1 Adinari nyi ätï yiima ndi ondaji ngwungla ngwe ngwuꞌter ngwudi ngwüjï ngwümnä na ngwudi yïꞌrr, nyi ꞌti be ätï ämnïng, äny gwuru nono laaba lïpïnä kïlïng kïlïng ꞌdogo na nyi aranu rïng rïng nono gäꞌrïnggülä. 2 Adinari aar nyi angidaci ndi alliji yïjïrä nyi lenge yujimida ꞌdar nyi ätï bebereng ꞌdar na adinari nyi ätï ämnïng Ngwaalu ꞌdi ating äbrï yeno, nyi ꞌti be ätï ämnïng, äny gwuru ꞌtur. 3 Adinari nyi ätädä ngwuwaya ngwony ngwüny ꞌdar nyi gatu ngwanginu ngwüny gïlïgä aar üꞌdïnï* 13.3 Yitab yoko yati ari, nunnu nyi ïrïngïnï. nyi ꞌti be ätï ämnïng, yaꞌti nje mbuji yere.

4 Ämnï gwati määtä liguri, ämnï gwati ïnä, ämnï gwäꞌtüdï yïꞌdüny, ämnï gwati ꞌti ïrïngïnä na gwati ꞌti piya ligoꞌro. 5 Ämnï gwati ꞌti arru yiꞌral yiki, gwaꞌti büpädï giligoꞌro lüngün, gwati ꞌti kanu torneny, gwati ꞌti gïꞌtïnïjälü giyiꞌral yanni yiki. 6 Ämnï gwati ꞌti jayanu giyiꞌral yanni yiki gwati jayanu giyiꞌral yanni yiru ꞌdidanu. 7 Ämnï gwati etadi giyomon ꞌdar gwati ämnäcï giyomon ꞌdar gwati geꞌtaji giyomon ꞌdar, gwati orꞌtemaji giyomon ꞌdar.

8 Ämnï gwati ꞌti dämïnä aꞌtur. A be gwani yïjïr, yadi dünï, gwani ondaji ngwungla ngwe ngwuꞌter, gwa medadi, gwani bebere, gwa dudi. 9 Ndi ari yïlïngïdär je yerel yoko ar alliji yïjïrä yerel yoko, 10 ma be aji ma mbuti ila, yanni yaꞌti mbutu ya be abri kayanu. 11 Anni rüdïny gwooko, nggwati ondaji yogonga nono gïjï ganni gooko, nyi ïrïyï ngwäyälü nono gïjï ganni gooko, a yaꞌrany yüny ru nono yidi gïjï ganni gooko. A be anni minyi pe, nggwuma gatu yogonga mbüny gwodan. 12 Yati ar je engga gwenene, yänggädär jälü ngwüꞌrïmbïlä nono gwele kalmandranu, ya be aji ya ar je engga ngwäyänü. Gwenene yïlïngïdï nje yerel yoko nggwa be aji yinje lenge ku nono linginniny gu ku.

13 Na gwenene giyee täꞌrïl giyo yijalu, ämnï Ngwaalu, geꞌtaji na ämnï. A be yanni yipana guꞌru giyiꞌral giyee, ämnï gwuru.