1 A Yicu obani kündär gani Ariya ngwuji ndi ele. 2 A gur geꞌte giju gu ngeno gani Jäkä giru deleny didi ngwudulba gïnänü. 3 Ngwümïnï ndi engga Yicung ngwube oblanu ngwuꞌti burna, ndi ari ngwüjï ngwonyadu. 4 Ngwümäätä ngwugwalajanu ngwumadina ngwüjü kiꞌra gweere ngwallu gidaꞌrala diru duda nunnu ngwengga Yicung gwadi ila kayalu nggoo.

5 Anni ma Yicu obana ngwaalu ngwoo, ngwüdünï ngwüꞌdïꞌrïyï ngwäy ngwengga, ngwuꞌti ci nu, “Gwani Jäkä, üllädä gwänü nggwadi üllälü yïrnü gwene ꞌdunu ꞌdunggunga.” 6 A gu Jäkä üllädänü ngwülläjälü yïrnü ꞌdunu ꞌdünggüngün gwujayanu.

7 Anni ma ngwüjï ꞌdar engga yiꞌral giyee, aar äbïngïnï giyinenanu aar ari, “Gwuma üllälü yïrnü ngwuꞌdun ngwudi dïjï danni diki!”

8 A be Jäkä ꞌdïꞌrï ngwüdünälä ngwuci Yicung nu, “Gwani Deleny, äny nggwee gwenene ngwadi üꞌrü yelenyanu yüny nje ätädä ngwüjü ngwanni ngwuru ngwuwayi a manari äny gwïyädï dïjü dere ngwony ngwüngün ngwunje gwäꞌräcänü 19.8 Gwuruj 22.1 ngwanni ngwuru gu yomonanu kwoꞌrongo (4).”

9 A Yicu ci, “Gwene gilang gwuma ji kubanu nggee, ndi ari Jäkä nggwee gwuma inggidi ndi ari nginde ꞌto gwuru gïjï gidi Äbräyïm. 10 Ndi ari Gïjï gidi Dïjï dümnä gïndädï ndi mïnï ngwüjü ngwanni ngwududu nunnu ngwuje gïlängïdïyï.”

11 Anni ma ngwüjï ji ndi ꞌdingini ngwujaꞌri ngwee, ngwoꞌre ngwuje mïꞌrïcï ngwujaꞌri ngwuru ꞌter, gaji nggoo giming ge ji gito gito ndi obani Üräjälïm, a be ngwüjï ji ndi geꞌtaji ndi ari yeleny yidi Ngwaalu yadi be ꞌtädälü. 12 Ngwuje be ci nu, “Gur geꞌte gïꞌtüdï kubu gipa ngwube mïnï ndi ele ken golanu aar geꞌta giyeleny ngwube oꞌra. 13 No ngwube urnidi ngwïnädä ngwüngün ꞌdï (10) ngwuje gegenacani bartad.* 19.13 Bartad nggwee ngweꞌte pu gwuru bartadanu küüꞌrï tudini (100). Gwudi yiiru ngwüüwäyü täꞌrïl. Ngwuje ci, ‘Bïlïdär gwe ꞌdi nyi kwodalu.’ 14 Aaꞌti be ngwüjï ngwudi gen güngün ämnä. Aar ükäjï ngwüjü gwodan aar ari, ‘Änyängä laꞌti mïnä guru nggee nding ru deleny därï.’

15 A be gur nggee gima ele ngwuruda deleny ngwukwodalu ꞌdunu. Ngwükäjïdï ngwïnäd ngwüngün ngwanni ngwuming je ätädänï bartad ngwüngün ndi ari gwuma aar gwe bile ange.

16 A dïnäd ila ndee ngwuci, ‘Doorta, äny gwuma bileda gwuma gendaja bartad ꞌdï (10).’

17 Ngwuci, ‘Yijaw gwani dïnäd düny! A gwuru ligor leꞌte pu ngwong ngwee ngwoko nggwa ang ruji deleny didi yündär ꞌdï.’

18 Ngwoꞌre ngwila diꞌter ngwuci, ‘Doorta, äny gwuma bileda gwuma gendaja bartad tudini’ (5).

19 Ngwuci nggwo nu, ‘Nga gwa ape yelenya gïyündär tudini (5).’

20 Ngwoꞌre ngwila diꞌter ngwuci, ‘Doorta apa bartad gwunga gwuminy giki dired de nga gïꞌtïjälü. 21 Yedeny yïtïny ꞌdunggunga ndi ari nga gwuru dïjï dojema ngwujaꞌri nga gwati ape ngwony ngwäꞌtüdï ngwunga, nga uni giruny gaꞌti ang kwüdï.’

22 A doorta ci, ‘Nga gwuru dïnäd diki nggwa ang määtä nggwa ang giki ngwujaꞌri ngwe ngwanni ngwüꞌtüyä je ngwulemanu ngwunga! A gwülïngïdï ndi ari äny gwuru dïjï dojema ngwujaꞌri äny gwati ape ngwony ngwäꞌtüdï ngwüny, nyi uni giruny gaꞌti nyi kwüdï? 23 A mine nga gwarra ma ang ꞌti ätädï dïjü ngwüꞌrïnyä ngwee ngwüny ngwe bile ngwuje geꞌte giyiiru? Nunnu miny oꞌra nje mbuji aar lengadi aar gendadi?’

