1 Äny gwaꞌti gätïnä linginalu ndi ärrï yiꞌral yanni yïmïnä je Ngwaalo? Äny gwäꞌtüdï dooꞌra dükäjääre? Äny gwaꞌti änggädï Delenya dege dani Yico? Deleny däꞌtüdï ruja je ngwïkïrïjïn äny gwe? 2 Manari loko länggädïny ndi ari nggwäꞌtüdï dooꞌra dükäjäär, yiru gu ndi ari ngaa länggädïny gu ndi ari äny dooꞌra dükäjäär! Ndi ari ngaa liru inggidi gwudi ükäjï gwüny Gideleny.

3 Ngwujaꞌri ngwee ngwuru ngwanni ngwatiny ngwe ruci ligoꞌro lüny ngwüjï ngwanni ngwatiny ngwe obalu. 4 Nyii laꞌti gu ätï ndi nje ätä enying na ndi ïyïng gwani ape yiiru gwärï? 5 Nyii laꞌti gu ätï ndi ari nyii apani dayu dämnä Ngwaalu, anaku ati gu ngwooꞌra ngwükäjäär je ngwoko ru, na ngweengga ngwudi Deleny na Butruje? 6 A be nyängä Birnaba gwe ru ꞌdogo jücü laꞌti ätï gu ndi nje ätä, ꞌdogo nyii ape yiiru nyii enye? 7 Ma gwuꞌtulu ji giyiiru gwati apani ngwony ngwanni ngwümïnïng je? Yärü gwanni gwati kwoy daarti didi yügïrï ngwuꞌti be ïtï yügïrï? Na yärü gwuru gwanni gwati iye yoꞌra ngwuꞌti be ïyü yan yegen? 8 Äny gwondaja ngwujaꞌri ngwee nunnu ngwuru ngwudi dïjï dümna? Yobo yidi Müjä yaꞌti ondaja ngwujaꞌri ngwee ngweꞌte ngweꞌte? 9 Ndi ari yüllïnä kitabanu gidi yobo yidi Müjä ndi ari, “Aaꞌti nga gwa gekaji gindri ngwüjïrtï ngwulem ma ge ji ndi ape yiiru.” 9.9 Täjïnïyä 25.4; 1 Timijawuj 5.18 Gïndrï giru gondajaja gu Ngwaalo? 10 ꞌDidanu Ngwaalu ngwondaja ngwujaꞌri ngwee ꞌdar ngwani alanga, yaꞌti gu rüde? Yäy, giyee yüllïnä yani alanga ndi ari manari dïjï didi giruny dima gwürï, dati dünïcï yiiru yidi ngwuy ngwüngün, na danni dati uꞌri dati gu ru ꞌto ndi ari ngwa ji aar emadi giyonanu. 11 Ma be ari nyii lima je gu kwoy yuula yidi lïgïꞌrïm anni ondacara je ngwujaꞌri ngwanni ngwujaw, a be yonyadana yere manari lima je unada yiꞌral nono yidi lingeno? 12 Manari ngwüjï ngwoko ngwätï gu ꞌdanggalu yiꞌral giyee ndi ari ngaa je gendaci ngwuy, nyii laꞌti be laadi gu ätäne?

A be nyii laꞌti gu ätï giyiꞌral giyee. Nyii be manni määtä yiguri giyiꞌral ꞌdar nunnu aaꞌti nyii la ümïnïcï ngwujaꞌri ngwanni ngwujaw ngwudi Kirictu. 13 Nga nga laꞌti lïlïngïdï ndi ari ngwüjï ngwanni ngwati ape yiiru kobo ngwati mbuji enying gwegen kobo na lanni lati ape yiiru yidi dagad, lati emadi ngwong ngwanni ngwati aar je gatalu gidagade? 14 Gay ge geꞌte geꞌte, Deleny daru, ngindenga lanni lati ondaji ngwujaꞌri ngwanni ngwujaw, aar mbuji enying gwegen ngwüjï ngwanni ngwa ämnï ngwujaꞌri ngwanni ngwujaw.

