Kareba Kadoresan nauki'
Yohanes
Pungngu' tannunna
Inde sura'e nauki' Yohanes, passikolana Puang Yesus to randan napakamaya (Yoh. 13:23; 19:26; 20:2; 21:2-7; 21:20-24).
Illaan inde Kareba Kadoresanne, Puang Yesus digente' Battakada to innang dengammo mengkalao dio mai. Iamo lumalin mendadi ma'rupa tau anna torro illaan alla'-alla'na ma'rupa tau. Ia nangei ummuki' inde sura' Yohanes-e anna malara: “...muoreanna' kumua Puang Yesusmo To dibassei bayu-bayu la ma'pasalama', Anakna Puang Allata'alla; anna la ullolongangkoa' katuoan ummolai kapangngoreanammu lako kalena.” (20:31).
Mangkai nasu'bak kumua inde Battakada iamo Puang Yesus-e, napatarru'mi untetteran tanda memangnga-mangnga napogau' Puang Yesus. Iamo te mai tanda memangnga-mangngae umpakawananni kumua Puang Yesusmo To dibassei bayu-bayu la ma'pasalama', to masaemo naampai to Yahudi, Anakna Puang Allata'alla. Sisala-sala pikki'na tau ummita tanda memangnga-mangnga napogau' Puang Yesus, dengan ummorean Puang Yesus, dengan duka' umbalii (2:1-12:50). Illaan 13:1-17:26 dipomaleso diuki' umba nakua sipakamayanna Puang Yesus anna passikolana anna la dipealaimo Puang Yesus bongi iatoo. Diuki' toi diona kada pa'pakaranganna Puang Yesus lako passikolana. Illaan 18:1-21:25 diuki' diona Puang Yesus dipealai, dibisara, dipatei yao kayu pantokesan, tuo sule, anna umpa'paitaan kalena lako passikolana.
Randan ma'bukunna inde pangnguki'na Yohanes-e iamo diona katuoan sae lako-lakona napebengan Puang Allata'alla ummolai Kristus. Katuoan iatoo naparandukmi inde lino, anna mala natarima to ummorean Puang Yesus kumua: Puang Yesus lalan lako kamaloloan anna katuoan bakaru. Dengan pira-pira pa'rapanan naala Yohanes susinna wai, roti, kamasiangan, to ma'kambi', domba, to' anggur sola tangkena anna budapa senga'na.
Lesoanna issinna
1. Su'bakan Kada (1:1-18)
2. Tanda memangnga-mangnga napogau' Puang Yesus sola pepatudunna umpakawanan kalena anna malara naissanan ma'rupa tau kumua Anakna Puang Allata'alla (1:19-12:50)
a. Pa'parandukanna pengkaranganna Puang Yesus inde lino (1:19-4:54)
b. Kara-kara dadi dio Yerusalem illaan allo Katorroan (5:1-47)
c. Kara-kara dadi dio Galilea illaan allo Paskah (6:1-71)
d. Kara-kara dadi dio Yudea illaan allo kamai Ma'lantang Daun (7:1-10:21)
e. Kara-kara dadi dio Yerusalem illaan allo kamai umpengkilalai anna diseroi Banua Ada'na Puang Allata'alla (10:22-42)
f. Kara-kara dadi illalan attu ummampai la dipakaroa' allo Paskah katampakanna natongkonni Puang Yesus (11:1-12:50)
3. Pepatudunna Puang Yesus lako passikolana attunna bongi la dingei umpateii masiangna (13:1-17:26)
4. Puang Yesus dipealai, dipatei, anna tuo sule (18:1-20:29)
5. Balayanna dingei ummuki' inde sura'e (20:30-31)
6. Mangkanna tuo sule Puang Yesus, umpa'paitaan kalena lako passikolana (21:1-25)
1
Battakada Mentau Mata
1 Bunga'-bunga'na, ta'pa dikombong inde linoe, innang dengammi to digente' Battakada. Inde Battakadae sola Puang Allata'alla anna ia siamo Puang Allata'alla. 2 Innang siba'ba'mi Puang Allata'alla mengkalao dio mai. 3 Angga lako napadadi Puang Allata'alla ummolai Battakada. Angganna dionamo reen, tae' la mala dadi ke tae' ummolai Battakada. 4 Inde Battakadae iamo to'na katuoan anna inde katuoanne iamo kamasiangan ummarrang ma'rupa tau. 5 Kamasiangan iatoo pangngarrang illaan kamalillinan anna tae' nabela napi'dean kamalillinan.
6 Tapakala saemo mesa tau nasua Puang Allata'alla disanga Yohanes,* Yohanes: Yohanes to simantedok. 7 la umpalanda' kareba diona inde kamasianganne anna malara naorean rupa tau. 8 Inde Yohanes-e tangngia to digente' kamasiangan sapo to umpalanda' kasa'bian diona inde kamasianganne. 9 Annu kamasiangan tongan la ummarrang ma'rupa tau mane la sae.
