1 A gwani gïjï güny, ojema nono gïyïmïꞌrü yanni giyo ndi Yicu Kirictu. 2 A ngwujaꞌri ngwanni ngwuma je ꞌdingini ꞌdünggüny ngwari nyi ngwe ngwäyänü ngwüjï ngwanni ngwänggädï je ngwonyadu, ätädï je ngwüjü ngwänggädä je ngwuru yigor yeꞌte pu ngwädï ndi enggaci ngwüjü ngwuꞌter.

3 Orꞌtemaja gïdïrbänü, ar ru leꞌte leꞌte nga ape yongra yijaw yidi dïjï didi Yicu Kirictu. 4 Gwanni gwati ape yongra gwati ꞌti änïjä ligoꞌro lüngün giyiiru yiꞌter. Nginde gwunana ndi jada kumndaninganu güngün. 5 Yiru gu yeꞌte yeꞌte ꞌto ndi ari dïjï danni dati enati ndi dokati, dati ape guꞌru manari daꞌti enatu anaku ari gu ngwujaꞌri. 6 Dïjï danni dati undi ngwäy ndi kwoy, diru dadi ru giꞌra ndi ape guꞌru güngün gidi yuula. 7 Ïrïyä ngwäyälü ngwujaꞌri ngwee ngwaru nyi ngwe, ndi ari Deleny da ang ätädä bebereng gwani yiꞌral giyee ꞌdar.

8 Diwayina Yicu Kirictung gwüꞌdïꞌrälü giyiꞌranyanu, gwuru dïgüürnä ndi Däwüd gwuru deleny. Ngwujaꞌri ngwuru ngwee ngwanni ngwujaw ngwanni ngwati nje ondaci ngwüjü 9 ngwanni ngwïyï nyi gu dïrbä ꞌdi aar nyi giki yuꞌrung ye nono minyi ru dïjï digeꞌta giimra. A be ngwujaꞌri ngwudi Ngwaalu ngwaꞌti gikanalu. 10 Yäy gu no, äny gworꞌtemaja giyiꞌral ꞌdar gwani ngwüjï ngwanni ngwäbrïnä, ndi ari ngindenga ꞌto aar mbuji gilanging gwanni nggwo ndi Yicu Kirictu näjï gwe gwudi gwurꞌtaling.

11 Ngwujaꞌri ngwee ngwädï gu,

14 Diwayiniya ngwüjü yiꞌral giyee. Nga je arnga ngwäyänü Ngwaalu ndi ari kadadi ngwujaꞌri gwati ꞌti apu yiꞌral yere yanni yiru ꞌdidanu, gwati geraji ngwüjälü ꞌdogo ngwanni ngwati ꞌdingini. 15 Undu ngwäy gwulleny nga gwällïnï Ngwaalu, nga ru däänü dapu yiiru daꞌti yaaru apu giyiiru yüngün nga inggidi yiꞌral yanni yiru ꞌdidanu inggiding gwanni gwïndï kayalu. 16 ꞌTüdï ngwujaꞌranu ngwudi yeꞌrr, ndi ari lanni lati änï giyiꞌralanu yanni yiru gu no, lati ꞌtü aar kedani gïdrü didi Ngwaalu. 17 Ngwujaꞌri ngwegen ngwanni ngwati aar je enggaci ngwüjü, ngwati badalu nono doya ngwanginu. Nono Iminiyujing Bilotej gwe, 18 lanni lima je ngwujaꞌri doda ngwanni ngwuru ꞌdidanu. Lati ari ꞌdïꞌrï giyiꞌranyanu gwuma ila gwuma ele, yiꞌral ye giyee, lima geraji ämnïngälü Ngwaalu gwudi ngwüjï ngwoko. 19 A be yidingo yidi ngwujaꞌri ngwudi Ngwaalu, yijalu ndom, yïngïdädäär je dilge de ndee, “Deleny diru dïlïngïdï ngwüjü ngwüngün.” 2.19 Adad 16.5 Aar ari ꞌto, “Gwanni gwati äpïjï Delenya dege yiiru, ngwujoꞌrenyana giyiꞌral yanni yiki.” 2.19 Ajaya 52.11

20 Ngwuꞌdunanu ngwanni ngwupa, ngwati ꞌti ätï ngwonyanu ngwuru dab na buta ꞌdogo, aar be ätï ꞌto ngwonyanu ngwuru yüꞌrï na yimo. Ngwoko ngwati aar ngwe ape yiiru yanni yijaw na ngwoko ngwati aar ngwe ape yiiru yanni yïrngü. 21 Manari dïjï dima aar gaꞌru giyiꞌral giyee yïrngü, da aar de ape yiiru yanni yijaw, da aar juꞌriyi, da jayi gidoorta a da aar jaꞌrima ndi ape yiiru yere yanni yijaw.

22 ꞌTüdänü ndi amiꞌra gwudi yamal gwanni gwuki, nga dünälü nga ätï ämnïng Ngwaalu nga ätï ämnïng, nga ätï adatingalu ngwüjïngä le ꞌdar ngwanni ngwati urnidi Delenya yigor ye yijuꞌranu. 23 ꞌTüdänü ndi garnati gwudi yeꞌrr gwuru ꞌtur, gwülïngïdä gwe gwati apa kading. 24 A yaꞌti ädï gïdïnäd didi Deleny ndi kadi. Ngwube manni ru danni dijaw liguri ngwüjï ꞌdar, ngwuburni ndi enggaci ngwüjü, ngwädïyï liguralu. 25 Ngwuje raꞌti lanni lati ïnïjï ngindeng ligor le lïjïlänü, ndi ari ma je Ngwaalu allici kil, aar joꞌrenyana aar lenge ngwujaꞌri ngwanni ngwuru ꞌdidanu. 26 A ndi ari ngwuje allici kil aar oꞌra yigor yegen aar gwanna ngwüꞌdïbä ngwudi dijegoꞌrr ngwanni ngwuma aar gu ïꞌdänü aar ru ngwïnäd gwüngün.