1 Ɩsɛɣɛlɩ tɔm nti Tɑcɑɑ yɔɣɔtɑɑ tɔɣɔlɛ sɩ: Mɑ́ sɩɩnɑ ɑtɛ nɑ ɩsɔtɑɑ. Mɑ́ tʋnɑ yʋlʋ kɛ weesuɣu. 2 Mɑɑ pəsɩ Yosɑlɛm ɩsɩɩ sʋlʋm ɑtiŋkpɑ. Pəcɔlɔ piitimnɑɑ mɛ ɩ́ kɑ́ nyɔɔ nɑ pə́ cɔɔ mə ɩsɛntɑɑ. Kolontunɑɑ kɑ́ tɑ Yosɑlɛm nɑ Yutɑ tɛtʋ tənɑ. 3 Wɑɑtʋ ɩnɩ ɩ tɑɑ kɛ́ mɑɑ pəsɩ Yosɑlɛm ɩsɩɩ pɩɩʋ, nɑ mpɑ pɑɑ kuli-kʋ tɔ pɩɩ kʋ-wɛ. Antulinyɑ piitimnɑɑ tənɑ kɑ́ pɛɛkɩ sɩ pɑ́ seki-kʋ. Pɑɑ kpeɣeli nɑ pɑ́ kɔɔ ɩcɑtɛ kɛ yoonɑʋ. 4 Pəlɛɣɛlɛ mɑɑ yele nɑ sɔɣɔntʋ kpɑ pɑ kpɑɣɑnəŋ. Ɩ kɑ́ seliɣi ɩsɩɩ sʋlʋm kʋɣʋ-ɩ, nɑ ɩ cɑɣɑlɑɑ nɑ́ɑ́ sʋʋ kpɑŋʋɣʋ. Mɑɑ feŋ Yutɑ nyə́mɑ mɛ mə tɔɔ. Pʋlʋ ɩ́ tɑɑ tokinɑ-mɛ. Ɩlɛnɑ mɑ yʋlʋsɩ piitimnɑɑ tənɑ kpɑɣɑnəŋ ɩsɛ, nɑ ɩ́ tutiɣi yem. 5 Hɑlɩ Yutɑ nyʋɣʋ nyə́mɑ kɑ́ tɔ sɩ: Pə tənɑ pə tʋ Tɑcɑɑ kiŋ kɛ Yosɑlɛm yəlɑɑ hikiɣinɑ toŋ. 6 Ɩlɛnɑ mɑɑ yele nɑ ɩ́ yoonɑ piitimnɑɑ mpɑ pɑ cɔɔnɑ-mɛ tɔɣɔ cemɑce. Nɑ ɩ́ kəlɩ-wɛ ɩsɩɩ kɔkɔ mʋkʋɣʋ hɔtʋɣʋ tɔ, yɑɑ ɩsɩɩ kɔkɔ mʋkʋɣʋ cɑmhuɣule tɔ. Amɑ pʋlʋ kɑɑ tokinɑ Yosɑlɛm yəlɑɑ.

7 Tɑcɑɑ kɑ́ kɔɔ nɑ ɩ́ wɑɑsɩ Yutɑ nyə́mɑ. Ɩlɛ Tɑfiiti lʋlʋɣʋ nyə́mɑ nɑ Yosɑlɛm nyə́mɑ ɩ́ kɑɑ hʋʋ sɩ ɩ́ tɛɛ Yutɑ nyə́mɑ lɛlɑɑ. 8 Wɑɑtʋ ɩnɩ ɩ tɑɑ kɛ́ Tɑcɑɑ kɑ́ kenti Yosɑlɛm nyə́mɑ tɔɔ. Ɩlɛnɑ mə tɑɑ ɑcɑmɑɑ pəsɩ toŋtunɑɑ ɩsɩɩ Tɑfiiti. Ɩlɛnɑ Tɑfiiti lʋlʋɣʋ nyə́mɑ nɑ́ɑ́ pəsɩ-mɛ ɩsɩɩ Ɩsɔ. Yɑɑ Tɑcɑɑ ɩsɔtɑɑ tillu wei ɩ tɔŋ mə nɔɣɔ tɔɔ tɔ.

9 Ḿpʋɣʋ Tɑcɑɑ yɔɣɔtɑɑ sɩ: Wɑɑtʋ ɩnɩ ɩ tɑɑ kɛ́ mɑɑ kʋ piitimnɑɑ tənɑ mpɑ pɑ kɔŋ Yosɑlɛm kɛ yoonɑʋ tɔ. 10 Mɑɑ tʋ Tɑfiiti lʋlʋɣʋ nyə́mɑ nɑ Yosɑlɛm nyə́mɑ mɛɣɛ luɣu kʋlʋmʋɣʋ nɑ sələmʋɣʋ ləmɑɣɑsəlɛ. Ɩlɛnɑ ɩ́ kɛɛsənɑ mɑ wei pɑɑ tʋlɑ pɔ́ɔ́ŋ kɛ mʋsʋŋ tɔ mɑ tɔɔ. Ɩ́ kɑ́ cɑɣɑ ləyɑɣɑ ɩsɩɩ pɑ cɑkʋɣʋ pəyɑɣɑ ɩkpɑmlɛ ləyɑɣɑ tɔ. Ɩ́ kɑ́ wii-m ɩsɩɩ ɩ́ səkɩ ɩ́ səkɩ, ɩsɩɩ kɑncɑɑlɑɣɑ pəyɑɣɑ. 11 Wɑɑtʋ ɩnɩ ɩ tɑɑ, Yosɑlɛm tɑɑ ləyɑɣɑ kɑ́ tɔɔ kɛ́. Kɑɑ wɛɛ ɩsɩɩ Mekito tɛtɛkəlɛ tɑɑ Hɑtɑtɩ-Limɔŋ nyəŋkɑ. 12-14 Pɑɑ lʋlʋɣʋ ŋku kʋ tike kɩɩ cɑɣɑnɑ kʋ ləyɑɣɑ. Pɑɑ Tɑfiiti lʋlʋɣʋ, pɑɑ Nɑtɑŋ nyəŋkʋ, pɑɑ Lefii nyəŋkʋ, pɑɑ Simeyi nyəŋkʋ, nɑ pə́ polo lʋlʋŋ lɛləŋ kɛ mpʋ. Pɑɑ lʋlʋɣʋ ŋku kʋ ɑpɑlɑɑ nɑ ɑlɑɑ pɑɑ cɑɣɑ mpɑɑ mpɑɑ kɛ́.