1 Ndi ari äny gwaꞌti mïnä ndi ari ngaa dodani lani ngwänggärï yiꞌral yanni yiju ngwüjï ngwudi Yïjïräyïl ngwuru ngwügüürnä ngwege gwerre. Ngwügüürnä ngwege ꞌdar ngwuju gu gïbäꞌrälä giru yiima yidi Ngwaalu, ꞌdar aar üꞌrü yaanu 2 gaji ganni güdï je ge Müjä, ꞌdar aar nyïnyïnï giyaw yanni yüꞌrïdäär jänü na kïbäꞌrü ganni gïgätï jälä. 10.2 Mäjïmür 78.13–14 3 ꞌDar lïtï enying gweꞌte gweꞌte gwudi lïgïꞌrïm 4 na ngindenga ꞌdar lïyü ïyïng gweꞌte gweꞌte gwudi lïgïꞌrïm gwanni gwügïꞌtïjä je Ngwaalu yiima ye yüngün. Ndi ari lïyü yaw yidi lïgïꞌrïm yanni yïꞌtüyä je Ngwaalu aar bälädälü kiꞌri ganni gïndäär le. Na giꞌri nggoo gïndäär le, Kirictu gwuru. 10.4 Gwuruj 17.1–7; Adad 20.2–13; Mäjïmür 18.2 5 A lonyadu aaꞌti yiꞌral yegen jädï Ngwaalinganu a je Ngwaalu gäbïcï aar ayalu a ngwangina ngwege badalu poor gïtäny. 10.5 Adad 14.29–32

6 A be yiꞌral giyee yiju nunnu aar nje yedeny eny aaꞌti yigor yege ya ape yiꞌral yanni yiki anaku apa gu ngwüjï ngwoo yiꞌral yanni yiki. 7 Aaꞌti äpïjï dïdülä yobo yere anaku äpïjär gu loko dïdülä yobo, anaku üllïnäär gu ndi ari, “Ngwüjï ngwujalu ndi eny aar ïyï aar be ꞌdïꞌrï ndi aku ngwuꞌdera aar riti riting gwudi yïjïn.” 10.7 Gwuruj 32.6 8 Aaꞌti a la ru ngwïjïn anaku rar gu ngwïjïn loko ꞌdi aar je ꞌrinye gomon geꞌte pu ngwüüꞌrï küüꞌrï na täꞌrïl (23,000). 10.8 Adad 25.1–18 9 Aaꞌti a la ïdäjï Delenya anaku ïdäjäär gu loko, a je ngwüüngä eny aar ayi. 10 Na aaꞌti ngaa la äbïngïnï giyinenanu anaku äbïngïnäär gu giyinenanu loko, a je gïꞌrr gidi yiꞌrany ꞌrinye.

11 Yiꞌral giyee ꞌdar yimbuja je nunnu aar ru yanni yadi nje enggaci ngwujaꞌri ar arngani, ngwüllïnä nunnu aar nje girinya lanni lima je gu ngwüdlä ngwee mbutanu. 12 Yäy gu no manari nga gwänggädï ndi ari nga nggwo gwümätïnälü ꞌdïꞌdäny, arngana be ligoꞌro lunga aaꞌti a gwa ïꞌdï! 13 Dïrbä danni dimbuja je, dimbuja je ꞌdogo anaku ating gu mbuji dïjü dümnä. A be Ngwaalu ngwuru ligor leꞌte pu ngwaꞌti ngwa je gäbïcïjï gony gere ndi aar je ïdäjï yiima ye yipana ꞌdanggalu manari ngaa lima ji gïdïrbänü, Ngwaalu ngwa je gïꞌtïjï gay nunnu ga ge orꞌtemaji.

14 Yäy gu no, lani ngwumaad ngwüny, abrar yobo yidi dïdülä. 15 Äny gwondaca je liru ngwüjï ngwätï yigor, ombajar je be yigor ye yalu. 16 Giny ganni gati ar gu uli ar ari yäy ꞌtu, gäꞌtüdï gidi acajidi gwudi yïn yidi Kiricto? Na gon ganni gati ar üꞌränü ar giginanu gäꞌtüdï gidi acajidi ngwanginu ngwudi Kiricto? 17 Ndi ari gon giru geꞌte pu, ar be onyadi, ar ru ngwanginu ngweꞌte pu ndi ari gon giru geꞌte pu gacajidar gu ꞌdar.

