1 Anni ma yiꞌral giyee medadi, a Deleny dani Yicu äbrï ngwüjü mana ꞌdï kwoꞌra täꞌrïl na rom* 10.1 Ngwujaꞌri ngwoko ngwati ari küüꞌrï täꞌrïl na ꞌdï. ngwuje ükäjï rom rom ngwuje mädïnïyï aar ele gïyündär a ngwaalu ꞌdar ngwading gu ele. 2 Ngwuje ci, “Yon giyo yïrälü kirunyanu, a be ngwäänü ngwaꞌti onyadu ngwanni ngwadi uni, yäy gu no, otacar Delenyalu didi giruny ngwükäjï ngwäänä aar ele girunyanu güngün ndi uni yona. 3 Ïndär! Nggwükäjä je ngaa ru nono ngwangala ngwele ngwoko ngaa ji ngwümüdänü.† 10.3 Läng gilee liru ginyen gidi pooring gati eny ngwangala ngweny yoꞌra. 4 Aaꞌti ngaa la pani ngwürädä, ngwüdän, aaꞌti ngaa la dünï ndi aganni dïjü dere kay.

5 Ngwuꞌdun ngwere nggwa gu änï, gwerre gwerre agannar ngwüjü, ‘A adatalu ji ngwuꞌdun ngwee.’ 6 Manari dïjï ju ngeno dätï ämnïng gwudi adatalu, gäbïcär aganning gwalu ngwudi adatalu ngwuji ꞌdünggüngün, mung erne, ara je oꞌraca. 7 Ngaa jalu ngwuꞌdun ngwoo, aang ïyï aang eny ngwony ngwere ngwadi ara je ätädä, ndi ari däänü dati aar ätädä guꞌru güngün. Aaꞌti ngaa la landalu ngwuꞌdun ngwuꞌdun.

8 Gündär gere ganni ga gu änï, ma ara je ngwüjï geꞌte gïyïrnü, ïtär ngwony ngwanni ngwadi ara je gïꞌtïjälü ngwäyälü. 9 Uꞌriyar ngwüjü nono ngwanni ngwümä kündär nggoo nga je ondaci nga je ci nu, ‘Yeleny yidi Ngwaalu yima ja gito ꞌdanggalu.’ 10 Ma be ari ngaa lima ele kündär gere ma ara je be ꞌti ülläjälü yïrnü, ꞌtüdär ang ele ngwayalu poor aang ari, 11 ‘ꞌDi ꞌto dibuꞌra didi gündär galu danni diminje ꞌdïꞌrä yora nono, da ara je brotada nono. Diwayinar be ndi ari yeleny yidi Ngwaalu yima ji gito ꞌdanggalu.’ 12 A nggwa je ci ndi ari gomon nggäꞌdï, ngwüjü ngwudi Jaduming ngwa ïnädänï Ngwaalinga ngwüjï ngwudi gündär nggoo!”

13 “Wäjäj bi kündär gani Kürüjïn! Wäjäj bi kündär gani Bid Jäyïdä! Adinari a yiima yanni yärrïnä ꞌdanggalu, yärrï je ngwüjü ngwudi Jür na Jäyïdä, ngwüjï ngwegen ngwadi joꞌrenyana ꞌtuꞌtu luubu ngwadi bälänï ngwaaru nono aar genne gïmärä‡ 10.13 Ma Ngwüyäwüd jalu gïmärä, ngwati genne ngwureda ngwugꞌraar je ngwoola ngwe ngwudi yooꞌra aar ru nono juwal. ndi inggidi ndi ari ngwuma joꞌrenyana giyiꞌral yegen yanni yiki! 14 Gomon gidi pï yelenya, ngwüjï ngwudi Jür na Jäyïdä ngwa ïnädänï Ngwaalinga ꞌdanggalu. 15 A mine nga nga lidi gündär gani Kaprnawum! Ngaa ligeꞌtaja ndi ari ngaa ladi allu kerala? La je gatu ngaa üllï gidel didi yiꞌrany!”

16 A Yicu ci ngwoꞌra ngwüngün nu, “Gwere gwanni gwada je geraci länï ngwuꞌdingini, gwuny ꞌdïngïnïjï, gwanni gwa je ꞌdonyaci, gwuny ꞌdonyaci ꞌto, a gwere gwanni gwuny ꞌdonyaci, gwuꞌdonyaca ngindeng gwanni gwükäjïny.”

17 A ngwooꞌra ngwoo ngwuru ꞌdï kwoꞌra täꞌrïl na rom oꞌra lijayanu gwulleny. Aar ci Yicung, “Gwani Deleny, ꞌdi ngwüꞌrïllä ngwuꞌdengenaci nje minje girinya ngwürïny ngwe ngwunga!”

18 A je Yicu ci nu, “Äny gwänggädï dijegoꞌro dïꞌdü kerala nono gwele ma gere enyanu. 19 ꞌDinginar! Äny gwuma je ätädä yelenya ndi ari ngaa ruꞌti ngwüüngäyü a ngwümü ngaa dami yiima ꞌdar yidi güwän galu, gong gere gaꞌti ga je akani nono. 20 Aaꞌti be ngaa la jayanu nunnu ngwüꞌrïllä ngwuꞌdengenaca je, ngaa be jayanu ꞌdogo ndi ari ngwürïny ngwalu ngwuma üllïnï kerala.”