10 Inde Battakadae innang illalammi lino. Sapo tae' naissanan ma'rupa tau moika anna ummolai inde Battakadae Puang Allata'alla umpadadi lino. 11 Sae umpellambi'i lembangna sapo nasumbala satondokna. 12 Sapo' dengan duka' tau untarimai anna ummoreanni. Inde mai taue napopendadi anakna Puang Allata'alla. 13 Tae' nadadian ummolai kasipobainean susi kasipobaineanna ma'rupa tau, tangngia toi situru' pa'kuanna ma'rupa tau sapo situru' pa'kuanna Puang Allata'alla napolalan napopendadi anakna.
14 Inde Battakadae mangka mendadi rupa tau anna torro illaan alla'-alla'na ma'rupa tau anna kikawanammo kamatandeanna. Inde kamatandeanne nabenganni Ambena annu iamo Anak mesanna. Iamo tapolalan ungkaleso Puang Allata'alla sola pa'kamasena lako kaleta.
15 Umpalanda'mi kasa'bianna Yohanes diona inde Battakadae, nakua: “Iamo te to sikupokadae, kumua: ‘Dengan la sae windingku sapo marru matande ia anna kao, annu ta'pakkao dadi anna innang diomo ia reen.’ ” 16 Tadiissan dianggai pa'kamasena napolalan tae' dengan kattu pa'tamba'na lako kaleta. 17 Musamo nasua Puang Allata'alla umpalandasangki' parentana, sapo kamatutuanna anna pa'kamasena Puang Allata'alla takawanan illaan kalena Yesus Kristus. 18 Tae' dengan tau mangka ummita Puang Allata'alla salianna Anak mesanna, To nasirantean, To sisola liu Ambena. Iamo umpakawanan Puang Allata'alla lako kaleta.
Kasa'bianna Yohanes to simantedok
Mat. 3:1-12; Mrk. 1:1-8; Luk. 3:3-6, 15-17
19 Susi inde kasa'bianna Yohanes-e anna sae pira-pira imam sola peampoanna Lewi† peampoanna Lewi: To siumpamoloi imam umpare' kapemalasan illalan Banua Ada'na Puang Allata'alla. Itai Bil. 3:6-10. nasua perepi'na to Yahudi dio mai Yerusalem, mekutana lako nakua: “Bennaroko iko tee?”
20 Mangngakumi Yohanes tala nagaraga-ragai nakua: “Tangngiana' To dibassei bayu-bayu la ma'pasalama'.”
21 Nakutanai pole omi nakua: “Bennaroko iko? Eliarokoka?”
Natimba' nakua: “Tangngia.”
Mekutana pole omi nakua: “Ikomoka nabi to diampai?”‡ Itai Ul. 18:15, 18; Mal. 4:5.
Natimba' nakua: “Tangngia.”
22 Nakutanai polemi nakua: “Bennanna tappa'roko iko, annu' la kiissan kipalanda' lako to ussuakan. Tulasangkan sitonganna benna tappa'ko.”
23 Natimba' Yohanes nakua: “Kaomo te to metamba-tamba dio padang alla'e kumua maloloananni lalan Dewatanta.” Situru' kadanna nabi Yesaya.§ Yes. 40:3.
24 Inde to disuae dengan pira-pira to Farisi, 25 mekutana nakua: “Maakari ammu mantedok anna tangngiako para' To dibassei bayu-bayu la ma'pasalama', tangngiako Elia, anna tangngiako nabi to diampai?”
26 Natimba'mi Yohanes nakua: “Wai kao kupopantedok. Sapo dengan illaan alla'-alla'mua' to tamuissanan. 27 Windi ia sae anna kao sapo moi angga pepori palopakna la kubukaianni tae' tona' la sipato'.”
28 Kara-kara iatee dadi dio Betania, tandai lianna Salu Yordan sinangei mantedok Yohanes.
Kasa'bianna Yohanes kumua Puang Yesusmo to digente' Anak Dombana Puang Allata'alla
29 Masiangna polei, naitami Yohanes sae Puang Yesus umpellambi'i. Ma'kadami Yohanes nakua: “Petua'mia', iamo te Anak Dombana Puang Allata'allae To la umpa'dei kasalaanna ma'rupa tau. 30 Iamo napatu tula'ku kumua: ‘Dengan la sae windingku, sapo marru matande ia anna kao annu innang diomia reen angku mane kao dadi.’ 31 Ambo' tae' kuissanan kumua iamo To dibassei bayu-bayu la ma'pasalama', moi kenada iamo kungei sae umpopantedok wai anna malara naissanan to Israel.”
32-33 Sitarru'na kasa'bianna Yohanes nakua: “Attu iatoo ta'pa kuissanan kumua iamo To dibassei bayu-bayu la ma'pasalama'. Sapo mangka ma'kada lako kaleku Puang Allata'alla to ussuana' umpopantedok wai kumua: ‘Ianna ummitako mesa tau sae narampoi Penawa Maserona Puang Allata'alla, tau iamo too la umpopantedok Penawa Masero.’* umpopantedok Penawa Masero: Kalembasanna umbeen Penawa Masero ma'rupa tau anna mala mengkarang illaan penawanna anna pa'gurui diona pa'kuanna Dewata. Tapakala kuitamo Penawa Masero turun yao mai langi' susi dangan-dangan urrampoi Puang Yesus. 34 Melolomo' ummitai anna kupa'pesa'biammo kumua iamo Anakna Puang Allata'alla.”
