16
Khreq yad teq pa haq ga vid tug phu tand saw che awg lawn
1 Khreq yad teq pa awg pun phu tand saw che awg lawn awr lehr, Gar lar tiq muhd mig khuhn chehd che Khreq yad awg mor teq pa haq* 16:1 Khreq yad awg mor teq pa haq 2K 8:1, 9:1-4 haq ngawx. ngag koz vid lar che heh, nig hehd liz u kheh teo. 2 Ngag lag che te yand phu tand maq gha saw tug, sinx gha lia awg khuhn awg kawd teq ni huh, nig hehd awg gha lia a sug yawd awg bon gha lar che heh, phu tand pid tug awg pun yug tuhz lehq haq sax lar-oq. 3 Ngag lag gag che te yand, nig hehd ve phu tand haq Yer ruq sar lehnr med lo yug kog vid tug, nig hehd ni ma cawd che chaw teq pa haq lez yug lehq, i hehd awg pun sax khiz khanr che liq buhq vid peg khaz nuhr, ngag i hehd haq kae pe tug yaog. 4 Ngag liz kae cawd ver, i hehd ngag geh teq geha kae gha tug yaog.
Pawd loq kae tug yaq kaw
5 Mar ker dawd niq† 16:5 Mar ker dawd niq Cy 16:8, 2K 1:6 muhd mig haq ngag phanr kae peg ver, ngag nig hehd chehd lo lag tug yaog. Awg lawn ghod ver, ngag Mar ker dawd niq muhd mig haq gha phanr kae tug yaog. 6 Ngag khar ve te phawd awr lo kawq kae tug lehd ma koz, nig hehd ngag haq kawq kae peha tug liz, ngag nig hehd geh a cehax muh chawa chehd tug lehd duhd lar che yaog. Muhd kaz yand peg thad kha gag nig hehd geh chehd tug lehq gha hawg. 7 Awg lawn ghod ver, a meha phanr kae chehd che awg khuhn lehax nig hehd haq gha mawg daq tug ngag maq te gad. Kheh ma khuhd, Jawd mawd Yer suq ni ma cawd ver, ngag nig hehd geh a cehax muh chawa chehd tug duhd law lar che yaog. 8 Per ter khoq ter pawehd awg ni‡ 16:8 Per ter khoq ter pawehd awg ni Par sar khar pawehd peg khaz nuhr 50 ni muh vehr thad te che pawehd haq koz che yaog. Awg sir awg no tand che pawehd te che yaog. Ak 23:10-16 kha gag, ngag Ed fed suq med khuhn chehd tug yaog. 9 Awg lawn ghod ver, kanx kha nehax te gha tug ngag awg pun kuhg jad che ghaz mir ted mag phawa lar che yaog. Tawr lar sehr phad liz kha peh cawg che yaog.
10 Tiq mod ser§ 16:10 Tiq mod ser 1Ti haq ngawx. nig hehd geh lag gag ver, nig hehd geh chehd-ag huh yawd maq gha kuhz tug nig hehd sa tiq tar-oq. Awg lawn ghod ver, yawd awr lehr ngag heh te lehq Jawd mawd Yer suq ve kanx te sehr phad phehq che yaog. 11 Kheh te lehq, te ghad-eg liz yawd haq maq sawnr ma caz taq te. Yawd ngag chehd lo kawaq gha tug, duhd sa che awg khuhn yawd haq kawq peha laoq. A vix a nax teq pa geh teq geha yawd kawaq tug haq ngag duhd law chehd che yaog.
12 A vix a nax Ar pawd loq* 16:12 Ar pawd loq Cy 19:1 haq ngawx. Kawd ren thuq med khuhn awg mor sawnr daq che cawg chehd che haq te lehq yawd u huh maq kae gad che gha hawg. 1:12 awg lawn awr lehr, a vix a nax teq pa geh teq geha nig hehd ve chehd kig lo lag tug, ngag yawd haq hax ceh nux awg ghad pid liz, a meha nig hehd ve chehd kig lo lag tug yawd ni ma a cehax liz mad cawg che yaog. Kheh ma khuhd, awg yand cawd che te yand, yawd nig hehd chehd lo lag tug yaog.
Awg leh med ve tawd khuhd
13 Nig hehd kha nehax sa tiq te lehq law lar-oq. Yonr che awg khuhn yeg chehd-oq. Awg ghad yug tuhz lehq, ni ma tag che khuhn te chehd-oq. 14 Nig hehd kha te che awg gha lia awr lehr, haq pehnd che awg khuhn teo.