21 Kaji nggoo, a Lïgïꞌrïm lanni Lijuꞌru onyadi Yicungala ngwujayanu ngwari, “Papa gwanni gwuru Deleny didi gerala na dïyäng! Nggwa ang ci yäy ꞌtu ndi ari yima je änïjäjï ngwüjälü giyee ngwanni ngwubebera ngwülïngïdï, yima je be ꞌtäcï yïjälü yanni yaꞌti lïngïdï. Yäy, gwani Papa, yiru gu anaku mïnä je gu.”

22 Ngwube ari, “Yiꞌral ꞌdar yima aar nje Papa gwüny ätädä. Gwere gwaꞌti gwülïngïdï Gïjü a be Papa ru ꞌdogo. Na gwere gwaꞌti gwülïngïdï Papang a be Gïjï ru ꞌdogo na lanni lima je Gïjï utanu ngwuje ꞌtäcï Papangalu.”

23 A be Yicu gwurlada ngwooꞌra ngwüngün ngwuje ondaci rung rung ngwuje ci, “Lonjaca je ndi aang engga yiꞌral giyee yänggädä je. 24 Nggwa je ci ngwïjïr ngwudi Ngwaalu ngwonyadu na ngweleny ji ngwanni ngwümïnä ndi engga yiꞌral giyee yänggädä je, aar je ꞌti be änggädï, na ndi ꞌdingini ngwujaꞌri ngwanni ngwuꞌdingina je, aar je ꞌti be ꞌdingina.”

25 A doorta deꞌte didi yobo yidi Müjä andada ngwümïnï ndi ïdäjï. Ngwuci nu, “Gwani doorta, nggwadi ärrï ange nunnu nyi mbuji miding gwudi gwurꞌtaling?”

26 A Yicu ci nu, “Yobo yidi Ngwaalu yüllïnä yaraa? Yïlïngïdä je yaraa?”

27 A gur ci yaru nu, “Ämnä Delenya diru Ngwaalu ngwunga ligor le lunga ku, a ligoꞌro le lunga ku a yiima ye yunga ku, a yaꞌrany ye yunga ku. 10.27 Täjïnïyä 6.5 Nga be ämnï gwanggalu nono ata gu ämnï ligoꞌro lunga.” 10.27 Ngwullawi 19.18

28 A Yicu ci, “Ngwujaꞌri ngwunga ngwätï ngwäyänü ärrï je gu a gwa be mbuji miding.”

29 A be doorta didi yobo yidi Müjä mïnï ndi gwällïnï ligoꞌro lüngün ngwube ci Yicung nu, “A mine diweengga diru ange danni dadi nyi ämnï?”

30 A Yicu mïꞌrïcï ngwujaꞌri ngwee, “Luubu, gur geꞌte güllü Üräjälïm gadi ele ngwaalu ngwani Ariya, a ngwuꞌram mbuji aar gwalla ngwureda aar pädänälü aar gatanalu giju ligoranu. 31 A määtä a dirꞌdal deꞌte üllä kayalu nggoo a be anni mung engga guru, ngwugwurli ngwumillidi gay ꞌter.§ 10.31 Dirꞌdalinga Dillawi de lïtï je yedeny ndi akani guru nono nggo gïpïdï ngwuꞌram nunnu la rngï. ꞌDün lati äpïjï Ngwaalinga yobo aar ꞌti nana ndi rngï. 32 A Dillawi ila ꞌto kayalu nggoo anni mung engga ngwugwurli ngwumillidi gay ꞌter. 33 A be dïjï diru Dijamir dïndï dïlä kay nggoo ngwila ngwumbuji guru nggoo gïpïdäär anni mung engga ngwïnä. 34 Ngwuꞌdongga ꞌdünggüngün ngwuyi ngwämmä nono diꞌrica de ngwüdütä yila ye ngwugiki ngwape ngwalliji kïndüꞌrälä güngün ngge ele ngwuꞌdun ngwudi yïrnü ngwombaji.

35 Bïgänü ngwugwalli dinar rom ngwätädä guru gidi ngwuꞌdun ngwudi yïrnü ngwuci nu, ‘Ombaja, miny oꞌra gay ge nggee, gwa ang ätädä gwere gwanni gwa ang dodaji ꞌdünggüngün.’ ”

36 A be Yicu mïꞌrä ngwujaꞌri ngwee ngwuci, “Giligoranu lunga, yärü gwuru gwanni gwuma ru diweengga gïdïjï ndoo dïpïdï ngwuꞌram?”

37 A doorta didi yobo ari, “Danni dïnädï.”

A Yicu gwäꞌräcänü ngwuci, “Ïndï be a je gu ärrï ꞌto no.”

38 A Yicunga ngwooꞌra ngwe ngwüngün ji ndi ele aar gwoda gay gegen, aar obani kündär geꞌte ganni giju gu daw dani Marja ngwuje ülläjälü yïrnü ꞌdunu ꞌdünggüngün. 39 Marja gwätï gwenggen gwuru gera gwani Märïyäm gwanni gwujalu giyoranu yidi Yicu ngwugeraji länï ngwujaꞌri ngwondajing je. 40 A be ligor mïꞌräcï Marjang yiiranu yonyadu yading je ärrï. No ngwüꞌdïꞌrälü ngwuci Yicung nu, “Gwani Doorta, a gwaꞌtiny gu geꞌtaja ngwäyänü ndi ari gera giru gwänggärï giminy gatana ndi ape yiiru jüco? Ondaca ngwila aar nyi gendaci guy.”

41 A be Yicu gwäꞌräcänü ngwuci nu, “Marja, Marja! Ligor lïpïcängä giyiꞌralanu yonyadu. 42 A be yiꞌral yiru guꞌru geꞌte pu ꞌdogo yïmïnïnä, Märïyäm gwuma ape guꞌru ganni gijayana ganni gaꞌti ga ar apada.”