1 Wun Pol, God diki mawul wadilik tikuw, alik wun aka Jisas Krais dikidi diki maaj karay-kwanadi duw tinadiwun. Wun ki lapa nyig sukwutuwaal adiy Yipasis tipaam kwanadiy God dikidiy duw takwak, adiy kip Jisas Kraisak wukijibir kwakwanadiyik. 2 Wun bas situwabir nyanadi Asaay Godawa nyanadi Yitaypika Duw Jisas Kraisak gwurak kwiybirkik birikil sukwasukw kwurkwana mawul, aw gwuraam mwugiybirik kwusida-takaan tikwana mawul kwurgwurkik.

3 May nyan, Godak wayapiy sinaak, adi nyanadi Yitaypika Duw Jisas Krais dikidi Asayik. Aw nyan mwiya mwiyab Jisas Krais wukin nak tibanalik tikuw, di bwu miyawa yabir sukwasukw kwurdidiyan di dikidi Mawul kwiydidiy adawur tipa kidiy apaar. Alik tikuw, aw God atawa kwurdalik tikuw, may nyan dikik wayapiy sinaak. 4-5 Mwiya tayir God kidi kupw yitak maarkuw nibway, di bwu tasakwujibira-didiyan mwiya di dikidiy tibakikik, Jisas Krais wukin patin tikuw. Aw di atawa kwurdil aw nyan mwiyir rivibakik diki mwutamaam rasin mwiya mwiyab mwiya viyakit di diki milaam mwiyir tibakikik. Aw di nyanak mawul yidalik tikuw, God bwutaay tasakwujibira-didiyan Jisas Kraisaar di dikidiy nyanugw tibakikik. Akaanaka, diki mawul waal atawa kwurik. Aw alik tikuw, di bwu sukwasukw kwurdidiyan. 6 Atawa wukikuw, God bwu di dikidi mawul yididi Nyan nyanak kwiydid. Aw God atawa kwurdilik tikuw, may nyan dikik wayapiy sinaak diki mwiya viyakita sukwasukw nyanak kwurkwana mawulak. 7-8 God miyawa jaav dayadiy maaw lakwukuw, di diki sukwasukw kwurkwana mawul nyanak mwiya samasam apiydab apiydab kwiydil. Aw di dikidi Nyan diki kiyadil kiyaar nyan vaal tabaam tibaak nyigilkuw, di nyanadiy vaal yibwiy-didiy. 9 Mwiya bas God pakwun rina yawiy tasakwudil ginyir Jisas Kraisaar kwurkwurik. Aw ki pakwun rina yawiy diki mawul waal kwurdikik di nyanak simakadil. 10 Aal pakwun rina yawiy God bwu tasakwudil ginyir kwurkwurik, aal kika, aal di diki tasakwudil nyab di adiy miyawa yitakadidiy jaav nakamwiyib vagaruw-kidadiy, kidi kupwa javiwa adawur tipaam tinadiy jaav aw mwiyir abab nak tidakikik tikuw Jisas Krais tabab. 11 God ababa jaav bwu kwurdidiy diki mawul walil pik. Aw mwiya bas di tasakwu-jibiradil nyan Jisas Krais wukin patin tikuw, dikidiy duw taakw tibakikik. 12 Atawa tikuw, nyan Juw duw taakw taay mwiy taay Jisas Krais wukijibir tidiy duw taakw nyigil-dadiy day God dikidi gwalugwum wuladakik tikuw nyan adi apawa gilabadiy tikwanadi Godak wayapiy sinaak. 13 Aw kwukir gwur, adiy nuwukadiy jaka tipa kidiy duw taakw, ata wukigwuril ki Viyakita Maaj. Aal God diki Viyakita Maaj Jisas Kraisa danik tikuw, gwuraam nyigildilik tikuw, vaal liki tabaam tigwurik. Aw aal Viyakita Maaj wukikuw, gwur ata ya Jisas Kraisak wukijibir tidiygwurik. Aw God ata dikidi Mawul gwurak kwiydid aw mwiyir simakak tikuw gwur dikidiy-adiygwurik waan. Aw mwiya tayir God aban takadil atawa kwurkwurik abab Kristen duw takwak. 14 Aw God di dikidi Mawul nyanak kwiykuw, di simaka-dadiyan nyan adiy God di dikidiy duw takwak kwiyik aban takadidiy jaav ginyir kwur-kibanadiy dikiwa adawur tipaam kwabaak. Aw God dikidi Mawul, aad adiy miyawa God kwiyik aban takadidiy jaav dayadi taay am nak-ad. Ayiy, God dikidi Mawul kip nyan adiy miyawa duw taakw God dayaam vaal tabaam tidaak, nyigil-didiy adiy nyanawa tijibir tikinaad aw yin nyanak kwiykidadiy jaav kwur-kibana nyab. God bwu kwurdil ki mwiya mwiyaba mwiya viyakita jaav. Alik tikuw, may nyan dikik gaba maaj sukwunaak. May nyan dikidi saam kirasinaak.

