2
Yesus yfi fraa sau ro mroon
1 Feto to, noo bo mkair to, mbeak: Nno bo ro mkair kʼraa to ma. Besruf raa anya ma. Sioh nmo tite to ma. Tna nsu mase bo raa ma. Naam bo ro raa anya mse to ma. Ntoo raa anya ma. 2-3 Anu nhar oh nwe Tuhan tait yoof. Mazmur 34:8. Feto to, nnaut Watum ro Tuhan yoyo; nfi ku mees ro ja mnaut sis mait. Mait tna kbe mabi tna masen matak. Watum ro Tuhan reto mnan fi sis maya ro moof. Kbe mno bosmot ranu mrok matak. 4 Nma no kʼYesus. Ait yfi fraa sau ro mroon. Fraa reto to, raa beak makus. Menohe Allah ysok fraa reto yawe fraa ro mabyoh maut, fraa ro ati. 5 Anu to nfi fraa ro mroon ye. Tna Allah yoo anu re kbe sgi yuk ro Ait yhau. Anu, raa mkbair rAit to nfi Samu ro Allah. Ait ysok anu re nhau nno bo wAit: Nfi imam wAit. Anu smot Yesus Kristus tibyo ja nno bo moof, bo ro mno Allah yhaf mnan oh meto. Bo ro anu nno weto to, mnan bosan ro anu nsan kʼAit. 6 Bokom ro Allah mawe Yesus ynan fi fraa. Mkyas mawe:
“Nmat, Jõ tsok ‘Fraa’ sau ro mabyoh maut. Jõ too ‘Fraa’ ati reto tse mam Sion. Tna raa ro smot Ait to, meen sraujin fee.”
Yesaya 28:16
7 Anu ro smot Yesus nnaut nwe Ait yfi 'Fraa' ro mabyoh maut. Menohe raa taro mnaut feto fee. Ana weto smot Ait fee. Bokom ro Allah mawe:
“Tiwya raa ro sgi amah to, moo ‘Fraa’ reto beak makus. Menohe mfo refo ‘Fraa’ reto mamo ‘Fraa’ ro ati syok.”
Mazmur 118:22
Tna mawe,
“ ‘Fraa’ reto mburut wa iso. Tibyo raa wasim tna mbtek mawe.”
Yesaya 8:14-15
8 Raa ro smot Yesus fee ja mari bokyas ro Allah fee ye. Mbo mno fee. Tibyo ana mbtek mawe. Tiwya tinyi Allah ysok ana fee. Ati ro ana marak fares to, Ait yhar yawe meen ana weto kbe mbtek mawe. Roma 9:22.
9 Menohe anu to, raa mkbair ro Allah ysok. Anu to, nfi imam sor ro mno bo ro Allah wAit. Anu to raa mana rAit. Anu nmo raa mkbair rAit. Allah yno bo weto afo re kbe anu nkyas yase rAit kʼraa. Tiwya anu nhau mam wore wo mamur. Menohe Ait ytu anu oh, yawe frok. Ytu anu yawe nma nhau mam wore wo kek. Yawe nhau mam wore wo kek rAit ro msai toni. 10 Tiwya anu to raa wAit fee. Menohe mfo refo anu nmo raa mana rAit oh. Tiwya anu nhar boatmof rAit fee. Menohe mfo refo to, anu nhar boatmof rAit oh. Hosea 2:22.
11 Tafoh na wojõ; anu nfi raa srim mam tabam refo.* Tabam ranu ro ati to, sawro ro Allah. Anu bhau mam tabam refo boti sai. Feto to, nnaut anu, afo re anu srau oot-oot nno bo ro mkair to ma. Nno ma be kbe bo ro mkair weto mno wa anu tna kbe kro Tuhan kaket fee. 12 Mam wore anu nhau mam tabam refo to, kaket anu, nhau nno bo ro moof sai. Feto tna mfi bo raa ro wase Allah sioh mawe anu nber safo aro to, kbe ana mhar mam mhaf mato wana mawe ja anu nno bo ro moof sai. Ana mmat bo moof ro anu nno weto. Tibyo meen, ati ro Allah yama to, kbe ana bibi Ait.