24 Ngwuje be ci giloo lanni liju lïdünädälä, ‘Äpädär bartad ngaa ätädä dïnädä ndoo dätï bartad ꞌdï.’

25 Aar be ci, ‘Doorta, nginde gwätï be bartad ꞌdï!’

26 Ngwuje ci, ‘Nggwa je ci gwere gwanni gwätï gony gere gwoꞌre gwa aar gendaci mana. A be gwanni gwaꞌti ätï gonyalu gere, ganni gätïng goko ga aar apada. 27 A be gïläꞌdï liru güwän güny lanni liꞌdonya ndi nyi ru deleny degen, apar je nga je üꞌrïꞌtï ngwulem ngwäyänü ꞌdünggüny.’ ”

28 Anni mung gu ari ngwujaꞌri ngwee, ngwube ele ngwelada Üräjälïm. 29 Anni mung jici ngwaalinga gito gito ngwani Bidbaji na Bidaniya gidotra koralu gicar Gidotr gidi Ngwümïnïtï, ngwükäjï ngwoꞌra ngwüngün rom aar madini 30 ngwuje ci, “Ïndär ngwuꞌdunanu ngwoo ngwujica a je kiꞌra gweere. Ma aang ji ndi änï, ngaa la mbuji gïndüꞌrï ganni goko gigekannalu gaꞌti gu na dïjï ändälä aꞌtur. Gwäꞌdädärälü a ge ila ngene. 31 Ma ara je dïjï dere otacalu ndi ari gïgwäꞌdädängälü gidang, car, ‘Gïmïnä Deleny.’ ”

32 Giloo lima aar je ükäjï aar madini, aar ele aar ji mbuji anaku ca je gu. 33 Anni ma aar ji ndi gäꞌdä gïndüꞌrälü, a je ngwüjï ngwudi gïndüꞌrï otacalu, “Ngaa larra ma aang gwäꞌdä gïndüꞌrälü?”

34 Aar je ci, “Gïmïnä Deleny.”

35 Aar apa gïndüꞌrï giru damal aar ge ila ndi Yicu. Aar gu gillici ngwureda ngwegen aar gu alliji Yicungala. 36 Anni mung ji ndi ele gïndüꞌrï ge kayalu, a ngwüjï gïllïcïjï ngwuredalu ngwegen kayalu.

37 Anni mung ji gito gito ngwaalu ngwanni ngwati gu gay üllï Gidotra nono gidi Ngwümïnïtï, a ngwooꞌra ꞌdar ngwudi Yicu jayanu aar ortada Ngwaalinga aar opepala aar elngaji gwulleny gwani yiima ꞌdar yanni yojema yanni ma aar je engga. Aar ari,

39 Ngwübärrïjï ngwoko ngwüjänü ondaci Yicung aar ci, “Doorta, gïrïnyädï ngwoꞌra ngwunga aa gwugundi.”

40 A je Yicu ci, “Nggwa a je ondaci ndi ari ma aar gwugundi, yoꞌrr ya ärï dula.”

41 Anni mung ila ꞌdi ngwujici Üräjälïmïng gito gito, anni mung engga gündärä, ngwarada 42 ngwari, “Adinari nga gwaadi lenge gwene ndi ari yiru ange yïbüpïnä ndi ari a adatalu ji a be a gwaꞌti gwa gu lenge gwene ndi ari yima aar je änïjälü ndi a je engga ngwäy ngwe ngwunga. 43 Yomon yeꞌte yaji ya ang ïlïjä yanni yadi aar a ye güwän änänü ngwäbländï ngwe nga gwaꞌti gwa mbuji gay gidi ꞌtü. 44 La ang pälü la ꞌrinye yïjänü yunga gïdrü na kulu poor laꞌti la gatani goꞌrra gere ngene, ndi ari nga ngwaꞌti lïngïdï gomon ganni gelaca a ge Ngwaalu.”

45 Ngwube ele ngwänï kobanu, ngwümäätä ngwüꞌtïyä ngwüjü poor ngwanni ngwati ji ndi illidi kobanu. 46 Ngwuje ci, “Yüllïnä ndi ari ngwuꞌdun ngwüny ngwadi ru ngwuꞌdun ngwudi otaci Ngwaalingalu 19.46 Ajaya 56.7 ngwuma je be ruji ‘ngwubang ngwudi yuꞌram.’ 19.46 Ärmïyä 7.11”

47 Ating be ele kobo yomon reny ndi enggaci ngwüjü ngwujaꞌri ngwudi Ngwaalu. A be ngwurꞌdal ngwanni ngwuru ngweleny a ngwoorta ngwudi yobo na ꞌto mbumbunga ngwüjänü, ati aar mïnï aar iye ndi ꞌrinye ngindeng. 48 Ati aar ꞌti be mbuja gay gadi aar ge ꞌrinye ndi ari ngwüjï ꞌdar ngwati ji ndi geraci ngwänï ngwujaꞌri aar ꞌti mïnä ndi gatani.