19
1 A hmuilai voeldak neh aka ang lakah
amah kah thincaknah neh aka cet khodaeng he then ngai.
2 Mingnah aka om pawh hinglu khaw then pawh,
kho neh aka tanolh long khaw a hmaang.
3 Hlang kah a anglat loh
amah kah longpuei te a paimaelh pah hatah
a lungbuei tah BOEIPA taengah a hmaital.
4 Boeirhaeng tah paya khaw muep a thap pah dae,
tattloel tah a baerhoep long pataeng te a nong tak.
5 A honghi kah laipai te hmil pawt vetih,
laithae aka sat long khaw poenghal mahpawh.
6 Hlangcong kah maelhmai tah muep a thae sak uh tih,
hlang te hlang boeih loh kutdoe neh a paya nah uh.
7 Manuca pataeng aka khodaeng te boeih a hmuhuet uh atah,
a baerhoep aisat te a taeng lamloh a lakhla tak ta.
A hloem bal akhaw amih te ol a om moenih.
8 A hinglu aka lungnah long tah a lungbuei ah a lai tih,
lungcuei long tah hnothen dang hamla a ngaithuen.
9 A honghi kah laipai te hmil pawt vetih,
laithae aka sat khaw milh ni.
10 Omthenbawnnah he hlang ang ham a rhoeprhui moenih,
sal loh mangpa a taemrhai te bahoeng voel moenih.
11 Hlang kah a lungming loh a thintoek khaw a hlawt pah dongah,
boekoek te a boei a mang neh a poe.
12 Manghai kah thinkoeh he sathueng bangla kawk dae,
a kolonah he baelhing dongkah buemtui bangla om.
13 Capa a anglat te a napa ham talnah la om tih,
a yuu kah hohmuhnah khaw tuicip bangla puh.
14 Im neh boeirhaeng he napa kah rho la om cakhaw,
hlang aka cangbam yuu he tah BOEIPA taeng lamkah ni.
15 Ngaknah he ih dongah moo tih, palyal khaw hinglu lamlum.
16 Olpaek aka tuem loh a hinglu a ngaithuen tih,
BOEIPA kah longpuei aka hnoel tah duek rhoe duek ni.
17 BOEIPA kah puhlah long tah tattloel te a rhen tih,
a thaphu te amah taengla a thuung ni.
18 Ngaiuepnah a om vaengah na ca te toel lah,
anih duek sak ham tah na hinglu te thak boeh.
19 Kosi len kah hmulung te tholhphu la
a phueih atah na huul cakhaw koep na koei hae ni.
20 cilsuep he hnatun lamtah thuituennah he doe lah.
Te daengah ni na hmailong ah na cueih eh.
21 Hlang kah lungbuei ah kopoek muep om cakhaw,
BOEIPA kah cilsuep long ni a thoh sak.
22 Hlang kah ngaihlihnah tah amah kah sitlohnah he ni.
Tedae khodaeng he hlang laithae lakah then ngai.
23 BOEIPA hinyahnah he tah hingnah la om tih,
ngaikhuek la a rhaeh sak coeng dongah yoethae loh cawh voel pawh.
24 Kolhnaw long tah bael dongla
a kut a puei nawn pataeng a ka khuila a khuen moenih.
25 Hmuiyoi te na boh daengah ni hlangyoe bangla a muet uh eh.
A yakming la na tluung daengah ni mingnah te a phatuem pueng eh.
26 A napa aka rhoelrhak tih,
a manu aka yong sak capa tah yah a poh tih,
a khosak khaw tal.
27 Ka ca, mingnah olka lamloh palang ham a,
thuituennah hnatun ham he na toeng.
28 Hlang muen kah laipai loh tiktamnah te a hnael tih,
halang kah a ka loh boethae a dolh.
29 Hmuiyoi rhoek ham tholhphu neh
anglat kah a nam ham bohnah a tawn uh coeng.