15 A be äny gwaꞌti mbuja gony gere ngwujaꞌri ngwe ngwee na nggwaꞌti ullu ngwujaꞌri ngwee ndi ari äny gwümïnü gony gere, ya jayani manni ndi nyi ayi ndi ari a nyi dïjï dere düdïjï ïrïngïnïng nggwee. 16 Ma be ari nyi ondaju ngwujaꞌri ngwe ngwanni ngwujaw, nggwaꞌti gwa ïrïngïnï ndi ari lilinyaciny ndi ondaji ngwujaꞌri. Wäjäj bi ꞌdünggüny manari äny gwuma ꞌti ondaca ngwüjü. 17 Adinari äny gwapu yiiru giyee yidi ondaji giꞌra ge güny, äny gwaadi utalu guꞌru ge gidi yiiru yüny. A be anni aaꞌti nyi ondaja giꞌra ge güny, ya be ani ndi ari äny gwüꞌdïꞌrü yiiru ye yanni yicaar nyi ye. 18 Guꞌru güny giru ange? Guꞌru güny giru ndi ari nyi ondaci ngwüjü ngwujaꞌri ngwanni ngwujaw ꞌdogogalu tar nggwaꞌti gu ätï.

19 Äny ngwuru dïjï dïgätïnä linginalu nggwäꞌtüdï dïnäd didi dïjï dere, nyi be gäbïcï ligoꞌro lüny nyi genne ngwüjï ꞌdar nunnu nje apada ngwonyadu ndi Kirictu. 20 Ngwüyäwüd, nyi arri nono Ngwüyäwüd nunnu nje apada ndi Kirictu, lidi yobo yidi Müjä, nyi arri nono ngindeng je, nyi be ru gwanni gwaꞌti ïndï yobo ye, nyi gu be ru nunnu nje apada ndi Kirictu lidi yobo. 21 Miny ji ngwüjï ngwe ngwuru Garany ngwanni ngwaꞌti ätï yobo yidi Müjä, nyi arri nono minyi ꞌti ätï yobo yidi Müjä, nunnu nje apada ndi Kirictu lanni laꞌti ätï yobo, nyi be ru gwanni gwätï yobo yïndï Ngwaalu ndi ari äny gwämnä yobo ye yidi Kirictu. 22 Ngwüjï ngwanni ngwamiꞌratu, nyi amiꞌrati nunnu nje apada ndi Kirictu lanni lamiꞌratu. Nyi gu ru ngwüjï ꞌdar giyiꞌral ꞌdar ngway ngwe ngwonyadanu nunnu nje gïlängïdïyä loko ndi Kirictu. 23 Yati nje ärrï giyee ꞌdar nunnu a ngwujaꞌri ngwanni ngwujaw badalu nunnu nyi ape guꞌru ndi onjaci gwüngün.

24 Ngaa laꞌti lïngïdï ndi ari ꞌdar lanni lati dokati, lati dokati, ngwube aji ngwuru gweꞌte pu gwanni gwati ape guꞌro? Dokatar be ꞌto no nunnu aang ape guꞌru.

25 Gwanni gwati ele ndi dokati, gwati määtä ngwangina ꞌdïꞌdäny ndi ïdïtänï. Lati gu ru no nunnu aar je giki giꞌriba gidi yeleny ganni gati medadi, a be alanga, lati dokati nunnu aar nje giki giꞌriba gidi yeleny ganni gati jalu gwurꞌtal.

26 Yäy gu no, äny gwaꞌti dokatu nono dïjü didokatalu rügüm. Äny gwaꞌti pidu giꞌrundu ge nono dïjü dïpïdï diruna. 27 No äny gwümätï ngwangina ngwüny aar ru dïnäd ꞌdünggüny nunnu minyi ondaci ngwüjü ngwuꞌter ngwujaꞌri ngwanni ngwujaw, äny ligoꞌro lüny aaꞌti nggwa amiꞌrati ndi ape guꞌru.