Sat Sulat Sidat
Hebreo
1
Si Jesus Ud Mangipatigammu Kan Apudyus
1 Utdit aw-awe, namin-adu un awad impatigammun Apudyus sidat ginnapuwan taku un paimbagana utdat propeta na. Ot nadumaduma’n wagas dit nan-iipatigammu na. 2 Yoong sinsatunona udidin di aḻ-aḻgaw, sat Anak naon dit nangipatigammu kan ditaku’t dat piyaona. Siya si Jesus un pinampaloswa na utdan losana awad situn lubung kan siya’d dinutukana’n maningkuwa utdat losana inggaw. 3 Siya’d mangil-an sit nakaskasdaawa kinangatun Apudyus kan mangipaila utdit kinaapudyus na. Tatakkudogona dan losana awad sidat mannakabalina ugud na. Utdit naabus dit kingwa na daḻapnu madaḻusan dat tagu utdat basuḻ da, nan-ulin sin langit ot nantupak sit kapon madiwanan Apudyus daḻapnu makapan-apu kan siya.
Nangatngatu Din Anak Apudyus Nu Sadan Aanghel
4 Kad sidiyon, pinambalin Apudyus dit Anak na un amo nangatngatu nu sadat aanghel ot nadaydayaw pay dit ngadan na un intod na nu sadadit ngadan dat aanghel. 5 Ta naida taḻon nangibagaan Apudyus sidadit aanghel na si kanana’n,
“Anak ku ud sika. Sinsatun ipailaka sakon ud Amam.”
Maid pay nangibagaan Apudyus sidan anghel si,
“Sakon ud Ama na kan siya’d Anak ku.”
6 Utdit daan Apudyus ibaun situn lubung si Jesus un maibilanga pangu’n abeng na kanana’n,
“Masapula mandaydayawa losan dan aanghel ku kan siya.”
7 Ot nu maipanggop sidadin aanghel, kanan Apudyus un,
“Sadan aanghel ud babbaun ku ot mabalin ku un mambalinon dida’n bayogbog onnu gilab di apuy.”
8 Yoong nu maipanggop sidin Anak na, kanan Apudyus sit naikanglita ugud na un,
“Sanat mangiyapuwam Apudyus ud mannanayuna maid si kigad. Man-apu ka un nalintog sinat mangiyapuwam.
9 Piyaom din nalintog ot lawengom din nadadag. Siya’d gapuna’n sakona Apudyus nu am-amoda dayaw kan lagsak dit intod ku kan sika nu sat intod ku utdadit buḻun nu.”
10 Kinnana na pay sit Anak na un,
“Utdit laplapu na, sika Apu dit namaloswa uttun pita kan sadan losana maila’d langit. 11 Ot losan datuwa pinaloswam mangkigad da un kama’t baduta dumadaan yoong sika, mannanayun ka si inggaingga. 12 Awad timpu’n sukatam datun losana pinaloswam un kama ka si manlukut si kagoy onnu mangkaan si dadaana badut. Yoong adi kan taḻon maobos kan maid kigad di mataguwam.”
13 Padana’n naida taḻon nangibagaan Apudyus sidat aanghel si kama’t tu,
“Mantupak ka uttun kapon madiwanan ku inggana’t ipaabak ku kan sika danat kabusuḻ nu.”
14 Ot singngadanon dit koon dat aanghel nu? Dida dat manselselbi kan Apudyus un babbaun na un umoy tumuḻung sidadit taguwona.