1 Anni ma Yicu ji ndi gatani gobo, a dooꞌra deꞌte ngwooꞌranu ngwüngün ci, “Ombaja kuni gwani Doorta, yoꞌrra giyee yipa yipa! Na ngwuꞌdun ngwee jayar gu yiꞌremna!”

2 A Yicu ci, “Nga gwänggädï ngwuꞌduna ngwee ngwupa, gaji ga ji gila, goꞌrr gere gaꞌti ngene ga gätïnänï kwenggenala. ꞌDar ya gätïnï gïdïyängälü.

3 Anni ma Yicu ji ndi jalu Gidotrala gidi Ngwümïnïtï aar gwomajidanu gobo ge, a Butruj na Yagub na Yuwana na Andrawuj otacalu jücü aar ci, 4 Enggaci nje, yiꞌral giyee yadi ji jadu na yiru ange yadi ru yiꞌremna yanni yadi inggidi ndi ari gaji gima be ila nunnu ꞌdar giyee yadi be ele ndi mbuti?”

5 A je Yicu ci, “Arnganar aaꞌti dïjï dere da je ïꞌdäjänü. 6 Lonyadu la ji lila ngwürïny ngwe ngwüny la ari, ‘Äny gwuru gwani nginde,’ na la aar je ïꞌdäjänü lonyadu. 7 Ma ji ma aang ꞌdingini yäärä ye ngaa ꞌdingini yiꞌral ye yani yäärä, aaꞌti be ngaa lobadi yigoralu. Yiꞌral yanni yiru gu no yadi ji a be medadi gwaꞌtina gito. 8 Ngwüjï ken ngwa ꞌdïꞌrä ngwüjü nono ken giꞌter na yeleny ken ya ꞌdïꞌrä yelenya nono ken giꞌter na ngwaalu ngwa lagadalu giyen mbüny mbüny na ngwamu ngwa ji. Yajima yiru giyee yanni yiru giꞌra.”

9 Ngwuje ci, “Ngaa be arngani. Ndi ari la je apada ngwämrä ngwudi pï yelenya la je pï ngwacal ngwe ngwämrä. Na gwani äny, ngaa la dünï ngwäyänü ngwudi ngwartan na ngweleny ngaa ru ladi inggidi ꞌdenggen. 10 Na ngwujaꞌri ngwujaw ngwa aar ngwe ondaci ngwüjü giyen ꞌdar gwerre gwerre. 11 Ma be ari lima je ummi ara je apada ngwelenyanu, aaꞌti be yigor ya je pïdänänü ngwujaꞌri ngwanni ngwada ngwe ari. Ngaa je be ondaji ꞌdogo ngwanni ngwadi aar je ätädä kaji nggoo ndi ari ngaa läꞌtüdï ladi ondaji a be Lïgïꞌrïm liru lanni Lijuꞌru.”

12 Ngwuje ci, “A diweengga da gwurlanu gwenggen gwe gwa aar ape gwa aar ꞌrinye, na papa gwa gwurlanu gïjï ge güngün. Na yïjï ya nyortaci papanga janu legen la aar je ꞌrinye.

13 Na ngwüjï ꞌdar ngwa je ke ngwäy gwani äny, a be gwanni gwa mätïnälü ꞌdïꞌdäny ꞌdi aar medadi, gwa gïlängïdïnï.”

14 Ngwuje ci, “Ma ji manari ngaa lima enggada yütä yanni yati rngïyï ngwüjü 13.14 Daniyal 9.27; Daniyal 11.31; Daniyal 12.11 aar je gäbïcï aar gatani ngwaalinga yanni yaru ye dïjïr dani Daniyal yima ji kobo ngwaalu ngwanni ngwaꞌti ngwadi aar gu ji, gwanni gwati uli ngwulenge yiꞌral yorto ye ngwaalinga. Gäbïcär je be lanni gilo Yäwüdïyä, aar abrada giyenala. 15 Gäbïcär be gwanni gwujalu ngwuꞌdunala aaꞌti gwüllädälü na ngwänï gïdrü ndi ꞌtüyä gony gere. 16 Aaꞌti dïjï danni da ji gïtäny, da kwodalu ꞌdunu ndi ape direda düngün.

