2
Aaꞌti ngaa lïꞌdädänü gilang gwe gwege
1 Ar be arngani ar geraji ngwänï mama ngwujaꞌri ngwanni ngwuꞌdinginar je ngwani Yicu nunnu aaꞌti a la ꞌrämbïrï. 2 Ndi ari ngwujaꞌri* 2.2 Ngwujaꞌri ngwondaja ngwe yïꞌrr ngwuru Yobo yanni yätädä je Ngwaalu Müjäng yïꞌrr ye. ngwanni ngwondaja je yïꞌrr ngwo ngwaalu ngwegen, na ngwüjï ngwe ꞌdar ngwanni ngwa kiyi yobo ngwa aar je rejaji, 3 yäy gu no, ya be ruꞌtana ꞌdengge ndi gwanna rerajing nggwee manari a lima ïꞌdädänü gwulleny gïlängïdïnï gwe nggwee gwupana? Gïlängïdïnï nggwee gwanni gwondaja gwe Deleny dani Yicu gwerre, ngindenga lanni liꞌdingina ngindeng aar nje gäbïcï nyii gu ïcïnä. 4 A gwe Ngwaalu ꞌto inggidi yiꞌremna ye na yiima ye yonyadana yati alliji ngwäjälü ndïr, na angidaci gwe ngwüjü yiiru yidi Lïgïꞌrïm lanni Lijuꞌru ngwuje gegenaci anaku naning gu.
A Kirictu ru dïjï dümnä
5 Yaꞌti ani yïꞌrr yanni yima aar je geꞌte ndi määtä dïdläyü danni dadi oꞌra danni dondajar de gweneno ngwujaꞌri ngwe ngwee. 6 A be yondajaar ye ngwaalu ngweꞌte kitabanu gidi Ngwaalu ndi ari,
“Dïjï dümnä dani yärü dïgätädä gu ngwäyänü,
gïjï gani yärü gidi dïjï dümnä nunnu ꞌdi nga ge arngani?
7 Gokeyananga gwooko gïyïꞌrr
nga giki giꞌriba gidi yeleny nga näjï nga jayi ngwäy
8 nga gïꞌtïjï ngwony ꞌdar ngwuje roꞌtalu gora ge yelenya.” 2.8 Mäjïmür 8.4–6
Gïꞌtïjï gwe ngwony ꞌdar ngwuje roꞌtalu gora ge yelenya, Ngwaalu ngwuma ꞌti dodana yiꞌral yere nding je määtä yelenya. A be gweneno giyona yaꞌti ar je änggädï ndi ari giyona yïmätïng je yelenya. 9 A be Yicu ru gwänggädär gwanni gwokeyaar gwooko gïyïꞌrr, nggwo gwuma aar giki giꞌriba gidi yeleny gwani näjï gwuma aar gwe jayi ngwäy ndi ari gwümätï liguri gïdïrbänü ngwayi, nunnu a yïmïꞌrü ye yidi Ngwaalu ngwungelle yiꞌrany yani ngwüjï ꞌdar.
10 Ndi apada yïjü yonyadu ndi näjï, yädï gu ndi ari a Ngwaalu gäbïcï nginde gwanni gwuru dooꞌra didi gilang gwegen ngwumbuti ngwaalu ku ïyï gwe dïrbä düngün.
11 Yeꞌte yeꞌte ndi ari gwanni gwati juꞌriyi ngwüjü na lanni lijuꞌriyaar je, liru ngwüjï ngwudi längïr leꞌte pu, no Yicu gwaꞌti yaaru apu nding je urnidi ngwenggen. 12 Nginde gwaru nu,
“Äny gwa ondaji ngwürïny ngwe ngwunga ngwänggärï
na gidiliganu didi giꞌdoonga,
äny gwa ang elngaji orta gwe.” 2.12 Mäjïmür 22.22
13 Na ngwoꞌre ngwari,
“Gwunyi gu ämnäcï.” 2.13 Ajaya 8.17
Ngwoꞌre ngwari ꞌto,
“Äny nggwo ngene na yïjï yunga yanni yiminje ätädä gwani Ngwaalu.” 2.13 Ajaya 8.18
14 A be anaku ru gu yïjï lingeno na yïn, nginde ꞌto lima ar le acajidi gwani lingeno legen nunnu yiꞌrany ye yüngün, ngwobedalu nggwo gwanni gwätï yiima yidi yiꞌrany nggwo gwuru dijegoꞌrr. 15 Ndi ari ngwuje gwäꞌdälü ndi elelle ꞌdar gwanni gwelellaar gu gïyïnädänü yidi yedeny yidi yiꞌrany. 16 Ndi ari ꞌdiꞌdidanu yaꞌti yani yïꞌrr yanni yigatajaar je düwä, a be yïjï ru yidi Äbräyïm. 17 Ndi ari yiru giyee yanni yïgäbïcä ngindeng ngwube ru nono ngwenggen gilingeno giyiꞌral ꞌdar nunnu ngwuru dïnä na dirꞌdal danni diru giꞌra diru ligor leꞌte pu giyiiru yidi Ngwaalu nunnu a Ngwaalu düdänïjï ngwüjänü ndi ke gwegen. 18 Ndi ari nginde giligoꞌro lüngün gwïyü dïrbä kaji ganni gïdäjäär ge, nginde gwätï ndi gataji ngwüjü düwä gwanni ngwa aar je ïdäjï.