15
Dïmürä didi Mbumbunga
(Murkuj 7.1–13)
1 A be Ngwübärrïjï ngwoko ngwoortanga le ngwudi yobo ngwïndï Üräjälïm aar ila ndi Yicu aar otacalu aar ci, 2 “Ange gwuru ati be ngwooꞌra ngwunga kiyi dïmüränü didi mbumbunga? Larra ati aar ꞌti unu ngwuy nono gwerre gwerre anaku aru gu dïmürä aar be eny.”
3 A je be Yicu ci, “A mine nga larra ati aang kiyi ngwujaꞌri ngwudi Ngwaalu aang ape dïmürä dalu? 4 Ndi ari Ngwaalu ngwaru, ‘Dïnyädï papang na nanni’ 15.4 Gwuruj 20.12; Täjïnïyä 5.16 na ngwari, ‘Dïjï dere danni da lo papang gwüngün na nanning gwüngün, da aar ꞌrinye.’ 15.4 Gwuruj 21.17; Ngwullawi 20.9 5 Ngaa be enggaci ngwüjü ndi ari, ma dïjï ätï gony gadi ngge gataji papang gwüngün na nanning gwüngün düwä, ngwuje be ci, ‘Gong nggee gidi gätäjï Ngwaalingalu giru gaꞌti ga je ge gataji düwä,’ 6 no ngaa ꞌti ba be gäbïcä ndi ärrïjï papang gwüngün yaa nanning yiꞌral yere. Yiꞌral ye giyee ngaa lati ci ngwujaꞌri ngwudi Ngwaalu bärï dïmürä de dalu. 7 Ngaa gilee liru ngwumurꞌtuny! Dïjïr dani Ajaya dädï gu ndi ondajaji ꞌdanggalu ngwari,
8 ‘Ngwüjï ngwee ngwati nyi denya ngwulem ngwe ngwegen
a be yigor yegen ꞌtänü ꞌdünggüny.
9 Latiny äpïjï yobo ꞌtur
aar be enggaci ngwüjü yobo yidi ngwüjï ngwümnä.’ 15.9 Ajaya 29.13”
Yanni yïrngü na yanni yijuꞌru
(Murkuj 7.14–23)
10 A Yicu urnidi ngwüjü ngwonyadu ꞌdünggün ngwuje ci, “Gerajar ngwänï ngaa lenge. 11 Yanni yati je dïjï eny, yäꞌtüdï yanni yati rngïyï dïjü ngwäyänü Ngwaalu, aar be ru yanni yati ꞌtüdä ngwulemanu ngwüngün yanni yati gäbïcï ngwürngï ngwäyänü Ngwaalu.”
12 A be ngwooꞌra ngwüngün ïlïjä aar otacalu aar ci, “Nga gwülïngïdï maani pu ndi ari Ngwübärrïjï ngwuma je yiꞌral giyee kiyi yugri anni ma aar je ꞌdingine?”
13 Ngwuje gwäꞌräcänü ngwuje ci, “Daꞌri danni daꞌti Papa gwüny kerala kwüdï, da gwallanalu ꞌdirud. 14 Gäbïcär je, liru ngwüjï ngwürïmü ngwäy. Dïjï danni dïrïmü ngwäy mung okta dïjü dïrïmü ngwäy, ꞌdün la ïꞌdï gidel.”
15 A Butruj ci, “Enggaci nje mïꞌrïng gwudi ngwujaꞌri ngwee.”
16 A je Yicu otacalu, “Ngaa gilona lïnü gu yaꞌranya no? 17 Ngaa laꞌti lïngïdï ndi ari yere yanni yati je dïjï eny yati üllï gilaranu aar be ꞌtüdä ngwanginu poore? 18 A be yiꞌral yanni yati ꞌtüdä ngwulem, yati ꞌtüdä giligoranu, na yiru giyee yanni yati rngïyï dïjü ngwäyänü Ngwaalu. 19 Ndi ari giligoranu, yati ꞌtüdä giyee, ïrïyï ngwäyälü gwanni gwuki, ꞌrinyidi, mïꞌrï ngwäyänü, yïjïn, yuꞌram, yiꞌduru na lo. 20 Yiru giyee yanni yati rngïyï dïjü ngwäyänü Ngwaalu. A be eny ngwuy ngwe ngwürngü, ngwati ꞌti rngïyä dïjü ngwäyänü Ngwaalu.”