Nri bo ro raa mase mbis kʼanu to, nbo nno
13 Nri bo ro raa mase mbis kʼanu to, nbo nno. Bo ro Tuhan ksoh oh meto. Nri raja ro yase, 14 tna nri gubernur bo ye. Ana weto to raabis ro raja.Raja sor ja mbis gubernur bo mawe moo safo mee kʼraa ro mno bo mkair. Tna ana bibi raa ro mno bo moof. 15 Raa taro wase bo tna wase Allah ye. Tna kbe ana sioh mawe anu nno bo ro mkair. Allah ksoh yawe anu nhau nno bo ro moof sai yoyo. Tibyo raa mmat tna mhar he raa weto to mkyas bo sioh sai. Tna re kbe raa mari bokyas rana fee. 16 Nnaut: Tiwya ⌞iro bo to⌟ make anu. Menohe mfo refo anu kro Yesus. Tibyo yno anu rero; bo reto make anu u fee. Nnaut feto mam nhaf mato wanu wia tna nwe kbe anu nhau nno bo ro moof sai. Nno be anu aro nno bo ro mkair wai. Nnaut nwe anu nmo sryan ro Allah wAit re nhau nno bo ro moof sai. 17 Hartu raa ro mase. Nhau to, nmat raa anya. Natmof raa anya ro smot Yesus. Waa bi Allah. Tna heyut nmat raja.
18 Anu ro nmo sryan boh ro raa: Tawe nri bo ro bobot wanu mawe to, nbo nno. Heyut nmat ana ro mhaf moof ye, tna heyut nmat ana ro mbait ktan-ktan to ye. 19 Soh raa mno bo ro mkair kʼanu to, rau ro moof to, anu kanyin sai, kmo ma. Ati ro nno bo moof menohe bo ro mkair mai si to, nnaut nwe, “Allah ksoh yawe jõ thau thaf moof, ska si bo fee.” Soh anu beroh nno bo moof sai to, reto moof. 20-21 Menohe soh anu nno bo ro mkair, tibyo raa mai; feto tna anu kanyin sai, kbe Allah bibi anu fee. Soh anu nno bo ro moof menohe raa mai to, anu nnan fi Yesus oh meto. Soh anu nno bo moof feto tna beroh nsom bo mkair ro mai kʼanu si to, tna kmo fee, feto kbe Allah bibi anu. Tiwya raa mai Kristus. Bo ro mkair mama mai Kristus menohe Ait kanyin yasom. Ja yno bo moof menohe yasom bo mkair ro mai Ait. Yasom afo re kbe Allah kmo anu fee. Tiwya raa mno bo mkair mai Kristus, menohe yhaf rAit moof fares. Tna Allah ysok anu ybis yawe soh raa mno bo mkair mai kʼanu to, anu nsom bo ro msai reto; nno mnan tiwya Ait yno feto ye. 22 Bokom ro Allah mkyas Yesus mawe:
“Ait ja yhar iro yno fee. Ait sioh fee.”
Yesaya 53:5-9
23 Tna mam ati ro raa mamus Kristus to, Ait yamus ana ska si fee. Ati ro raa mno bo ro mkair-kar kʼAit to, Ait kmo si fee. Ait yhar yawe bombra weto Allah ymat. Tibyo Ait shait kanyin yasom sai. Yhar yawe meen Allah yros susai ska bAit. Ait raa ro yros susai; ja soko raa sait ye fee. 24 Anu bno iro. Menohe Yesus oh mi raa mame yajat mam ara warok. Ait yesait yasom iro wanu ro bno tna raa mame yajat. Yno afo re anu be bno iro u fee. Tna bhau bno bo ro Allah ksoh sai. Raa mai Ait afo re anu bhau boof. 25 Tiwya anu nri bo ro Ait yawe fee. Tibyo anu nmo tiit. Anu nfi domba ro mesait mhau kar; tna raa ro ja yatam tna kmot domba weto to yarak. Tna mfo refo anu hah ne nmo no kʼAit oh. Ait kbe yatam anu tna kmot anu.