15-17 Aw God nyanaam atawa sukwasukw kwurdilik tikuw, aw wun maaj wukikuw gwuraki Yitaypika Duw Jisas Kraisak wukijibir tikwagwura mawulawa miyawa God dikidiy duw takwak yikwagwura mawulak tikuw, wun nyanyi gwurak titaay Godak wayapiy sikwatuwaad. Aw wun Godak bas sikwatuwa adi mwiya mwiyaba mwiya viyakita nyanadi Yitaypika Duw Jisas Krais dikidi Asayik gwura danik titaay. Wun bas sikwatuwaad di gwurak dikidi Mawul kwiydikik. Aw God dikidi Mawul sugwiyaan kwur-kidadiygwurik mwiya mwiyab Godaam lakwuyaki-gwurkik. Di gwurak mwiyir simaka-kidadiygwurik God diki maaw. Aw gwur ata mwiyir lakwu-kigwuraad. 18 Wun Godak bas situwaad gwuradiy mawulaam sisuwdik aw mwiyir day tugwaam nadaak gwur mwiyir lakwu-gwurkik adiy kwur-gwurkik tasakwu-didiy mwiya viyakita jaav. Adiy tasakwu-didiy di dikidiy tikinadiy duw taakw, day kwurkidanadiy dikib mwiya mwiyaba viyakita jaav adawur tipaam. 19-20 Wun Godak bas situwaad gwuraam sugwiyaan kwurdik aw gwur lakwugwurkik diki mwiya nima ap, nyan aal dikiwa Jisas Kraisaam wukijibir tikwanadiy duw takwaam sugwiyaan kwurkwalal apak wakuw. Aw Jisas Krais kiyakuw ridik, God a apaar kirapitakadid. Kirapitakakuw, taay yitaypika duw tamiyaam di dikidi mava tabawa takadik, rinaad adawur tipaam. 21 Alim Jisas Krais miyawa javim van tidadiy. Di mwiya mwiyab adiy duw takwaam van tikwanadiy duwaam ab mwiya yitaypik-ad. Dikidi si mwiya yitaypik-ad adiy kidi kupwaam van tinadiy duwaam ab. Awarab adawur tipaam tinadiy duwaam ab dikidi si mwiya yitaypik-ad. Ayiy, di miyawaam apiydab apiydab yitaypik tikwanaad. 22 God bwutaay miyawa jaav Jisas Krais tabaam takayaki-didiy. Awarab tasakwudid Yitaypika Duw tikuw, miyawa God dikidi gwalugwa kidiy duw takwaam van tidikikik. 23 Jisas Krais mwugiy-kwadadiy miyawa jaav gaaj yan tidakikik. Aw ababa God dikidi gwalugwa kidiy duw taakw, day Jisas Krais dikidi amwiy pik tidaak, aw day dikiwa wukin patin tikuw, di gaaj yan tikinaad.