5
1 Ngwurꞌdal ꞌdar ngwanni ngwati ru yiꞌra ngwati aar je äbrï ngwüjänü aar je alliji aar ape giiri na aar ji ngwüjü giyiꞌral yidi Ngwaalu aar angidaci Ngwaalinga aar geꞌte mïꞌrïnïng nono gwani ke. 2 Ngwätï yiima ndi jïlïjï ngwüjänü ngwanni ngwaꞌti lïngïdï ngwududu, ndi ari nginde ꞌto gwuru dïjï damiꞌratu. 3 Ndi ari yiru giyee yïgäbïcä ngindeng ngwümïꞌrïnï nono gwani ke gwudi ligoꞌro lüngün, na ꞌto gwani ke gwudi ngwüjï.
4 Dïjï dere daꞌti dapu näjïng nggwee gwudi ape giiri gidi dirꞌdal diru giꞌra ligoꞌro le lüngün. A be Ngwaalu ru ngwati urnidi anaku urnida gu Ngwaalu Aruuning ndi ru dirꞌdal danni diru giꞌra. 5 No Kirictu ꞌto gwaꞌti apu näjïng giligoꞌro lüngün ndi ru dirꞌdal danni diru giꞌra. A be Ngwaalu ru ngwuca nu, “Nga gwuru Gïjï güny, gwene äny gwuma ru Papa gwunga.” 6 A nginde gwondaja gu ngwaalu ngwuꞌter ngwari,
“Nga gwuru dirꞌdal yomonalu pipiꞌriꞌti
gïdïꞌrïny didi yirꞌdal yidi Mälïkï Jadig.” 5.6 Mäjïmür 110.4
7 Giyomon yidi Yicu yanni yijung ye ngene gïdïyängälü, gwotaca Ngwaalingalu ngwuje päcälü ngwudugi yal ye yipa gwani nginde gwanni gwätï yiima nding gïlängïdïyï giyiꞌrany, aar ꞌdengenaci nunnu denya na ꞌdengenaci gwüngün. 8 Nginde gwuru Gïjï, ngwube lenge ndi ꞌdengenaci Ngwaalinga ngwujaꞌri ngwe ngwanni ngwïyüng gu dïrbä 9 anni mung je gu mbütï, nginde gwuma ru gay gidi gïlängïdïnï gwudi gwurꞌtaling gwudi ngwüjï ꞌdar ngwanni ngwa ꞌdengenaci 10 na nginde gwäbrü Ngwaalu ngwuru dirꞌdal danni diru giꞌra gïdïꞌrïny didi yirꞌdal yidi Mälïkï Jadig.
Mätïnälü ꞌdïꞌdäny ndi ämnï Ngwaalu gwalu
11 Yiꞌral giyo yonyadu yïmïnï nje ndi ara je ondaci. A be yundu ndi ara je enggaci ndi ari ngaa ru yaꞌranya yoko ndi lenge. 12 Ndi ari gaji ge nggee ngaa ladi be ji ndi ru ngwoorta, ngaa gilo be linana dïjü ara je enggaci gatu yora ngwujaꞌri ngwudi Ngwaalu ngwanni ngwuru ꞌdidanu ara je gu gwäꞌräcänü mana. Nga nga gilona liru nono yïjü yanni yoko yinana ndi iꞌri yan yaꞌtina lengedadu ndi eny enying gwanni ngwojemanu!
13 Gwere gwanni nggwona ndi iꞌri, nggwona gwuru gïjï goko gwaꞌti gu na ngwujaꞌri ändänü ngwani dünälü. 14 A be ngwong ngwudi eny ngwanni ngwojemanu, aar be ru ngwudi ngwüjï ngwanni ngwuma pe ngwuma bebere ngwanni ngwuma je ngwujaꞌri madinanu ngwïdïtänä gu yigoꞌro yegen yomon reny ndi lenge ndi ari yiru giyene yanni yijaw na yiru giyene yanni yiki.