17 Wäjï ngwani ngwaw ngwanni ngwuju ngwari ngwe na nanninga lanni liꞌriya giyomon giyoo! 18 Otacar Ngwaalingalu ndi ari aaꞌti yiꞌral giyee ya ji digo de, 19 ndi ari dïrbä da ji dipa giyomon giyoo, danni dikalu gikidang, dere daꞌti gu ju diru gu no ꞌtuꞌtu geꞌta gu Ngwaalu dïdläyü ndee ꞌdi gwenene na daꞌti da ji dere diru gu no mana aꞌtur. 20 Adinari aaꞌti Ngwaalu üꞌrïdï yomonanu giyoo, dïjï dere daꞌti daadi midi a be gwani ngwüjï ngwanni ngwäbrüng je ngwube ülläjï yomonalu aar ru yooko.

21 Kaji nggoo, manari dïjï dere dima je ci, ‘Ilar, gwanni Gwubrutaar yelenya nggwo ngene!’ na ara je ci, ‘Ar ele nggwo ngenone,’ aaꞌti la je ämnäcï. 22 Ndi ari ngwuꞌduru ngwonyadu ngwani lanni librutaar je yelenya na ngwïjïr ngwonyadu ngwa ji ngwa ꞌtädälü ngwa ärrï yiꞌral yiru yiꞌremna ꞌter ngwa ape yiima ndi ïꞌdäjï ngwüjänü ngwanni ngwäbräär je ma gay ji. 23 No, arnganar be, äny gwuma madinana nggwuma je ondacani ngwujaꞌri ngwee ꞌdar.”

24 Ngwuje ci, “A be giyomon giyoo, yiꞌral yanni yadi gwujana dïrbä ndoo,

26 Kaji nggoo, ngwüjï ngwa be enggada Gïjü gidi Dïjï dümnä güllü gïyïbäꞌrälä yiima ye yipa na näjï. 27 Gwa be ükäjä yïꞌrrä yüngün nunnu aar gwäꞌräjä ngwüjälü ngwüngün ngwanni ngwäbrïnä giyumil kwoꞌrongo ngwaalu ngwurmitu gu dïyäng na ꞌdi ngwaalu ngwurmitu geralu.”

28 Ngwuje ci, “Gweneno, lïngïdär dimnigor de yorto ye ngwaalinga ndi ari, ma ji ma yiꞌrina yüngün ïgïlï aar ꞌtüdïnä ngwänï ngwüngün, nga lenge ndi ari yirram yima ja gito. 29 Yäy ꞌto ma ji ma aang engga yiꞌral giyee ma aar ji, lïngïdär be ndi ari yima ja gito, yima ja gito gïlängïr. 30 Nggwa je ci ꞌdidanu ndi ari gimaad nggee, gaꞌti ga medadi ꞌdi a yiꞌral giyee ꞌdar ila aar ji. 31 Gere na dïyäng la ji la dudi a be ngwujaꞌri ngwüny ngwaꞌti ngwa dudi aꞌtur.”

32 Ngwuje ci, “Dïjï dere daꞌti dïlïngïdï gomon ge na gaji ge nggäꞌdï yorto ye ngwaalinga. ꞌDi yïꞌrr ꞌto yidi gerala na Gïjï, yaꞌti aar ye lïngïdï yorto ye ngwaalinga a be Papa ru gweꞌte pu gwülïngïdï. 33 Arnganar be ngaa jalu ngwäy ngwe! Ndi ari ngaa laꞌti lïngïdï gaji ganni gadi ge yiꞌral giyee ji. 34 Yadi ru nono dïjï dïꞌdïꞌrü ngwele ken golanu ngwube gätïjänïjï ngwïnädä ngwüngün ngwuꞌduna ngwuje ruji yiꞌra ngwuje gegenacani yiiru a dïnäd ape yiiru yüngün ngwoladani dangida gïlängïr ndi ari ngwugeꞌte ngwäyälü.”

Ngwuje ci, 35 “Yäy gu no, arnganar be ndi ari ngaa laꞌti lïngïdï ndi ari gur gidi ngwuꞌdun gadi ila jadu. Gila digera de, gila diligeny danu, gila gokto ge na gila dilu danu. 36 Manari gima ilalu ꞌdür no, aaꞌti ga je mbuji lindru. 37 Yanni yica je ye, yiny ye ci ngwüjü ꞌdar ndi ari, ‘Arnganar!’ ”