Ämnï Ngwaalu gwudi daw diru Dikanaan
(Murkuj 7.24–30)
21 A Yicu gatani ngwaalinga ngwoo ngwele ngwaalu gïyündär yidi Jür na Jäyïdä. 22 A daw diru Dikanaan dati ji ngeno ngwïlïjä, daru ngwari, “Gwani Deleny, Gïjï gidi Däwüd, ang ïnä! Gera güny nggo gïdïrbänü dipa gätïnä dïꞌrïllä nono.”
23 Aaꞌti Yicu ca ngwujaꞌri ngwere. No a ngwooꞌra ngwüngün ïlïjä aar päcälü, “Linynya ngwele diminje arada ngwänï.”
24 Ngwuje ci, “Lükäjïny ꞌdogo ngwüjï ngwudi Yïjïräyïl ngwanni ngwududu.”
25 A daw üllï ngwukwucalu yirku ye ngwuci, “Gatajiny düwä, gwani Deleny.”
26 Ngwuci, “Yaꞌti ädï ndi apada yïjü yona nga je gätïjï yinyeno.”
27 Ngwuci, “Yäy yiru gu, gwani Deleny. A mine ꞌto yinyen yati pa uti ngwudagiꞌralu ngwanni ngwati miꞌraꞌtadalu gïdïmbürälä didi doorta degen.”
28 A be Yicu ci, “Gwani daw, nga gwätï ämnïng Ngwaalu gwupa! Yanni yïmïnä je yima ärrïnï.” A gera güngün uꞌri nono kaji nggoo geꞌte geꞌte.
A Yicu uꞌriyi ngwüjü nono ngwonyadu Jälïl
29 A Yicu gatani ngwaalinga ngwoo ngwüꞌdïꞌrï ngwelada kibirala gidi yaw yidi Jälïlïng. Ngwube ele ngwallu milli ngwujalu. 30 A ngwüjï ngwonyadu gwulleny ïlïjä, ngwapu ngwüjü ngwuru ngwumjo, ngwürïmü ngwäy, ngwurga na ngwäꞌräng na ngwuꞌter ngwonyadu aar je geꞌtalu giyoranu yidi Yicu ngwuje uꞌriyi nono. 31 A ngwüjï dibi anni ma aar engga ngwäꞌrängü aar ondaji, a ngwurga jayi, a ngwumjo ele a lanni lïrïmü ngwäy aar ombajidalu. Aar ortada Ngwaalinga ngwudi Yïjïräyïl.
32 A Yicu urnida ngwoꞌra ngwüngün ꞌdünggüngün ngwuje ci, “Ngwüjï ngwee ngwïnädïny ngwuma ji ngene ꞌdünggüny yomon täꞌrïl (3) ngwaꞌti ïtï ngwonyalu ngwere. Äny gwaꞌti jädï ndi nje geꞌte kay ngwamu ngwe, ngwa miꞌri yigor yegen kay ngwamu.”
33 A ngwooꞌra ngwüngün ci, “Ngwadi ar je äpïjä yona ne aar je iye aar je mbuti ngwaalu ngwee poor?”
34 A je Yicu ci, “Ngaa lätï yona ümn?”
Aar ci, “Kwoꞌra täꞌrïl (7) na ngwuum cong ngwanni ngwooko ngwooko.”
35 Ngwuci ngwüjü aar jalu gïdïyängälü. 36 Ngwube ape yona giyoo kwoꞌra täꞌrïl (7) na ngwuuma, anni mung ci Ngwaalinga yäy ꞌtu, ngwuje üꞌränü ngwuje ätädä ngwoꞌra aar je gegenaci ngwüjü. 37 A ngwüjï ꞌdar eny aar pe. A je be ngwooꞌra utalu yanni yima ïꞌdälü aar je onje yiꞌramala kwoꞌra täꞌrïl (7) yanni yüꞌrïꞌtïnänü. 38 Ngwüjï ngwanni ngwïtï ngwuru ngwüüꞌrï kwoꞌrongo (4,000) a be ngwaw ji ꞌter yïjï yänü. 39 Anni ma Yicu geꞌte ngwüjü kay aar ele, ngwüdïꞌrï ngwänï gïbälükänü ngwelada giyumil yidi ngwaalu ngwani Majadan.