1 Si chaampunyu mamatiyan kan Jesu Kristu, lappun lamlamayuʼn mipati kan Apudyus, ti isuyu lalattoy kan siya gapu si byasuɏyu. 2 Ked si hachi, pin-ayu killingwa ugalin cha achipun mamati, kan tiluttuwayu bo cha pion Satalas, un siya mangichaɏan si losan un alla kilabyelincha un achipun maila, ya cha losan un achipun mamati. 3 Ya ulay chitaku losan, hachi bo killingwa taku si chaampun taku mamatiyan kan Jesus, ti killingwa taku cha byaɏanglaʼn pion chi long-eg ya cha laslasmok taku. Ked lappun lansabyaliyala kan chitaku ti sigud un lobbong taku un machusa, un isun chi machusaan cha losan un achipun mamati.

4 Ngim si Apudyus, lappun miyisuwan chi ayatla kan chitaku, ya lappun bo miyisuwan chi manchechegula, 5 ti ulay lu isu taku lalattoy kan siya gapu kan cha byasuɏ taku si chaampun taku mamatiyan, tilagula chitaku mipagapu kan Kristu. Ked ha kachegula siya lalaguwala kan chitaku. 6 Ked si sala, gapu si litimpuyugen taku kan Kristu, impangatun Apudyus chitaku un makaturay kan Jesu Kristu ud langit. 7 Killingwan Apudyus cha alla, ta siya mangipain-ala si amod un ayatla ya kachegula kan chitaku si ing-inggala gapu kan Jesu Kristu. 8-9 Ked gapu si kachegun Apudyus, siya lalaguwala kan chitaku gapu si pammati taku kan Jesu Kristu, ked chakampun un gapu kan cha bibiɏuʼn killingwa taku, ti illidchon Apudyus. Ked achipun makwa un ipaspasweɏn chi tagu. 10 Ti si Apudyus chi langwa si litimpuyugen taku kan Jesu Kristu. Ya pilabiɏula bo biyeg taku ta makakwa taku si bibiɏuwola, un siya gagaɏalaʼn langwaan kan chitaku ya simsimmokla un siya otyan chi koon taku.

11 Ked chikayuʼn Gentil, achiyu otyan maliwatan un liyalak kayu un chakampun un tuttuwaʼn tagun Apudyus, ked iyamismi un Judio kan chikayu ti achipun kayu lasogyatan, un siya mangammuwan si tagun Apudyus. Ngim ha katuttuwaan, lasin chi long-eg chi sogyat ya tagu laing chi langwa. 12 Ked si chaampunyu mamatiyan kan siya, achipun kayu lipati kan Kristu ya achipun kayu libilang kan chikami un galak Israel un chilutukan Apudyus. Ked lappun bod ay-ayanyu si intuɏeg Apudyus un ingkarilaʼn idchola kan chikami. Ya lappun bod lamlamayuʼn tuɏungan Apudyus chikayu si salaʼn mataguwanyu, ti lappun ammuyu kan siya. 13 Ngim sabyali si sala, ti ulay adchayuwan kayu kan Apudyus si sin-eɏgew, liyacheli kayu kan siya gapu si libukbuk un chaɏan Jesu Kristu si latoyala.

14 Si Jesu Kristu langwa si lantitimpuyugen taku un Judio ya cha Gentil. Ked lan-ossaalola chitaku mansusuluchon ti kilaanla cha lallawlawingan taku un mamebyeɏchak kan chitaku. 15 Ked ha latoyala, kilaanla cha lintog cha Judio ya cha kopyacha, ti siya lallawlawingan taku. Ked si sala, ulay lansillabyali taku un Judio ya Gentil, lan-ossaan takuʼn lansusulud mipagapu si lipatiyan taku kan siya. Ked hachi lantitimpuyugen taku. 16 Gapu si latoyan Jesu Kristu si krus, siya lakaalan chi lawlawing cha Judio ya cha Gentil, ked gapu si hachi, lantimpuyugola ya lan-ossaalola chitaku langulilon kan Apudyus. 17 Ked ha ummaliyan Jesu Kristu, intudtuchula mantitimpuyugen taku kan Apudyus, chikayuʼn Gentil un adchayuwan kan Apudyus ya chikami boʼn Judio un ngadloncha tagun Apudyus. 18 Ked si sala, ulay Judio ya Gentil, lan-ossaalon chitaku si Ispiritun Apudyus un mipati kan Apudyus un Ama, ta umacheli taku kan siya gapu si killingwan Jesu Kristu.

19 Ked chikayuʼn Gentil, ulay lu lappun ay-ayanyu kan cha tagun Apudyus si sin-eɏgew, imbilang Apudyus chikayu si sala tagula si mipatiyanyu kan cha uchum un mamati. 20 Ha aligla, chitaku losan chi isun chi byeɏoy Apudyus un inggewan chi Ispiritula. Ked si Jesu Kristu isun chi lisaachen chi byeɏoy, ked cha propetala ya cha apostolesla, isucha tukud un mangipakoscheɏ si byeɏoy ti chicha ummulaʼn langipakaammu si mipanggop kan Jesus. 21 Si Jesu Kristu, siya mamangchon si manchetuman cha losan un pisipis ta migoob si osaʼn laapudyusan un byeɏoy. 22 Ked gapu si litimpuyugenyu kan Apu Jesu Kristu, chikayu bo isun chi pisipis un useɏon chi Ispiritu Apudyus un mangwa si bumɏoyan Apudyus.