1 Xaitamoxi Darias hatum ba xai ba hata yongga ragundi disok 120 probins, saing mogu gabana(di) ba (du)wa etua mana taining tainina. 2 Xauna, xaitamoxi(a) mogu Danyel gabu lipu luwa ba disok yanamadi duwasa mana gabanadi bu xaitamoxi(a) hatum xumana mana axamang tela te. 3 Baing xaitamoxi(a) bagu Danyel tuxu oxatanoa xai sibuna, dali riang oxatam luwa digabu gabanadi. Binabu xaitamoxi(a) hatum ba bagula mogu ba wa etua mana yongga hataing longgalo. 4 Riang oxatam luwa digabu gabanadi dilungu alaba baing disai mana mauxangang tela mana Danyel xaitamoxi oxatanam kubolundi. Baing tegu. Dibagu ina kubolung diang tela te. Namua na tuxu oxatanoa maringina, ubunoa bisa te, xaung xola mana kubolu diana. 5 Baing ina naga, lipuadi li daharua nading ba, “Tasai Danyel mauxangang tela susu. Daxanga tainainau ing ganina. Nabu tabo ba tasu haruanga na, bing tabagu mana axamang tela mana naxu mana Urana inia hanaunaungandi.”

6 Binabu riang oxatamdi digabu gabanadi ba digugunia ding dila rangua xaitamoxi(a) saing daharua ba, “O Xaitamoxi Darias, uwa bungingbunginalo! 7 Am longgalo—am lipu gabana wasanganamdi, kiapdi, gabanadi, lipu hatuminga sinaikkamdi, xaung kaunseldi—am hatumingamam taininau ba xaitamoxi(a) bing tongtongia hanaunaunga haringing tela ba lipu longgalo disu maringina mana. Am gabo ba utabina ba mana xaidap 30 bing lipudi disabu maung ing ganina, O Xaitamoxi. Lipu gaxarea disabu mana tela, heku mana lipu tela kimbo urana tela, bing ditingdi mari layondi banggumidingia. 8 Tauna, Xaitamoxi, utabina hanaunaungua bila ba saing ubung yama mana bu labu xugiau tai sanga mana Midia xaung Pesia hanaunaungadinga, saing sanga ba lipu tela hitixiya te.” 9 Binabu Xaitamoxi Darias bung yanoa mana hanaunaunga ba.

10 Ne bungina Danyel lungu ba bung hanaunaunga ba, ila numia saing haing mala numa lung etuamia, gung king tuxundi mari bila kubolunoa, suangindi daxaxa ding mala sanga Yerusalem. Sabu bunging tuwa xaidap taining tainina, harua xai sibuna mala rangua Urana inia, bila kubolunoa. 11 Baing yanamdi digugunia ding dila Danyel numania, saing dibagu sabu xaung xusunga Urana mana haulingua. 12 Binabu dila rangua xaitamoxi(a) saing daharua na mana hanaunaungua tabina ba, “Xaitamoxi, ubung hanaunaunga tela harua ba mana xaidap 30 bing disabu maung ing ganina, saing lipu gaxarea disabu mana tela, heku urana tela kimbo lipu tela, bagula ditingdi mari layondi banggumidingia, maxuna?”

Xaitamoxi(a) haxuya ba, “Wane, hanaunaunga naga, sanga mana Midia xaung Pesia hanaunaungadinga, sang sanga ba lipu tela hitixiya te.”

13 Baing dibala xaitamoxi(a) ba, “O Xaitamoxi, lipua Danyel, ina ba tela mana adi daxai ma sangua Yuda, ina hatumiaung te, hatumia hanaunaungama ubung ba te. Sabu mana Urana inia bunging tuwa xaidap taining taininauyu.”

14 Xaitamoxi(a) lungu alaba, baing hatumingang mauxang sibuna, saing hatuminganoa haring ba xap Danyel muli. Tuba tuba ba hauli laing xaidaba ri.

15 Bungbung sibuna baing lipuadi digugunia dila rangua xaitamoxi(a) saing daharua ba, “O Xaitamoxi, uxabia ba Midia xaung Pesia hanaunaungadinga harua ba hanaunaunga baruamta xaitamoxi(a) bung yanoa mana ba, sanga ba lipu tela sanga hitixiya te.”

16 Baing ina naga, xaitamoxi(a) tabina ba daxap Danyel ma diting mari layondi banggumidingia. Xaitamoxi(a) harua na Danyel ba, “Urana ungia usabusabu mana ba, murungagua bing bagula hauliung!”

17 Daxap siang tela ma diribauti bangguma xuanoa. Baing xaitamoxi(a) taga sianga saing ta raxung raguna tagangia. Ta yongga yanamindi raxuding ragudingdi mana xauna. Libu bila bu bili ba labu lipu tela hauli Danyelku tai. 18 Sup baing xaitamoxi(a) goxoya mala numania, saha mana angingua, hauxana mana yahangang yambonggamdi, wa olang. Sanga ba kinu te.

19 Buraraging sibuna baing xaitamoxi mesa saing haxa sapsap mala layondi banggumidingia. 20 Ma haxek banggumia baing hatum xumana buk saing wagi mana Danyel ba, “Danyel, ung ba Urana walingam lipuxing oxatanama! Urana ungia usabusabu mana ba, xapkung muli mana layondi, bo?”

21 Danyel haxuya ba, “O Xaitamoxi, uwa bungingbunginalo! 22 Urana ngayua soxi uleginama ma, saing kumguti layondi suxungudingdi bu dahanggalangia nga te. Libu bila ba namua na mauxangangu tela maxania te. Xauna, ngalibu kubolu diang tela maung te, O Xaitamoxi.”

23 Xaitamoxi(a) yaha buk saing tabina ba diti Danyel mahaing sangua bangguma. Diti mahaing masup, baing dibagu xap doa tela te, namua na hatum haringina mana Urana inia.

24 Baing xaitamoxi(a) tabina ba dituxu adi disu haruangua na Danyel ba. Tabina ba ditingdi digabu hainidingdi garadingdi mari layondi banggumidingia. Diri titia teguyu baing layondi dihixi manadi saing disingsingia sanggadingdi.

25 Baing Xaitamoxi Darias bung xailongga li mala rangua numanuma longgalo, bakbak longgalo xaung xuaxua longgalo duwa mana titi longgalo:

28 Baing ina naga, Danyel walinganoa aningong xai sibuna bungina Darias wa xaitamoxi xaung bungina Sairas mana Pesia wa xaitamoxi.