1 Wiswisngit pun si Chuminggu, ummoy cha byebyai si lobon. Inyawitcha cha inyalachaʼn mambyangun apɏus. 2 Lichuumcha pun si lobon, inchesanchaʼn lapulig liyachayu chi byetuʼn tangob chi lobon. 3 Ot lillumlokcha ngim lappun inchesancha si lecheg Apu Jesus. 4 Sintataegchaʼn summisiked lu silu lakwa. Ot maeg ga lampaila si cheegcha cha chuwaʼn leɏakiʼn malilisiling chi silupcha. 5 Si ilogyatcha, lampalintumingcha ot kalancha hachiʼn leɏaki, “Payuggey sington chi latattagu si igew chi latoy? 6 Lappun siya utla, ti ummuli latagu. Somsomkonyu imbyegala kan chikayu si inggewalaʼd Galilee, 7 un kalala, Sakon un Alak chi Tagu, masapuɏʼn mipuɏangak kan cha malagbyasuɏ ya milansaak si krus, ked lu mikatluʼn eɏgew umuliyak matagu.” 8 Oli pun laslasmok cha byebyai imbyegan Jesus.

9 Ot langulincha si ili ot imbyegacha losan kan cha simpuɏu ya ossaan un disipulusla ya cha uchum un kadwacha. 10 Cha hachin byebyai, si Mary Magdalene, Joanna, Mary un ilan James, ya inggew cha uchum un byebyaiʼn langibyega kan cha apostoles. 11 Ngim achipun cha apostoles lamati kan chicha, ti kalancha pun lu soysoyog chi ibyegbyegacha. 12 Ngim lawalaswas si Peter un ummoy si lobon. Lichuum pun, lan-okog un langitullong si chaɏomla ked abus chi bussungla un inggew. Ot langulin un laslaschaaw lu silu lakwa.

13 Si hachiʼn eɏgew, malidtidchaɏan cha chuwaʼn disipulus Jesus un umoy si iliʼn mangngachen Emmaus, lasuɏuk un simpuɏu ya osaʼn kilamitro kaachayulaʼd Jerusalem. 14 Ug-ugguchoncha losan un laklakwa. 15 Si pin-acha man-ug-ugguchen, kummatam si Jesus ot makabuɏog kan chicha. 16 Intullongcha siya ngim achipun cha immatulan siya. 17 Kalan Jesus kan chicha, “Himmaga pin-ayu ug-ugguchon un malidtidchaɏan?”

Ot ummillongchaʼn manchachauycha. 18 Oli pun kalan chi osa un mangngachen Cleopas, “Ha kaggegetongkaʼd Jerusalem un sika ga lappun ammulad chi lakwa si lummaus un eɏgew?”

19 Kalan Jesus, “Simma lakwa?”

Ot kalancha kan siya, “Ha lakwa kan Jesus un iNazareth. Siya ked propeta un imbilang Apudyus ya losan un tagu un mallakabyelin un mantudtuchu ya mangwa si lakaskaschaaw. 20 Impuɏang cha ap-apun cha papachi ya cha papangat taku kan Pilate ot kilodchongalaʼn matoy, ot illansacha si krus. 21 Ngim lilamlamami siya un manwayawaya kan cha Israel. Chakampun abus hachi, mikatluʼn eɏgewla sala malipud si lakwa kan siya. 22 Sintataeg kami si imbyegan cha uchum un kadwamiʼn byebyai. Ti likawisngitcha ummoy si lobon, 23 ngim lappun inchesancha si lechegla. Langulincha ot imbyegacha kan chikami un intullongcha angheles un langibyega un ummuli latagù Jesus. 24 Ummoy cha uchum un kadwami si lobon ot inchesanchaʼn tuttuwa imbyegan cha byebbyebyai, ngim lappun intullongcha kan Jesus.”

