7
Aar je mïꞌrä 144,000
1 Anni ma yiꞌral ele giyee nyi be engga yïꞌrrä kwoꞌrongo (4) yïdünädälä giyiꞌrundu kwoꞌrongo yidi dïyäng, aar dünäjï diruna didi yiꞌrundu kwoꞌrongo (4) aar ümïnïcï ndi ärïyï dïyängälü na yaw a daꞌri dere. 2 Nyi oꞌre nyi engga gïꞌrrä giꞌter mana gändï gïtäny gwe gapana guꞌrunga gidi mïꞌrä gidi Ngwaalu ngwumidu. Ngwurnida yïꞌrrä giyoo kwoꞌrongo (4) dulu de gwulleny yanni yima aar je ätädä yiima ndi ari aar akani dïyängü nono na yaw, ngwuje ci, 3 “Aaꞌti ngaa la akani dïyängü nono na yaw na ngwaꞌri ꞌdi ar mïꞌrä ngwïnädä gïyïdülälä ngwudi Ngwaalu ngwege guꞌrung ge.” 4 Nyi be ꞌdingini ngwüjü ngwanni ngwuma aar je mïꞌrä ngwudi yïïlü ꞌdar yidi Yïjïräyïl ngwuru yiꞌra ngwüüꞌrï küüꞌrï tudini na ꞌdï kwoꞌrongo na kwoꞌrongo (144,000).
5 Kïïlü gidi Yäwüdä, aar je mïꞌrä ngwüüꞌrï ꞌdï na rom (12,000),
kïïlü gidi Räbïn, aar je mïꞌrä ngwüüꞌrï ꞌdï na rom (12,000),
kïïlü gidi Jad, aar je mïꞌrä ngwüüꞌrï ꞌdï na rom (12,000),
6 kïïlü gidi Äcïr, aar je mïꞌrä ngwüüꞌrï ꞌdï na rom (12,000),
kïïlü gidi Nabitali, aar je mïꞌrä ngwüüꞌrï ꞌdï na rom (12,000),
kïïlü gidi Manaji, aar je mïꞌrä ngwüüꞌrï ꞌdï na rom (12,000),
7 kïïlü gidi Jamaan, aar je mïꞌrä ngwüüꞌrï ꞌdï na rom (12,000),
kïïlü gidi Lawi, aar je mïꞌrä ngwüüꞌrï ꞌdï na rom (12,000),
kïïlü gidi Yajakir aar je mïꞌrä ngwüüꞌrï ꞌdï na rom (12,000),
8 kïïlü gidi Jablun, aar je mïꞌrä ngwüüꞌrï na rom (12,000),
kïïlü gidi Yüjïb, aar je mïꞌrä ngwüüꞌrï ꞌdï na rom (12,000),
na kïïlü gidi Bïnïyämïn, aar je mïꞌrä ngwüüꞌrï ꞌdï na rom (12,000).
Ngwüjï ngwonyadu ngwugenna ngwureda ngwubidu
9 Anni ma aar ele giyee, nyi be ombajidalu nyi engga ngwüjü ngwonyadu ngwaꞌti ngwa düꞌränï ngwïndï giyen na gïyïïlü na ngwüjï na ngwungla aar dünäcï diduꞌralu aar dünï ngwäyänü ngwudi Girany, ngwugenna ngwureda ngwubidu ngwapana yiꞌrina yidi ngwiꞌdi ngwuy ngwe ngwegen. 10 Aar opepala gwulleny aar ari,
“Gilang gwuru gwudi Ngwaalu ngwege,
gwanni gwujalu gididuꞌrala didi yeleny,
ngwuru gwudi Girany.”
11 A yïꞌrr ꞌdar dünälä aar üꞌrü diduꞌralu guꞌriguꞌtu didi yeleny na mbumbunga giloo lijalu na ngwong ngwoo kwoꞌrongo ngwumidu. Aar üllänü aar kwuci diduꞌralu didi yeleny yirku ye aar äpïjï Ngwaalinga yobo. 12 Aar ari,
“Yiru gu!
Orta na näjï na bebere na yäy ꞌtu na denya
na yeleny na yiima
aar ru yidi Ngwaalu ngwege gwurꞌtal na gwurꞌtal.
Yiru gu.”
13 Aar nyi be mbumbu gweꞌte otacalu aar nyi ci, “Ngwüjï ngwee ngwugenna ngwureda ngwubidu ngwuru ange? A ngwïndï ne?”
14 Nyi be ci, “Nga gwuru gwülïngïdï gwani doorta.”
Aar nyi be ci, “Ngwüjï ngwee ngwuru ngwanni ngwuma gïlängïdïnä gïdïrbänü danni dipa. Ngwuma uya ngwureda ngwegen ngwuma aar je bidiyi gïyïn yidi Girany. 15 Yäy gu no,
Aar be dünäcï diduꞌralu didi yeleny didi Ngwaalu
aar äpïjï yobo lingen le dilu de kobanu güngün,
na nggwo gwujalu gididuꞌrala didi yeleny
ling je gwüꞌrübäjälü diil de didi gäꞌtä güngün.
16 Ngwaꞌti ngwa je ngwamu enyanu mana,
na ngwaꞌti ngwa je ngwäädä eny mana.
Ngwaꞌti ngwa je deja mïꞌrï,
na ngwaꞌti ngwa je ngwübrürtä ngwere ape.
17 Ndi ari Girany ganni gijalu gidiliganu didi diduꞌri didi yeleny,
ga ru dooꞌra degen,
ling je oktada ngwel ngwudi yaw yanni yätï ngwäyänü yidi midi.
La je Ngwaalu brota yal ngwäy yere ꞌdar.” 7.17 Ajaya 49.10; 25.8