1 Kheh te lehq, ngag yad-og, Yer suq Khreq ve awg bon khuhn awg ghad cawag vid-oq. 2 Sax khiz khanr sehr phad* 2:2 Sax khiz khanr sehr phad Pawd loq mar che bon khuhd gha kad lehq yonr che chaw teq pa haq koz che yaog. 1Ti 6:12 laex ghad mehz khuhd suhr nawg ngag geh gha kad lar peg che awg ceng teq pa, su haq mar vid pix che kar tiq yeg che chaw teq pa haq kawq chid aq vid-oq.

3 Yer suq Khreq ve daq che maq yad† 2:3 maq yad Khreq yad awr lehr maq yad haq sur che awg lawn Pawd loq laex pawz koz che yaog. heh te lehq, nawg ngag hehd geh teq geha tuq che khanr che haq khanr yuor. 4 Maq yad te chehd che chaw khar ve te ghad lehd ma koz, a sug yawd ved awg hox ni ma cawd tug te gad che haq te lehq, a sug yawd awg ton awg pun maq yad kanx ma hez che kanx teq pa awg khuhn kax tinr huhz tinr lar tug yawd maq te. 5 Cex daq che pawehd awg khuhn gehe che chaw te ghad awr lehr, awg lid awg khad cawg che heh maq cex ver, su yawd haq ghad sehr phad yaog lehz maq sawnr vid. 6 Kanx te nar che mig cad par awr lehr, awg sir haq awg kawd gha cad cawd che yaog. 7 Ngag koz chehd che haq duhd ngawx ser. Awg lawn ghod ver, Jawd mawd Ghig sa awr lehr, awg ceng gha lia che haq nawg sir vix tug cud yiq pehar tug yaog.

8 Ngag ha lehg che bon khuhd mar vid lar peg che heh, Dar viq ve awg ceng awg khad‡ 2:8 Dar viq ve awg ceng awg khad Yer suq awr lehr chaw yad phehq cehg mag che haq mar lar che yaog. phehq che, suh kig lo kawq teq tuag peg che Yer suq Khreq haq duhd nuhd-oq. 9 Ha lehg che bon khuhd u ve haq te lehq, chaw haeg te ghad heh te lehq ngag haq su pheh teh lar lehq, tuq che khanr che haq ngag gha khanr che yaog. Kheh ma khuhd, Ghig sa ve tawd khuhd haq su pheh teh lar maq gha. 10 Che ve haq te lehq, Ghig sa lez yug lar che chaw§ 2:10 lez yug lar che chaw Khreq yad teq pa haq koz gad che yaog. 2Pt 2:9 teq pa awg pun awg ceng gha lia haq ngag yeg khanr che yaog. I hehd liz Yer suq Khreq khuhn thaer khuhq che he lehq co co taer taer awg mig awg phond haq gha tug awg pun yaog. 11 Tawd che te khuhd awr lehr, kar tiq yeg che tawd khuhd phehq che yaog.

