1 Yäy gu no gweneno obalu gwaꞌti ba be ngwüjï ngwanni ngwo ndi Yicu Kirictu 2 ndi ari Yicu Kirictu gwe, yobo yidi Lïgïꞌrïm lidi midi yiminy gwallalu giyiima yidi yobo yidi ke na yidi yiꞌrany. 3 Yanni yaꞌti je yobo burna ndi ärrï gwani amiꞌrati gwüngün ndi gatajidi düwä gïdrü danni diki, yima je Ngwaalu ärrï ükäjä gwe Gïjü güngün ngwanginu ngwudi dïjï dümnä ngwuru nono giꞌremna gege, ngwuꞌti be ätïnä ke nono. Ngwükäjä ngwuru mïꞌrïnï nono gwudi ke. A no ngwobalu yiima ye yidi ke ꞌdengge, 4 nunnu a Ngwaalu medaji ꞌdengganu buping gwanni gwüdünälü gwanni gwümïnä yobo ꞌdengge lanni gilo lelella Lïgïꞌrïm le, yaꞌti a be ani elelle drü de danni diki. 5 Ndi ari lanni gilo lelella drü de danni diki, lati ïrïyï ngwäyälü giyiꞌral yidi drü danni diki, a be lanni lelella Lïgïꞌrïm le lidi Ngwaalu, lati ïrïyï ngwäyälü giyiꞌral yanni yïmïnä je Lïgïꞌrïm lidi Ngwaalu. 6 Ïrïyï ngwäyälü gwudi drü danni diki gwani yiꞌrany a be ïrïyï ngwäyälü gwudi Lïgïꞌrïm lidi Ngwaalu gwani midi gwudi gwurꞌtaling na adatalu. 7 Ïrïyï ngwäyälü gwanni gwuki gwuru güwän gidi Ngwaalu ndi ari gwati ꞌti ꞌdengenaca yobo yidi Ngwaalu na yaꞌti ying je burni ndi ꞌdengenaci. 8 Lanni lïmätä je drü danni diki, laꞌti la burni ndi jayiyi Ngwaalinganu.

9 A be nga nga, laꞌta be mätïnä yiima ye yidi drü danni diki, ngaa be mätïnï yiima ye yidi Lïgïꞌrïm lidi Ngwaalu manari Lïgïꞌrïm lidi Ngwaalu gilo ꞌdanggalanu. A manari dïjï dere daꞌti ätï Lïgïꞌrïmä lidi Kirictu, nginde gwäꞌtüdï gwudi Kirictu. 10 A manari Kirictu nggwo ꞌdanggalanu, ngwanginu ngwalu ngwayu gwani ke a be lïgïꞌrïm midi gwani dünälü. 11 Ma be ari Lïgïꞌrïm lüngün lanni lïꞌdïꞌrïyä Yicungalu giyiꞌranyanu gilo liju ꞌdanggalanu, nginde gwanni gwüꞌdïꞌrïyä Kirictungalu giyiꞌrany gwa je be midiyi ꞌto ngwanginu ngwalu ngwanni ngwani yiꞌrany aar medadi Lïgïꞌrïm le lüngün lanni gilo ꞌdanggalanu.

12 Yäy gu no lani ngwänggärï yiru dämjü ꞌdengge ndi ari aaꞌti a la elelle drü de danni diki. 13 Ndi ari manari ngaa la elella gwani drü danni diki, ngaa ladi ayi. Ma be ari Lïgïꞌrïm le, ngaa la ꞌrinye yiꞌral yidi lingeno yanni yiki, ngaa la be mbuji miding. 14 Ndi ari lanni lüktä je Lïgïꞌrïm lidi Ngwaalu, ngindenga liru yïjï yidi Ngwaalu. 15 Ndi ari ngaa laꞌti apu lïgïꞌrïmä lidi yïnäd lanni ladi je gäbïcï ara je yedeny eny, ngaa be ape Lïgïꞌrïmä lidi Ngwaalu aar je aniji yïjï yüngün lanni ladi a le urindi Ngwaalinga ngaa je ci, “Abba gwuru Papa.” 8.15 Murkuj 14.36; Galatiya 4.5–7 16 Ndi ari Lïgïꞌrïm lüngün liru lanni linggidaar lïgïꞌrïmängä le lege ndi ari alanga liru yïjï yidi Ngwaalu. 17 Na gweneno ma be ari alanga liru yïjï yidi Ngwaalu, alanga ꞌto la be ape yuꞌrina yidi Ngwaalu, ar gu acidanu Kirictunga le manari nggwo gwacidar le ꞌdidanu giyiꞌrendenyanu yüngün, nunnu aji ar le acidi ꞌto ndi näjïnï gwüngün.

