koa fokapa. Lau keaga iꞌoiꞌi iꞌoiꞌi laꞌopoꞌi papiau maꞌoai aloꞌi mapagama laoma. Gome lau kapa agaꞌo makapa laoma aisama, ifou eꞌu agu felo mo alaopolaga alakapa kai, papiau maꞌoai eꞌi agu felo isafa laopolaga kai, egaꞌina kapa lakapa. Ke ega koa lakapa auga, isa kaniaꞌi feisagamau laoma puo, lakapa.