15 A vix a nax teq paog, Sar ter phanr ve yehg yad ka yad teq pa awr lehr, A kha ya muhd mig awg khuhn Khreq yad awg kawd phehaq lehq, Khreq yad teq pa awg pun kanx te tug, i hehd awr lehr a sug yawd ved awg ton chid aq vid lar che haq nig hehd sir che yaog. 16 Nig hehd awr lehr, che kheh te che chaw teq pa awg huhx lo lehd ma koz, teq geha kanx kha sehax te chehd che chaw awg gha lia awg huhx lo lehd ma koz, kha nehax chehd tug ngag nig hehd haq lawg khawx che yaog. 17 Sar ter phanr, Phaw tud naq he lehq A kha ya kuq† 16:17 Phaw tud naq he lehq A kha ya kuq Ix mag awg lawn teq chaweh maq gha sir. Kawd ren thuq chaw teq pa buhq vid che liq haq ix mag yug veha vid che haq sur che yaog. 7:1 teq pa lag gag cheaq te lehq, ngag ha lehg jad che yaog. Awg lawn ghod ver, ngag nig hehd haq maq gha mawg liz, i hehd haq gha mawg che haq te lehq ngag ni ma sa vehr che yaog. 18 I hehd awr lehr, ngag ved ni ma he lehq nig hehd ve ni ma haq duhd sa tug tea che yaog. Kheh te che chaw teq pa haq kha nehax yawz yan-o.
19 Chuhr huh Ar siq muhd mig‡ 16:19 Ar siq muhd mig A meha Tu ra ki muhd mig lehd kawq koz che yaog. Pawd loq u huh bon mar jaw che yaog. Cy 19:10 awg khuhn Khreq yad awg mor teq pa awr lehr, nig hehd haq duhd nuhd chehd che yaog lehz tawd sanr fea che yaog. Ar kud laq he lehq Pid kid laq§ 16:19 Ar kud laq he lehq Pid kid laq Cy 18:1-4, Rm 16:3-5 liz, i hehd ve yehg khuhn phawng daq che Khreq yad awg mor liz, Jawd mawd Yer suq awg khuhn nig hehd haq duhd nuhd jad che yaog lehz, teq geha tawd sanr fea lar che yaog. 20 A vix a nax awg gha lia nig hehd haq duhd nuhd che yaog lehz tawd sanr fea lar che yaog. Nig hehd te ghad he lehq te ghad daq che kehg che awg khuhn bux daq lehq laq kuhr cax daoq.
21 Ngag Pawd loq awr lehr, nig hehd haq duhd nuhd che awg khuhn tawd che te khuhd ngag awg ton nig hehd haq buhq fea che* 16:21 ngag awg ton … buhq fea che Pawd loq liq buhq fea ver, mad-awr ve yawd koz vid lehq su haq buhq cuh che yaog. Rm 16:22, 2Th 3:17, Kaw 4:18 yaog. 22 Chaw te ghad ghad Jawd mawd Yer suq haq mad haq ver, khen che haq gha khanr cuh vid-oq. A nig ved Jawd mawd lag vid-oq. 23 Jawd mawd Yer suq ve awg bon awg sinx nig hehd geh cawg vid-oq. 24 Ngag ved haq pehnd che ted ceng awr lehr, Yer suq Khreq awg khuhn nig hehd awg gha lia geh cawg vid-oq.
*16:1 16:1 Khreq yad awg mor teq pa haq 2K 8:1, 9:1-4 haq ngawx.
†16:5 16:5 Mar ker dawd niq Cy 16:8, 2K 1:6
‡16:8 16:8 Per ter khoq ter pawehd awg ni Par sar khar pawehd peg khaz nuhr 50 ni muh vehr thad te che pawehd haq koz che yaog. Awg sir awg no tand che pawehd te che yaog. Ak 23:10-16
§16:10 16:10 Tiq mod ser 1Ti haq ngawx.
*16:12 16:12 Ar pawd loq Cy 19:1 haq ngawx. Kawd ren thuq med khuhn awg mor sawnr daq che cawg chehd che haq te lehq yawd u huh maq kae gad che gha hawg. 1:12
†16:17 16:17 Phaw tud naq he lehq A kha ya kuq Ix mag awg lawn teq chaweh maq gha sir. Kawd ren thuq chaw teq pa buhq vid che liq haq ix mag yug veha vid che haq sur che yaog. 7:1
‡16:19 16:19 Ar siq muhd mig A meha Tu ra ki muhd mig lehd kawq koz che yaog. Pawd loq u huh bon mar jaw che yaog. Cy 19:10
§16:19 16:19 Ar kud laq he lehq Pid kid laq Cy 18:1-4, Rm 16:3-5
*16:21 16:21 ngag awg ton … buhq fea che Pawd loq liq buhq fea ver, mad-awr ve yawd koz vid lehq su haq buhq cuh che yaog. Rm 16:22, 2Th 3:17, Kaw 4:18