18 Äny gwänggädï ndi ari yiꞌrendeny yege gïdïdlä ndee, yaꞌti itana näjïng gwanni gwadi Ngwaalu ꞌtäjälü ꞌdengganu. 19 A be ngwong ngwügïꞌtïnä gïdïdlä ngwo ngworꞌtemaja ngwüdünïcä a je yigor enyanu ndi ari a Ngwaalu ꞌtäjä yïjälü yüngün ndi ari yani yärüngä. 20 Ndi ari ngwong ngwügïꞌtïnä gïdïdlä ngwaꞌti mulu nono gwuꞌren a je be Ngwaalu gäbïcï aar muli nono ndi geꞌtaji 21 ndi ari aji a je Ngwaalu gwäꞌdälü giyirna yidi ꞌdigiꞌri aar je apada ndi näjï gwudi gätïnï linginalu gwudi yïjï yidi Ngwaalu.

22 A lïlïngïdï ndi ari ngwong ꞌdar anaku geꞌtaar je gu ngwona ngwärnü ngwïtï je yiꞌrendeny nono, nono yajima yidi linge ꞌdi gweneno. 23 Ngwong gïdïdlä ngwäꞌtüdï jücü, a be alanga ꞌto lanni lima ape yuula yanni yiꞌra yidi Lïgïꞌrïmä lanni Lijuꞌru, a lärnü giyigoranu lïtï je yigoranu ndi dünïcï gomon gadi aar nje ge ape ar ru yïjï, gwani üꞌrälü gwudi ngwanginu ngwege. 24 Ndi ari ndi geꞌtaji nggwee, a lïgïlängïdïnä. A be geꞌtaji gwanni gwati enggani, gwäꞌtüdï geꞌtaji aꞌtur, yärü gwuru gwanni gwati geꞌtaji giyiꞌral yanni yiming je ape be? 25 Ma be ari a ligeꞌtaja giyiꞌral yanni yaꞌti ar je na apu, ya ar je dünïcï lorꞌtemaju nunnu aar ila.

26 Gay ye geꞌte geꞌte, Lïgïꞌrïm lati nje gendaci yiima ndi amiꞌrati gwege. Yaꞌti ar je lïngïdï yanni yadi ar ye otaci Ngwaalingalu, a be Lïgïꞌrïm liru lanni lati nje mandi ndi aar nje ruci Ngwaalu ärnï gwe gwanni gwaꞌti gwa ar gwe lenge ondajing. 27 Ngwaalu ngwanni ngwati ombaji yigoranu yege, ngwülïngïdï yiꞌral yidi Lïgïꞌrïm ndi ari Lïgïꞌrïm liru lati mandi ndi ruci ngwüjü ngwanni ngwujuꞌru bupi gwe gwudi Ngwaalu.

28 Na a lïlïngïdï ndi ari giyiꞌral ꞌdar, Ngwaalu gwati ape yiiru gwani jayi gwudi ngindenga lanni lati ämnï ngindeng, lanni lurnidaar je anaku buping gu. 29 Ndi ari ngindenga lanni lïlïngïdï je Ngwaalu gwerre ngwuje äbrï ngwuje mädïnïyï nunnu aar lingani Gïjü güngün nunnu a nginde ru giꞌra ngwenggenanu ngwonyadu. 30 A lanni liming je mädïnïyï, gwuru ꞌto gwanni gwurnidu je aar ila ꞌto ꞌdünggüngün, na lanni lurnidung je, gwuru ꞌto gwanni gwüdünïyälü, na lanni lïdünïyïng jälü, gwuru ꞌto gwanni gwünäjü je.

31 Giyiꞌral giyee ꞌdar a ladi be araa? Manari Ngwaalu ngwüjädï ꞌdengge, yärü gwuru gwanni gwunje akani nono? 32 Nginde gwanni gwäꞌtüdï diꞌrid Gïjü ge güngün ngwube gäbïcïjï ngwüjü aar ꞌrinye gwani alanga ꞌdar, awa ꞌto yïmïꞌrü ye aar nje ꞌti be ätädï ngwonyalu ꞌdar nginde gwe? 33 Yärü gwanni gwadi üꞌrïdä ngwüjü ngwudi Ngwaalu yiꞌral nono ngwanni ngwuming je äbrï? Ngwaalu ngwuru ngwanni ngwati dünïyälü. 34 A be yärü gwanni gwati obalu dïjï de? Yicu Kirictu gwuru gwanni gwayu ngwoꞌre gwuma aar ꞌdïꞌrïyï ndi midi. Nggwo gwujalu kaama gidi Ngwaalu ngwuru ꞌto gwanni nggwo gwumandu ndi aar nje ruci. 35 A be yärü gwuru gwanni gwadi nje üꞌränü ndi ämnï gwudi Kirictu? Dïrbä da ro? Ya yüündä ya ro? Ya übïnälü gwa ro? Ya ngwamu ngwa ro? Ya jalu ngwanginu ngwanu gwa ro? Ya gimra ga ro? Na yiꞌrany ya ro? 36 A be anaku üllïnäär gu ndi ari,