14 Awg lawn che teq pa i hehd haq kawq duhd nuhd vid-oq. Tawd khuhd teq pa awg lawn tawd maq gha ghawg daq tug, Ghig sa mehz khuhd suhr i hehd haq sa tiq pid-oq. Che kheh te tawd ghawg daq che awr lehr, teq chaweh awg bon mad cawg che awg khod-aq liz, kad sehr phad teq pa haq te lug vid che yaog. 15 Nawg awr lehr, Ghig sa ni ma cawd che kanx te par phehq tug, hax ceh nux cud cad lehq teo. Nawg awr lehr, yaq taw tug mad cawg lehq, awg cehg mag ve tawd khuhd haq thed ghad cawd ghad mar vid vix che kanx te par phehq tug yaog. 16 Ghig sa haq ma yawz yan che awg khuhn kheha koz gid che tawd khuhd teq pa haq jaw kae-o. Awg lawn ghod ver, chaw u ve teq pa awr lehr, Ghig sa haq ma yawz maq yan che ni ma ghaq te ghaq mad phehq vehr che yaog. 17 I hehd mar vid che teq pa awr lehr, kid che behg che khuh kig, ir veh kuhg veh che heh phehq che yaog. I hehd awg khuhn lo Hur mer nehd he lehq Phid lehq liz chehd che yaog. 18 Ix mag awr lehr, thed che cawd che ted ceng yawnd yaq veh lehq suh kig lo kawq teq tuag che ted ceng te gha vehor,§ 2:18 thed che cawd che ted ceng yawnd yaq veh lehq suh kig lo kawq teq tuag che ted ceng te gha vehor Kawq teq tuag che awr lehr awg ton ma hez. Co ha haq lehax caz daq che, lehz ix mag mar chehd che yaog. lehd koz che yaog. Chaw ted pehg pehar ve yonr che ni ma haq ix mag yug phuhz vid chehd che yaog. 19 Kheh ma khuhd, Ghig sa ve yeg che awg cuhz penr awr lehr, khar thad liz yeg chehd lehq, cunr che kheh te dawz lar che yaog. † 2:19 Heh 16:5“Jawd mawd Ghig sa awr lehr, yawd ved chaw teq pa haq sir chehd che yaog.” Kheh te lehq, “Jawd mawd Ghig sa ve awg meh haq puhd chehd che chaw awg gha lia awr lehr, ma thed ma cawd che haq chid bag lar haz-oq,” lehz buhq lar che yaog.

20 Ir che yehg ted yehg awg khuhn phu khen si khen lehax cawg che ma hez. A suhz he lehq a jeq te lar che awg khen teq pa liz cawg che yaog. Awg khen ted pehg pehar haq awg mig awg phond cawg che awg pun yehd lehq, ted pehg pehar haq awg mig awg phond mad cawg che awg pun yehd che yaog. 21 Kheh te lehq, awg mig awg phond mad cawg che awg ceng teq pa haq a sug yawd awg ton khuhn yug chid bag ver, yawd awr lehr, daq che kanx awg gha lia haq te tug awg pun ghu lar hehnd lar che, awg sehr phad yehd gha che, daq che kehg che he lehq awg mig awg phond cawg che awg khen phehq tug yaog. 22 Yad nehg teq pa awg suhr awg sar phawd awr sex lae vix che* 2:22 sex lae vix che Ma hez hez che yonr khad haq na che, a sug yawd awg ton haq ma ghad che, Ghig sa haq haq che haq keh mig gig ha lehg tug haq haq che haq koz che yaog. awg ceng teq pa haq nawg jaw kae-o. Daq kehg che ni ma awg khuhn Jawd mawd Yer suq haq kug che chaw teq pa geh teq geha thed che cawd che awg ceng, yonr che awg ceng, haq pehnd che awg ceng he lehq duhd sa gad sa che awg ceng teq pa haq hax ceh nux teo. 23 Cud yiq mad cawg lehq teq chaweh cuhx kig mad cawg che awg lawn teq pa jehg daq che haq liz jaw kae-o. Awg lawn ghod ver, kheh te jehg daq che ted ceng awr lehr, tawd ghawg daq che ted ceng haq lehax te tuhaz che nawg sir chehd che yaog. 24 Jawd mawd Ghig sa ve awg ceg teq pa awr lehr, ded daq yaq daq che chaw maq gha phehq. Yawd awr lehr, chaw awg gha lia haq ni ma nud nehg che chaw, mar vid vix che chaw he lehq yeg khanr vix che chaw gha phehq che yaog. 25 Yawd haq tawr daq che chaw teq pa haq ni ma nud nehg che awg khuhn mar vid vix che chaw liz gha phehq che yaog. U kheh te ver, thed che cawd che ted ceng haq i hehd sir phehq tug, i hehd vend bax duhd phuhz tug Ghig sa te vid tug lehq nar maq sir. 26 Kheh te lehq, ned haeg ve a lor haq te tug awg pun i hehd haq ned haeg pheh yug lar peg† 2:26 ned haeg pheh yug lar peg Ned haeg beg khuhd na lehq yaq kaw yaq vehr che haq koz che yaog. liz, i hehd kawq sir lehq ned haeg ve va awg khuhn gha pong tug yaog.