1 Gwenene gwani geꞌtajidi ngwuy ndi gataji giꞌdoonga düwä gidi Ngwaalu Üräjälïm, ärrär je yanni yiciny ye ngwïkïrïjïnä ngwudi yiꞌdoonga yidi ngwaalu ngwani Galatiya ndi aar je ärrï. 2 Gomon ganni giru giꞌra giyomon ꞌdar kwoꞌra täꞌrïl, ati dïjï deꞌte deꞌte ꞌdanggalanu äbrï ngwüꞌrïnyä ngwoko ngwanni ngwata je mbuji ngaa je geꞌtaji gay geꞌte ngaa je geꞌtalu, nunnu minyi ila, aaꞌti ba be a la ji ndi ari ar utitalu. 3 Miny obana, nggwa be üllïjï ngwüjü ngwanni ngwuma je äbrï ngwujaꞌri ngwunje ükäjï aar ape angidacing gwalu aar äpïjï giꞌdonga gidi Ngwaalu Üräjälïm. Na ngwujaꞌri ngwanni ngwunje üllïjï, linje inggidi ndi ari lani yärüngä. 4 Manari yima gu jayi ndi ari nyi ele ꞌto, linyii le be gwugwudidi.

5 Ma be ari äny gwuma millidana ngwaalu ngwani Majiduniya, nggwa be ila ꞌdanggalu ndi ari äny gwadi millidana ngwaalu ngwani Majiduniya. 6 Ma aar gu ru, a la jalu gwooko nyi jalu digo de, nunnu nyii gataji düwä gïdïlä düny ngwaalu ngwere ngwadi nyi gu ele. 7 Nggwaꞌti jädï ndi ila nga je enggani gwenene ꞌdogo, nyi be ele. Nggwugeꞌtaja ndi ar jalu gwooko ma gu Deleny ari. 8 A be nggwadina jalu ngene Abijuj ꞌdi a gomon ila gidi Yïꞌrïnyïnä yidi Uni, 9 ndi ari Ngwaalu ngwuminy ïgïtïjï gay gipa gidi yiiru yonyadu ndi äpïnï a gilo lonyadu lanni lïnïjïny.

10 Ma Timijawuj ila, ombajar aaꞌti gwa yiꞌral yere iyiyi yedenyo ma le ji, ndi ari gwapu yiiru yidi Deleny nono änyïng. 11 Yäy gu no, aaꞌti gwa dïjï dere calu mireny. Gwäꞌrär nunnu ngwa ji ngwoꞌra gora gijaw aar nyi oꞌraca nggwo gwüdünïcïny ndi aar ila ngweengga ngwe.

12 Gwenene ndi utalu gwalu gwani diweengga dege dani Abuluj, gwüpäcïnyälü gwulleny nunnu aar gwugwudida ngweengga ngwe ngwila ꞌdanggalu. Nggwo be gwaꞌti gu jädï gwenene ndi ila a be gwa ji gwila mung mbuja gay.

13 Arnganar. Mätïnärälü ꞌdïꞌdäny ndi ämnï Ngwaalu. ꞌRaranu. Ojemar nono. 14 Ärrär yiꞌral ꞌdar ämnï gwe.

15 Ngaa lïlïngïdï ndi ari gubu gidi Ijitabanaj liru lanni liru ngwïkïrïjïn gwerre gwerre ngwaalu ngwani Akayiya a lima geꞌtaji yigoꞌro yegen giyiiru yani ngwüjï ngwudi Ngwaalu. Nggwa je päcälü lani ngweengga ndi aang 16 ꞌdengenaci ngwüjü ngwanni ngwuru gu no na ngwüjï ꞌdar ngwanni ngwati acajidi ndi ape yiiru aar gu undi ngwäy. 17 Nggwujayanu anni ma ngweengga ngwani Ijitabanaj na Bartunatuj na Akiyakuj obana, lima je gu mandi ndi aar nyi gataji düwä. 18 Ndi ari lima jïläjï ligoranu lüny anaku jïläjärä je gu. Yäy gu no ngwüjï ngwanni ngwuru gu no, ngwädï gu ndi ar je näjï.

19 Ngwïkïrïjïn ngwudi yiꞌdoonga ngwaalu ngwani Ajiya, ngwaganna je. Äkïllä na Bärjïkïllä, laganna je aganning gwübüdü Gideleny na ꞌto giꞌdoonga ganni gati acajidi ngwuꞌdun ngwegen. 20 Ngweengga ꞌdar ngene ngwaganna je. Agannajidar giyenenanu agannajiding gwanni gwujuꞌru.

21 Äny, gwani Bulij gwullu aganning nggwee guy ge güny.

22 Manari dïjï dere ndo dati ꞌti ämnä Delenya, aar gu ꞌtäjï ngwünyü. Gwani Deleny därï, ila!

23 Ara je gu yïmïꞌrü ji yidi Deleny dani Yicu.

24 Nggwämnä je ꞌdar ndi Yicu Kirictu. Yiru gu.* 16.24 Yitab yoko yaꞌti ätï ngwujaꞌri ngwee ngwani, “Yiru gu.”