Ha Liigili Kan Cha
Mamati Un
Hebrews
1
Jesu Kristu Langipatigammu Si Ugud Apudyus
(Jhn. 1:1-18)
1 Si awi, inye-eɏgew Apudyus lan-ugud kan cha aappu taku un impaibyegala kan cha propeta ya langkangkalasi in-ilola. 2 Ngim si alungus chi eɏgew, lan-ugud si Apudyus kan chitaku un iluseɏla Alaklaʼn Jesu Kristu. Siya chilutukan Apudyus un mangingkuwa kan cha losalosan ya migapu kan siya killingwala lubung. 3 Ked siya mangitullongan taku si kilabiɏun Apudyus ya siya issu-issun chi kila-Apudyus Apudyus. Ya siya mangipatpatuɏuy kan cha losan gapu si mallakabyelin un ugudla. Gilamputla ked killingwa machuɏsan cha tagu si byasuɏcha, langulin ud langit ot ummamuy si machuwalan un makaturay kan Apudyus un kangatuwan.
Langatngatu Si Jesu Kristu Lu Cha Angheles
4 Lambyalilon Apudyus langatngatu Alakla lu cha angheles, ya lapotpotog chi ingngachen Apudyus kan siya lu chicha. 5 Ti lappun langibyeg-an Apudyus kan cha angheles si imbyegala kan Jesus:
“Sika Alakku, si salaʼn eɏgew sakon chi Amam.”* 1:5 Psalm 2:7; Acts 13:33
Ya lappun bo anghel un langibyeg-an Apudyus si alla,
“Sakon chi man-Amam, ked sika man-Alakku.”† 1:5 2 Samuel 7:14
6 Ngim alla pun akit chi mangibuulan Apudyus si lapotog un panguɏun Alakla si lubung, imbyegala alla,
“Losan un angheles Apudyus, masapuɏʼn
mampalintumingcha manchayaw kan siya.”‡ 1:6 Mipanggop si ibilang Apudyus un panguɏu, itullongyu 12:23. Mipanggop bo si kalobbongan chi panguɏu
7 Allaya imbyegan Apudyus mipanggop kan cha angheles,
“Cha anghelesku un bubùulok ked makwaʼn
mambyalilok chicha bidbid ya
gumilegileb un apuy.Ӥ 1:7 Psalm 104:4
8 Ngim ha Alakla imbyegan Apudyus,
“Sikaʼn Apudyus, manturayka si ing-inggala!
Lalintog chi in-ilom un manturay.
9 Pipiom chi kilalintog ya issam cha lawwing.
Ked Sakon un Apudyuslu, chilutukak sikaʼn Apudyus
ya lambyalilok sika laganggalas lu cha kakadwam.”* 1:9 Psalm 45:6-7
10 Ya kalala bo,
“Ha chamchamu, Sika, Apu un langwa si allaʼn pita
ya cha losan un awed ud langit.
11 Ked ulay lu maumas losan cha killingwam, sissiyaka ing-inggala.
Ngim cha killingwam, chumachaancha un
isun chi chummachaalan cha luput.
12 Tipliyom chicha un isun chi kagoy, ked masukatancha.
Ngim sika, lappun mambyambyaliwam si ing-inggala,
ulay lu katawwo-tawwon, lappun kiged chi mataguwam.Ӡ 1:12 11-12 Psalm 102:25-27
13 Ya lappun langibyegaan Apudyus kan cha alla si ulay silun anghel, abus chi Alakla,
“Umamuyka si machuwalanku un makaturay inggala ipaabyakku
cha losan un kabusuɏm ta chicha isun chi papattayan chi ikim.”‡ 1:13 Psalm 110:1; Acts 2:34-35
14 Silu lù cha angheles? Chicha Ispiritu un mansimsimbi kan Apudyus ked chicha ibuunla un tumuɏung kan cha taguʼn taguwola.