18 Ombajar ngwüjü ngwudi Yïjïräyïl, läꞌtüdï lanni lati eny ngwony ngwudi mïꞌrïnï nono, lati acajidi gidagade? 19 Giyee yani ange? Gong ganni gïmïꞌrïnäär ge nono gïdïdülä giru gong gere, ya dïdülä diru gong gere? 20 Bärï, a be ngwong ngwanni ngwati ngwe ngwüjï ngwudi dïdülä mïꞌrïnï nono, ngwati aar je dügïjï ngwüꞌrïllä ngwati aar je ꞌti dügïjä Ngwaalinga. Nggwaꞌti a je mïnä ndi aang acajidi ngwüꞌrïllä ngwe. 21 Ngaa laꞌti la acajidi kiny gidi Deleny na kiny gidi ngwüꞌrïllä ꞌto. Ngaa laꞌti la acajidi ndi eny ꞌdün gïdïmbür didi Deleny na gïdïmbür didi dïꞌrïllä. 22 Yiꞌral giyee yani ndi ari a ladi iye Ngwaalinga ligorano? 10.22 Täjïnïyä 32.21 A lojemana nono ꞌdünggüngüne?

23 Ngwüjï ngwoko ngwati ari, “Yiꞌral ꞌdar yäꞌtüdï drü ꞌdünggüny,” a be yiꞌral ꞌdar yaꞌti jaw ꞌdünggüny. Ngwüjï ngwoko ngwati ari, “Yiꞌral ꞌdar yäꞌtüdï drü ꞌdünggüny,” a be yiꞌral ꞌdar yäꞌtüdï yidi oda. 24 Aaꞌti dïjï dere da bupi jaying gwudi ligoꞌro lüngün, ngwube bupi jaying gwudi ngwüjï ngwuꞌter. 25 Ngwüdï ngwere ngwïllïnä ngwiliny ïtär je, aaꞌti ngwa ngwe utalu giligoranu, ndi ari, 26 “Dïyäng didi Deleny diru na ngwong ꞌdar gïdïyängälü ngwüngün ngwuru.” 10.26 Mäjïmür 24.1 27 Ma be ari dïjï dere danni däꞌtüdï didi giꞌdoonga gidi Ngwaalu dima je urindi ndi eny ꞌdunu ꞌdünggüngün, ma aang be mïnï ndi gwujani, ma aar je ätädä ngwony ngwere ngwudi eny, ïtär je aaꞌti ngwa gwe utalu giligoranu. 28 Ma be ari dïjï dere dima ang ci, “Ngwong ngwee ngwümïꞌrïnäär ngwe nono ngwudi dïdülä ngwuru,” aaꞌti be ngwa je eny gwani dïjï ndoo dondacanga na gwani ligor 29 nggwaꞌti äbïngädï giligor lalu a be ligor ru lidi dïjï diꞌter. Ndi ari ange gwuru a nyi be ligor lidi dïjï diꞌter ümïnïcï ndi gätïnï linginalu gwüny? 30 Manari äny gwati ci Ngwaalinga yäy ꞌtu nyi be eny yiru ange aar nyi gwe be obalu gwani eny gwuciny gu Ngwaalinga yäy ꞌtu?

31 No, manari ngaa lati eny ngaa ïyï yaa yere ꞌdar yanni yati a je ärrï, ärrär je gwani näjï gwudi Ngwaalu. 32 Aaꞌti ngaa la gäbïcï dïjï dere ndi obalu arri gwe gwalu, Ngwüyäwüd na ngwüjï ngwuru Garany na giꞌdoonga gidi Ngwaalu. 33 Nono ati nyi bupi ndi gäbïcï ngwüjü ꞌdar aar jayanu giyiꞌral ꞌdar ndi je ärrï. Ndi ari nggwaꞌti ärrädï ndi jayi gwudi ligoꞌro lüny, nyi be arrada ndi jayi gwudi ngwüjï ngwonyadu, nunnu aar gïlängïdïnï.