25 Oli pun kalan Jesus kan chicha, “Laog-oggogen kayu! Puggey un mangkallut chi mamatiyanyu si losan un imbyegan cha propeta! 26 Ha achipunyu maawatan un masapuɏʼn mapaligatan chi Kristu, asi ot michayaw?” 27 Ot impakaawat Jesus kan chicha cha losan un liigili mipanggop kan siya, illugila si libluʼn inggilin Moses inggala si losan un inggilin cha propeta.

28 Ummachalicha pun si iliʼn ayancha, isun chi mangkaw-as umoyon si Jesus. 29 Ngim tilawichencha siya un kalancha, “Umiyan taku ti allaʼn gumikbot.” Ot lanchegas kan chicha lakaiyan.

30 Ot langkakakancha pun, illaɏan Jesus chi tilapay ot lanyaman kan Apudyus ot pilispis-igla ot illidchola kan chicha. 31 Oli pun laimatulancha si Jesus, ngim kakma lappun siya. 32 Ot kalancha, “Apaampay un amod chi galasta geled si makaug-ugguchela kan chita si chaɏan si langipakaawatala si liigiliʼn ugud Apudyus!”

33 Ot lelibbyatcha langulin ud Jerusalem. Ot inchesancha cha simpuɏu ya osaʼn disipulus Jesus un lachagup udchi ya cha uchum un kakadwacha. 34 Ot kalancha, “Tuttuwaʼn ummuli latagu si Apu Jesus! Lampaila kan Simon!” 35 Oli pun imbyegan cha hachiʼn chuwa chi lakwa si inggewancha si chaɏan ya langimatulancha kan Apu si lamispis-igela si tilapay.

36 Sissiyaʼn man-ugu-ugudcha ot kakma lampaila si Apu Jesus si gawacha, ot kalala kan chicha, “Bibiɏu kayu otyan.”

37 Lakaogyatcha ya lakasuggayatcha ti kalancha lu aɏan chi intullongcha.

38 Ngim kalala kan chicha, “Pakayuggey umogyat ya manchuwachuwa mipanggop kan sakon? 39 Itullongyu imak ya ikik. Sakon mismu! Appachelak ta mat-op kayu, ti ha aɏan ked lappun long-egla ya tung-eɏla. Ngim mailayu un alla long-egku.”

40 Imbyegala hachi ot impailala kan chicha cha imala ya ikila. 41 Achipuncha pay laing mamati gapu ta amod chi galascha ya lakasuggayatcha. Ot ilimusla kan chicha, “Awed makan utla?” 42 Ot inchuslugcha kan siya lautun ikan, 43 ot illaɏala ot killanla si sangwalancha.

44 Oli pun kalala kan chicha, “Allaya cha inchaanku imbyegbyega kan chikayu si illinggewak kan chikayu. Masapuɏʼn matungpeɏ losan un liigili mipanggop kan sakon un liigili si Lintog Moses ya cha propeta ya kankanta un Salmo.”

45 Oli pun intaangla cha somsomokcha ta maawatancha liigiliʼn ugud Apudyus. 46 Ot kalala kan chicha, “Allaya liigili mipanggop kan sakon: Masapuɏʼn mapaligatan chi Kristu ya matoy ya umuli matagu si mikatluʼn eɏgew. 47 Ya masapuɏ boʼn mibyegbyega chameg si losan un ili mallugi ud Jerusalem, mipanggop si palagbyabyawin cha tagu ta mapakawan cha byasbyasuɏcha. 48 Ked chikayu malistigu si katuttuwaan cha losan un lakwa. 49 Ked ibuunku ingkarin Amak kan chikayu. Ngim masapuɏʼn iinggew kayu utla Jerusalem inggala awatonyu chi kilabyelin un lampeɏpuʼd langit.”

50 Oli pun impuyut Jesus chicha inggalaʼd Bethany. Gummatongcha pun udchi, intayegla imala ot bilinchisyulala chicha. 51 Si laminchisyulala kan chicha, lipangatu siyaʼd langit ot tilelala chicha. 52 Ot chilaychayawcha siya ot langulinchaʼd Jerusalem un amod chi galascha. 53 Ot biligat un umoycha si templo un manchaychayaw kan Apudyus.