Bunga' Passikolana Puang Yesus
35 Masiangna pole oi, dio omi angngenan iatoo Yohanes sola dua passikolana. 36 Tappana ummita Puang Yesus liu, ma'kada siami Yohanes nakua: “Itamia' Anak Dombana Puang Allata'alla.” 37 Inde kadanna Yohanes-e narangngi dua passikolana napolalan mengkalao ummula' Puang Yesus.
38 Messaile Puang Yesus lako boko'na, naitami naula' inde passikolae. Nakutanaimi nakua: “Akaraikoa' mupeang?”
Natimba' nakua: “O Rabi, umbaraiko mungei torro?” (Rabi kalembasanna tuangguru).
39 Natimba' Puang Yesus nakua: “Maimokoa' ammu itaii.” Le'ba' tongammi sola napolalan naita angngenanna. Attu iatoo umbai la tettek appa'mo karuen, torropi sola Puang Yesus sae lako bongi.
40 Inde passikola to urrangngi tula'na Yohanes anna unturu' Puang Yesus-e, disanga Andreas mesa, sirondongna Simon Petrus. 41 Le'ba siami lao umpeang Simon Petrus anna kuanni: “Silambi'mokangkami Mesias.” (Mesias, kalembasanna Kristus illaan basa Yunani.)† Mesias anna Kristus susi siami kalembasanna, iamo: To dibassei bayu-bayu la ma'pasalama': “Mesias” basa Ibrani anna “Kristus” basa Yunani.
42 Nasolaammi Andreas lao umpellambi'i Puang Yesus. Nanenne'imi Puang Yesus anna kuanni: “Iko Simon anakna Yohanes,‡ Yohanes: Illaan basana to Yahudi, disanga Yona battu' Yunus (Mat. 16:17). la disangamoko Kefas.” (Kefas, illaan basa Yunani disanga Petrus.)§ Kefas anna Petrus susi kalembasanna iamo: batu.
Filipus anna Natanael natambai Puang Yesus
43 Makale'na, napatantumi Puang Yesus la lu lako Galilea. Umpellambi'imi Filipus anna kuanni: “Maiko ammu turu'na'.” 44 Inde Filipus-e to lu dio mai Betsaida tondok kadadianna Andreas sola Petrus.
45 Laomi Filipus umpellambi'i Natanael anna kuanni: “Silambi'mokangkami to sinatula' Musa illaan sura' pepa'guruanna anna sinapa'paissanan angganna nabi. Inde taue disanga Yesus, anakna Yusuf to Nazaret.”
46 Ma'kada Natanael nakua: “Dengangka leleanna to mapia la buttu dio mai tondok Nazaret?”
Natimba' Filipus nakua: “Maimoko ammu itai.”
47 Naitanna Puang Yesus sae Natanael umpellambi'i, ma'kadami untula' Natanael nakua: “Itamia' inde to Israel tonganne, to tama'dua tambuk.”
48 Ma'kadami Natanael lako Puang Yesus nakua: “Umba nakua ammu issananna'?”
Natimba' Puang Yesus nakua: “Ta'poko natambai Filipus angku itamoko dio to' ara.”
49 Nakuamo Natanael: “O Tuangguru, Anaknako Puang Allata'alla! Tomarayanna tongammoko to Israel!”
50 Natimba' Puang Yesus nakua: “Muoreammi annu' mangkako kutulasan kumua kuitako dio to' ara. La dengan polepi kara-kara kamai la muita. 51 La ummitako langi' titungka' anna malaeka'na Puang Allata'alla la ma'turun teka' umpellambi'i Anak Mentolino. Iate tula'kue tonganna.”
*1:6 Yohanes: Yohanes to simantedok.
†1:19 peampoanna Lewi: To siumpamoloi imam umpare' kapemalasan illalan Banua Ada'na Puang Allata'alla. Itai Bil. 3:6-10.
‡1:21 Itai Ul. 18:15, 18; Mal. 4:5.
§1:23 Yes. 40:3.
*1:32-33 umpopantedok Penawa Masero: Kalembasanna umbeen Penawa Masero ma'rupa tau anna mala mengkarang illaan penawanna anna pa'gurui diona pa'kuanna Dewata.
†1:41 Mesias anna Kristus susi siami kalembasanna, iamo: To dibassei bayu-bayu la ma'pasalama': “Mesias” basa Ibrani anna “Kristus” basa Yunani.
‡1:42 Yohanes: Illaan basana to Yahudi, disanga Yona battu' Yunus (Mat. 16:17).
§1:42 Kefas anna Petrus susi kalembasanna iamo: batu.